Isaías 60:16 - Biblia Enxet

¹⁶ Elmések sa' nento élmátsa agko' ma'a pók aptémakxa nak chá'a énxet'ák, elsókásegmak sa' aqsok apagkok ekxámokma élmomnáwa m'a kelwesse'e apkelwányam nak; elya'ásegwók sa' sektáha ko'o sélwagkasso teyp, ko'o sektáha nak Wesse', tén han sektáha sélmallahanchesso aqsok ekmaso, ko'o ekha nak Sekyennaqte Jacob Wesse' apagkok.

Isaías 60:16 ပူးပေါင်းရင်းမြစ်များ

Éxodo 6:7

Almok sa' ko'o kéxegke atnehek énxet'ák ahagkok, tén sa' ko'o kéxegke héltéhek Dios kélagkok. Sa' hélya'ásegwók nahan ko'o sektáha Dios Wesse' kélagkok ma'a sélmallahanchesa sa' ektémakxa ekyentaxno kéltamheykha apmésso chá'a m'a egipcios.

Isaías 1:24

Cháxa keñamak Wesse' ekha nak apyennaqte, Apyennaqte apagko' nak ma'a Israel, aptáha appeywa s'e: “¡Wánxa kólteme! Allegássesagkohok sa' ko'o m'a sélenmexma nak. Ayaqmagkásekxak sa' mók ma'a apkeltémakxa nak.

Isaías 12:6

Kólwehesha yetlo ekpayheykekxa kélwáxok, kélheykha nak Sión, hakte apheyk kélnepyeseksa kéxegke m'a Dios Aptaqmalma apagkok nak ma'a Israel, yetlo ekyawe apcheymákpoho.”

Isaías 19:20

Katnehek sa' aqsok magkenatchesso, yaqwayam sa' kaxénwakxohok chá'a kélwáxok Wesse' ekha nak apyennaqte m'a apchókxa Egipto. Apkelwóneyha sa' agkok chá'a Wesse' egegkok yának epasmok eñama apkelápagqánamap ma'a ektáha nak chá'a apnaqtawáseykegkoho, yáphássesek sa' chá'a xama appasmo, yaqwayam sa' elmeyók chá'a tén han elwagkasek chá'a teyp.

Isaías 25:9

Sa' katnehek kalpaqmetaxchek, cháxa ekhem nak: “Cháxa Dios egagkok xa, negáyo nak chá'a, nélhaxanma nak hẽlwagkasek teyp. Kalpayhekxa egwáxok, ólátsaha, ẽlwagkassek teyp ma'a.”

Isaías 29:24

Kaltámeyagkok sa' aptamhéyak ekha apkelmopwancha'a m'a énxet'ák melya'áseyak nak aptamhágkaxa, emok sa' nahan takha' kélxekmósso m'a énxet'ák apkelpaqméteykha nak chá'a ekmaso exének pók.”

Isaías 33:22

Kelyelqamáxcheyk táma' kélnaqtete xa yántakpayhe ekyawe nak massegkek élyennaqtésso m'a yámet ekwenaqte agkok nak; megkólwanchek kólpeykásekxak ma'a apáwa agkok nak. Ólyementamok sa' ekxámokma agko' aqsok apagkok ma'a sẽlenmexma nak, kawomhok sa' apkelxawéyak aqsok apagkok ma'a meyke nak apaqta'ák, elmagkok sa' aqsok ma'a élmasagcha'a nak chá'a apyókxa apkelyelqamap nak chá'a. Hakte Wesse' egegkok apteme énxet segyekpelchémo egagkok, apteme senlánésso chá'a segánamakxa tén han wesse' apwányam egagkok, sa' hẽlwagkasek nahan teyp ma'a.

Isaías 43:11

Ko'o aqsa exakkók sekteme Wesse'; méko pók apmopwána enxoho elwagkasek teyp énxet.”

Isaías 45:15

Xép apteme Dios magwete, Dios apwagkasso nak teyp ma'a Israel.

Isaías 45:21

Kólpaqmet, kólxén aqsok kélwete, kólteme chá'a kólmaxneyha kélmók kélmako enxoho chá'a kólmaxneyha s'e: ¿Yaqsa axta éltenneykha sekxók eyeynamókxa axta xa aqsok nak? ¿Yaqsa axta eklegasso m'a nanók axta? ¿Háweya axta ko'o, sektáha nak Wesse'? Méko pók Dios. Ko'o sekwánxa ahagkok sekteme Dios sélmallahanchesso aqsok ekmaso énxet'ák ahagkok, tén han sélwagkasso teyp.

Isaías 49:23

Sa' katnehek ekteme yapmeyk ma'a kelwesse'e apkelwányam nak keñe sa' ektaqmelchesso chá'a m'a kelwesse'e kelwán'ák nak. Eltekxeyagkok sa' chá'a aptapnák xóp amonye' exche', ekwokmoho apkeltekxeya nápaqta'a xóp ekweykekxoho m'a kelwesse'e kelwán'ák nak, awanhók agko' sa' katnehek apcháyo. Keñe sa' kay'asagkohok ko'o sekteme Wesse', kay'asagkohok sa' nahan memegqáyhek chá'a m'a ektáha nak ko'o mehey'ásseyam.”

Isaías 49:26

Wának sa' ko'o etawagkokxak aphápetek apancha'awók ma'a apsawhéssamo axta aqsok kélagkok, wának sa' kalnápekxak ma'a éma apagkok apagko' nak ektémól'a énagkok ma'a vino. Keñe sa' elya'asagkohok apyókxoho énxet ektáha ko'o sekwagkasso teyp, ko'o sektáha nak Wesse'; elya'asagkohok sa' sektáha sekmallahanchesso aqsok ekyentaxno, ko'o sektáha nak Jacob Wesse' apagkok ekha sekyennaqte.”

Isaías 52:6

Kammok sa' eyke ekhem yaqwánxa elyekpelchágwók tén han elya'ásegwók énxet'ák ahagkok sektéma ko'o sélanagkama s'e: ko'o Wesse' kélagkok.”

Isaías 59:20

Éxyamok sa' yaqwayam etnehek apwagkasseykta teyp ma'a Sión tén han ma'a apyókxoho nak Jacob aptawán'ák neptámen apkelwátéseyak nak apkeláneyak apkeltémakxa ekmaso. Wesse' egegkok apxeyenma xa.

Isaías 60:17

“Sawo ekyátekto ekmomnáwa sa' agkések háwe sa' sawo ekyexwase, sawo' ekmope élyenma sa' agkések háwe sa' sawo ekyentaxno, sawo ekyexwase sa' agkések háwe sa' yántéseksek, sawo ekyentaxno sa' agkések háwe sa' meteymog. Wának sa' elwetaksek meyke ektáhakxa kélwáxok ma'a kelwesse'e kélagkok nak, wának sa' elanha apnámakkok yetlo ekpéwomo apkeltémakxa.

Isaías 61:6

Keñe sa' kéxegke kóltamhaxchek Wesse' egegkok kélmaxnéssesso énxet'ák apagkok, Dios egagkok apkeláneykha. Kólmagkok sa' aqsok apagkok ekxámokma nak ma'a pók aptémakxa énxet'ák, kaqheykha sa' kélwáxok kólmaha m'a aqsok éltaqmalma apagkok nak.

Isaías 63:16

¡Xép apteme negko'o egyáp! Mehẽlya'ásegkok eykhe m'a Abraham, megkaxénwakxók nahan negko'o apwáxok ma'a Israel, Wesse', xép apteme negko'o egyáp; nanók xép apteme sẽlwagkasso teyp.

Isaías 63:8

Aptáhak axta s'e: “Ko'o énxet'ák ahagkok xa, étchek yaqwayam sa' mehelyexanchesha chá'a.” Axta nahan apkelwagkasso teyp

Isaías 66:14

Kélwet'ak sa' agkok kéxegke xa, kalpayhekxak sa' kélwáxok; kayaqmagkasek sa' mók ektémakxa kélyempe'ék ektémól'a m'a pa'at. Exekmósek sa' apmopwána Wesse' egegkok nepyeseksa m'a apkeláneykha, keñe sa' aplo m'a nepyeseksa nak apkelenmexma.

Jeremías 15:21

Magwohok sa' emok ma'a énxet'ák élmasagcha'a nak apkeltémakxa, ¡awagkasek sa' teyp neyseksa apmáheyo emok ma'a énxet'ák apkelyennaqteyáseykha nak chá'a apyempe'ék!”

Ezequiel 34:30

Keñe sa' elya'ásegwók sekha ko'o nepyeseksa m'a, ko'o sektáha nak Dios Wesse' apagkok, tén han aptáha énxet'ák ahagkok ma'a énxet'ák Israel. Ko'o sekxeyenma xa, sektáha nak Wesse'.