Isaías 55:5 - Biblia Enxet

⁵ Elwónmakha sa' xép ma'a énxet'ák melya'ásegko nak; enaqtémegmak sa' elya'áwak xép ma'a énxet'ák melweteya nak, hakte ekteméssessegkek ko'o exchep ekha kéláyo ko'o sektáha nak Wesse' apagkok, Dios Aptaqmalma nak ma'a Israel.

Isaías 55:5 ပူးပေါင်းရင်းမြစ်များ

Génesis 49:10

Méko keymentók ektémakxa apyennaqte Judá, méko han kawának keymentók aptémakxa nak ekha kélyaheykekxoho, ekwokmoho apwa'akto makham ma'a ektáha nak apagkok ma'a aptémakxa nak wesse', cham'a peya nak elyahakxohok ma'a énxet'ák.

2 Samuel 22:44

Emallahanchessegkek axta nepyeseksa m'a énxet'ák apkelnápomákpo axta chá'a énxet'ák ahagkok, etnéssessegkek axta aqsa makham sémha emonye' nepyeseksa m'a pók aptémakxa énxet'ák, éltemessáseykha axta ko'o m'a énxet'ák megkatnaha nak sélweteykxa'.

Salmos 18:43

Emallahanchessegkek axta nepyeseksa m'a énxet'ák sénmexeykha axta chá'a, sémha emonye' axta etnéssessók ma'a nepyeseksa nak pók aptémakxa énxet'ák, éltemessáseykha axta ko'o m'a énxet'ák megkatnaha nak sélweteykxa'.

Isaías 45:14

Aptáhak apcháneya Wesse' egegkok Israel se'e: “Elyelqakpok sa' aqsa nápaqtók xép ma'a énxet'ák Egipto apkeltamheykha nak chá'a yókxexma, tén han ma'a énxet'ák ekha nak chá'a aqsok apkexeykekxa m'a Etiopía, tén han ma'a énxet'ák Sabá, cham'a énxet'ák apkelwenaqte nak, apkelásenneykha naqsa sa' etnehek; elxog sa' neptámen xép yetlo kélpextete cadenas, eltekxeyagkok sa' aptapnák xóp apmonye' exchep tén sa' etnehek yának se'e: ‘Naqsók apha kélnepyeseksa kéxegke Dios, méko pók, méko pók kéláyókxa.’”

Isaías 45:22

“Énxet'ák, kélheykha nak ekyókxoho apkelókxa keso náxop hélyo'óta ko'o, ko'o sa' alwagkasek teyp, hakte ko'o sekteme Dios, méko pók.

Isaías 45:23

Ekxénaxchekxók ko'o ahagko', ekxénchek ma'a amya'a ekmámnaqsoho nak, katnehek sa' nahan xa sektáhakxa nak sekxeyenma: apyókxoho énxet sa' eltekxeyagkok aptapnák emonye' ko'o, apyókxoho énxet sa' hexének ko'o hélpeykesho'.

Isaías 49:12

¡Kólenmexho! Makhawók apkeleñamak ma'a: nápakha apkeleñamak ma'a nexcheyha, keñe nahan nápakha m'a taxnegwánxa ekhem nak, keñe nahan nápakha m'a yókxexma Asuán.

Isaías 49:6

“Mopwanchek xép etnehek séláneykha wánxa apkelánekxésso apheykha m'a Jacob énxet'ák apagkok tén han yaqwayam enaqlanták makham ma'a énxet'ák Israel apkeleymomap nak meletsapma; atnéssesek sa' nahan ko'o exchep élseyéxma apagkok ma'a apyókxoho pók aptémakxa énxet'ák, yaqwayam sa' eswok nélwagkásamáxche teyp ahagkok ma'a makhawók agko' nak keso náxop.”

Isaías 52:15

sa' katnehek nahan kalpelakkasek elwetak ma'a apyókxoho pók aptémakxa nak chá'a énxet'ák; apkelwet'ak sa' agkok ma'a kelwesse'e apkelwányam nak, elwanmeyagkok sa' aqsa, hakte elwetak sa' ma'a aqsok megkóltennassama axta, elyekpelkohok sa' ma'a mellegaya axta kaxénaxche'.

Isaías 55:4

Ekteméssessegkek axta ko'o apkemha apmonye' tén han apkelxekmowáséyak chá'a énxet'ák ma'a, yaqwayam enxoho kañék chá'a ekwetamaxche m'a sekmowána.

Isaías 56:8

Wának sa' ko'o elchexyók ma'a apheykha nak makham megkatnahakxa apkelókxa, wának sa' yaqnekxak makham.” Wesse' egegkok apxeyenma xa, apkeltémo axta elchexyók makham elyepetchegwaták israelitas ma'a apkexpaqneykha nak mók nekha.

Isaías 60:5

Kélwet'ak sa' agkok kéxegke m'a, kalpayhekxohok agkók sa' kélwáxok, awanhók agko' sa' katnehek ekmátsa kélwáxok; kólsantagkasek sa' ma'a aqsok éltaqmalma éleñama nak ma'a apkelókxa neyáwa wátsam ekwányam, kólxawágwaták sa' ma'a aqsok élmomnáwa apagkok nak ma'a pók aptémakxa énxet'ák.

Isaías 60:9

Yántakpayhe xa élmeyókmo nak kélhágkaxa, Tarsis yántakpayhe élyawe m'a élámha amonye'e nak élxegayam, makhawók apkelenyekták eknaqlántegkesa m'a énxet'ák kélagkok, yetlo m'a sawo ekyátekto élmomnáwa apagkok tén han ma'a sawo ekmope élmomnáwa, eñama m'a Wesse' kélagkok, Dios Aptaqmalma nak ma'a Israel, apteméssessama nak kéleymáxkoho.

Jeremías 30:19

Sa' kañék katyapok negmeneykmasso negmésso nak ekxeyenma egwáxok Wesse' egegkok ma'a, tén han néktegmeykha ekpayheykekxa egwáxok. Metnekxeyk sa' apqántawo', hakte ko'o sa' axámasagkok. Megkólwanyaha sa' nahan, hakte ko'o sa' atnéssesek ekha kéláyo.

Ezequiel 39:7

Wának sa' ko'o elya'asagkohok sekwesey ektaqmalma m'a énxet'ák ahagkok Israel, magwohok sa' chá'a kaxwók kóllenxanmagkohok kéltawáseykha. Keñe sa' ma'a énxet'ák apkeleñama nak mók apkelókxa elya'ásegwók sektáha ko'o sektaqmalma m'a kañe' Israel, ko'o sektáha nak Wesse'.

Oseas 1:10

Xama ekhem sa' exnágwakxohok makham apxámokma israelitas ma'a ektémakxa nak ekxámokma yagkamex ma'a neyáwa nak wátsam ekwányam, méko sa' kawának kay'asagkohok apwánxa, tén han kalyetsetek. Megkatnehek sa' kólának kaxwók se'e: “Háwe kéxegke kaxwók énxet'ák ahagkok.” Sa' etnehek elának Dios se'e: “Kéxegke kélteme apketchek ma'a Dios memassegwayam nak.”

Zacarías 2:11

Temék sa' agkok xa, apxámok sa' pók aptémakxa énxet'ák elyo'ótak ma'a Wesse' egegkok. Sa' etnehek appeywa s'e: “Atnehek sa' nahan énxet'ák ahagkok xa énxet'ák nak. Keñe sa' axek chá'a ko'o kélnepyeseksa kéxegke.” Keñe sa' kólya'ásegwók kéxegke aptáha seyáphasso ko'o m'a Wesse' egegkok ekha nak apyennaqte.