Isaías 52:1 - Biblia Enxet

¹ Sión, exatakha', énnákxoho; Jerusalén, tegma apwányam aptaqmalma, elántaxnekxa apkelnaqta apkeltaqmalma apagko' nak, hakte melántexek sa' chá'a kaxwók kañe' apwáxok ma'a énxet'ák melya'áseyak nak Dios, tén han ma'a élmanyása nak apyempe'ék.

Isaías 52:1 ပူးပေါင်းရင်းမြစ်များ

1 Crónicas 16:29

kólteme kéláyo Wesse' egegkok ekpayhawo nak kólteméssesek; kólántex chá'a aphakxa nak yetlo kélseykekxa m'a aqsok kélmésso naqsa; kólpeykesho chá'a Wesse' egegkok ma'a ekpayho nak tegma appagkanamap apagkok aptaqmalma.

Nehemías 11:1

Apkelhakmek axta Jerusalén ma'a apkelámha apmonye'e nak chá'a nepyeseksa énxet'ák; keñe axta m'a nápakha apkeleymomap axta aptawásegko chá'a xama aqsok, yaqwayam enxoho elhók chá'a Jerusalén xama nepyeseksa m'a diez énxet'ák, cham'a tegma apwányam appagkanamap nak, keñe sa' ma'a pók apkeleymomap nak nueve, elhók chá'a mók apheykegkaxa nak chá'a énxet.

Salmos 110:3

Epasmekxak sa' énxet'ák apagkok peya enxoho yempakha'. Etépekxak sa' aqsa chá'a wokma'ák apagkok yókxoho ekhem ma'a egkexe élpagkanamaxche nak, ektémól'a yálye ektéyeykmohol'a amonye' ekteyapma ekhem.

Éxodo 28:2

Elanés sa' apkelántaxno apkeltaqmalma apagko' ma'a apepma Aarón, yaqwayam sa' egkések apcheymákpoho tén han ektaxnémo.

Éxodo 28:40

Elanés sa' nahan apkelántaxno apkelwenaqte m'a Aarón apketchek nak, tén han ma'a apnaqtete nak chá'a nepxet tén han ma'a apkelatchesso apqatkok, yaqwayam sa' kalmések apkeleymákpoho tén han ektaxnémo.

Isaías 1:21

¡Aphágweykxók kelán'a ekyaqmagkáseyak pók énxet ekma nak chá'a ekyánmaga ekpathetéyak ma'a tegma apwányam meyenseyam nak Wesse' egegkok! Tásek axta chá'a katnehek aqsok apkelánéyák apyókxoho énxet'ák apheykha nak ma'a, cham'a nanók axta, kapéwhok axta chá'a, keñe kaxwók aptamhágko tekyawa yapmeyk.

Isaías 1:26

Wának sa' exnekxak makham énxet'ák segyekpelchémo apagkok, ektéma axta m'a nanók axta, tén han ma'a appékessáseyak nak chá'a apnámakkok, ektéma axta m'a sekxók axta. Ekpenchessek sa' agkok ko'o sekteméssesso xa, kóltemessásekxak sa' makham apwesey ‘Tegma apwányam ekyetnamakxa sẽltaqmelchessáseykekxa negha’, Tegma apwányam magyenseyam ‘Wesse' egegkok’

Isaías 26:2

Kólmeykesák atña'ák yaqwayam sa' elántexek ma'a énxet'ák apkelpéwomo melyenseyam nak apteme melya'ásseyam.

Isaías 35:8

Keytek sa' nahan xama ámay ma'a neyseksa nak, kólteméssesek sa' ekwesey “ámay ekpagkanamaxche'”. Mopwanchek sa' elpéwhok élmanyása nak apkeltémakxa m'a; melpéwók sa' nahan chá'a m'a énxet'ák élyeyháxma nak.

Isaías 4:3

Eltamhakpok sa' “apkelpagkanchásamap Wesse' egegkok ma'a” énxet'ák apkeleymomap nak meletsapma m'a Sión, cham'a apkelwayam nak teyp ma'a Jerusalén apkelxawéyak nak yaqwayam exmakha m'a.

Isaías 48:2

kélxeyenma nak chá'a kéleñama tegma apwányam aptaqmalma tén han kélpasmeykekxa m'a Israel Dios apagkok, apwesey nak Wesse' ekha apyennaqte.

Isaías 49:18

Kalyeheykha, kasawheykha exma neyáwa', kalano ektáhakxa apwakhegwa'akto apyókxoho énxet, tén han ektáhakxa apkelye'eykekta exche'. “Naqsók ko'o sekxéna, sektáha nak Wesse' peya elxohok aqsok étkók élmomnáwa xa apyókxoho nak yaqwayam sa' kawakhésaxchek xeye', ektémól'a kélnáxegkáseykha m'a xama kelán'a ekmáheyól'a kalyamhápok.

Isaías 51:17

Kaxatakha Jerusalén, kaxatakha', kampekxa néten. Legágkók xe' Wesse' egegkok aplo, máxa entáhak ma'a ekyena enxoho xama egheykok kélyeta m'a vino, yamásawók ekyena ekwokmoho eyaqha.

Isaías 51:9

Exatakha' Wesse' egegkok exatakha' yetlo apmopwána, emekxa apyennaqte; exatakha' aptéma axta m'a nentámen axta cham'a nanók agko' axta. Apkelyaqtenneykegkek axta exchep ma'a Rahab, cham'a yegmen askok ekyawe nak;

Isaías 60:1

Kólchaqnekxa néten, énxet'ák Jerusalén, kólaqlaxche apkelyenma, hakte wa'ak élseyéxma kélagkok, kelyenmeyk Wesse' egegkok apcheymákpoho kélyetseksa'ák.

Isaías 60:21

“Énxet meyke apkeltémakxa sa' etnahagkok apyókxoho m'a énxet'ák kélagkok, etnahagkok sa' chá'a apagkok apchókxa meyke néxa, éltekteyapmakxa m'a xama yámet ektáha axta ko'o séneykekxa ahagko', sélane axta ko'o yaqwayam axekmósek ektémakxa seyeymáxkoho.

Isaías 61:10

¡Appeykásekxeyk ewáxok Wesse' egegkok! Awanhók agko' segkésso sélsawassamo m'a Dios ahagkok, hakte egkéssek ma'a nélwagkásamáxche teyp apagkok, ¡ewagkásawók ahagko' teyp! Máxa ektáhak ma'a ektémól'a énxet élyamhopma kélatchessessól'a apqátek ma'a apkelháxaqxo ektaqmalma, ektémól'a m'a xama kelán'a ekmáheyól'a kalyamhápok kélnáxegkáseykhal'a kólnatmeyásekxak ma'a élnatanma éltaqmalma.

Isaías 61:3

tén han yaqwayam almések apkelháxaqxo éltaqmalma megkatnaha nak táhap ma'a énxet'ák apkellegeykegkoho nak ekyentaxno apkelwáxok ma'a Sión, tén han sokmátsa ekpeykeseykekxoho nak egwáxok megkatnaha nak ma'a nenlekxagweykha, tén han negmeneykmasso nélpeykessamo, megkatnaha nak ma'a magya'áseyak nak nentáhakxa. Kólteméssesek sa' apkelwesey “Yenta'a élyennaqte élpéwomo éltémakxa” apkeneykekxa m'a Wesse' egegkok yaqwayam exekmósek apcheymákpoho.

Isaías 64:10

Yókxexma meykexa énxet tamheykekxak ma'a tegma apkelyawe apkeltaqmalma apagkok nak, apmopso aptamheykekxak ma'a Jerusalén, kélmassésseykmek nahan.

Jeremías 31:23

Aptáhak Wesse' ekha apyennaqte, Dios apagkok nak Israel se'e: “Ekyaqmagkassessek sa' agkok ko'o mók ektémakxa nak apheykha m'a énxet'ák Judá, apkelhákxo sa' makham ma'a xapop apagkok nak, tén han ma'a tegma apkelyawe apagkok nak. Sa' etnehek makham apkelpeywa s'e: ‘¡Etaqmelchesek sa' Wesse' egegkok se'e egkexe ekpagkanamaxche nak, ekyetnamakxa nak ekpéwomo nentémakxa!

Ezequiel 44:9

“Cháxa keñamak sektáha nak ko'o sekpeywa s'e sektáha nak Wesse': Metxehek sa' tegma appagkanamap ahagkok xama énxet megkatnaha nak kélókxa xamo', meyke nak kélqahasso apyempehek tén han apwáxok ma'a ekhémo mók nélpaqhetchásamáxkoho ahagkok; megkeyxek sa' xama énxet metnaha nak kélókxa xamo' apha m'a nepyeseksa israelitas.

Daniel 10:9

Xama axta sekleg'a appaqmeta, élpólenteyk axta sekyaqnena seyapa, ekyetneyk axta náxop.

Joel 3:17

“Kólya'ásegwók sa' kéxegke ko'o sektáha nak Dios Wesse' kélagkok, sekha m'a Sión, egkexe ekpagkanamaxchexa ahagkok nak. Tegma apwányam appagkanamap sa' etnehek ma'a Jerusalén: kamaskok sa' emok kaxwók ma'a énxet'ák apkeleñama nak mók nekha.

Nahúm 1:15

¡Kóllano! ¡Apxegakmek apseykha nak amya'a meyke ektáhakxa egwáxok ma'a néten nak egkexe! Énxet'ák Judá, kóllána kélessawassamo; kóllána m'a kélxeyenma axta chá'a kóllána'. Wánxa sa' kaxwók apkelántaxno xapop kélagkok ma'a énxet'ák élmasagcha'a nak apkeltémakxa; hakte apmassegwokmek apyókxoho m'a.

Hageo 2:4

¡Ná eyelqáp Zorobabel! ¡Ná eyelqáp Josué, apteme nak apkemha apmonye' apkelmaxnéssesso Dios énxet'ák apagkok! Nágkólyelqaxche kélyókxoho kéxegke énxet'ák kélheykha nak apchókxa. Kóltemeykha, ekheyk ko'o kélnepyeseksa kéxegke. Ko'o sekxeyenma xa, sektáha nak Wesse' ekha sekyennaqte.

Zacarías 3:4

Tén axta m'a Wesse' egegkok apchásenneykha apkelpaqhetchesa m'a appasmeykha axta chá'a aptamheykha apkeltamho elhaxyawássesek Josué xa apkelnaqta apkelpéseykmoho nak. Tén axta aptáha apcháneya s'e: “Elano, cháxa sekyenyókasa exchep aptémakxa mey'assáxma xa. ¡Wának sa' ko'o kaxwók kólántaxneyásekxak ma'a apáwa apkeltaqmalma apagko' nak!”