Isaías 51:3 - Biblia Enxet

³ Kapyóshok sa' ko'o alanok ma'a Sión, tegma apwányam apmopsagko nak apyókxoho. Namyep éltaqmalma sa' atnessásekxak ma'a ekyamáyekxa nak exma xapop yókxexma meykexa nak énxet, ektéma axta m'a Edén apkeneykekxexa axta aqsok ma'a Wesse' egegkok. Keytek sa' ekpayheykekxa egwáxok ma'a tén han negátseykha, tén han negmeneykmasso tén han negháxenmo m'a kélpáwasso ekmátsa.

Isaías 51:3 ပူးပေါင်းရင်းမြစ်များ

Génesis 13:10

Apkenmexawók axta Lot ekyókxoho ekyapwate nak wátsam Jordán, apwet'ak axta han ekyawa yegmen ekweykekxoho m'a yókxexma étkok nak Sóar, máxa axta m'a yókxexma ektaqmalmal'a. Hawók axta m'a ektémakxa axta Egipto. (Cháxa ektémakxa axta xa, amonye' axta apmassésseyam Wesse' egegkok ma'a tegma apkelyawe Sodoma tén han Gomorra.)

Salmos 85:8

Weyxhok sa' ko'o peya nak exének Wesse' egegkok; hakte exének sa' egkések meyke ektáhakxa apheykha m'a énxet'ák apagkok, cham'a ektáha nak chá'a melyenseyam apkelyetleykha, melánegkokxo enxoho makham apkeltémakxa élyeyháxma.

Isaías 12:1

Sa' kóltéhek kólpaqmétek kéxegke xa ekhem nak: “Wesse', ekméssek xép ekpayheykekxa ewáxok, hakte etaqnagkamchek axta eykhe ko'o exchep, massék eyke m'a aplo, egkeyásékxeyk makham meyke ektáhakxa ewáxok.

Isaías 25:9

Sa' katnehek kalpaqmetaxchek, cháxa ekhem nak: “Cháxa Dios egagkok xa, negáyo nak chá'a, nélhaxanma nak hẽlwagkasek teyp. Kalpayhekxa egwáxok, ólátsaha, ẽlwagkassek teyp ma'a.”

Isaías 35:6

máxa popyet sa' etnahagkok elnextegmakha néten ma'a énxet'ák élmasagcha'a nak chá'a apyókxa, elwehesha sa' ma'a énxet'ák meyke nak apkelpeywa. Katyapok sa' ekyawe agko' yegmen ma'a yókxexma meykexa nak énxet, ekyamáyekxa nak ma'a xapop.

Isaías 41:16

Yempaksek sa' tén sa' kalsók éxchahayam; segyettekhane ekyennaqte sa' kaxpánchesha. Keñe sa' xép kapayhekxak apwáxok xamók ma'a Wesse' egegkok, kaqheykha sa' apwáxok ma'a Dios Aptaqmalma nak Israel.

Isaías 43:19

Alának sa' ko'o kaxwók axnagkok aqsok, kaxwók sa' kólwetak katyapok. Alának sa' ko'o xama ámay ma'a yókxexma meykexa nak énxet, keñe sa' wátsam ma'a xapop megkatyapmakxa nak xama aqsok.

Isaías 44:26

Wánhok eyke chá'a ko'o katyapok aptáhakxa enxoho apkelpeywa m'a séláneykha nak, wánhok nahan kataqmelek chá'a ekteyapma aqsok apmáheyo elanagkok ma'a sélápháseykha nak chá'a. Ekxénchek ko'o peya exnekxak makham énxet ma'a Jerusalén tén han peya kóllánekxak makham ma'a tegma apkelyawe nak Judá. Wának sa' ko'o kólnaqxétekhasagkokxak makham ma'a appalleyam nak.

Isaías 49:13

¡Néten, kalpáxamha kapayhekxak awáxok! ¡Xapop, kayánchesho agko' ekpayheykekxa awáxok! ¡Meteymog élekhahéyak, kólpáxamha ekyennaqte kólessawasha! Hakte apkelpeykessásekxeyk makham apkelwáxok Wesse' egegkok ma'a énxet'ák apagkok, apkelásekhákxók makham ma'a apkellegeykegkoho nak ekyentaxno apkelwáxok.

Isaías 49:19

Apchókxa ekmaso axta exche' kéltemessáseykekxa, kélmassésseykmek axta, kélsawhomók axta aqsok ekhéyak ma'a kañe'; ketsék sa' eyke kaxwók katnehek ma'a xapop agkok yaqwayam sa' exmakha m'a énxet'ák agkok. Makhawók eyke kaxwók apkelmahágkok ma'a ektáha axta apketsagkasso.

Isaías 49:8

Aptáhak Wesse' egegkok se'e: “Wokmek yaqwánxa axekmósek seyásekhayo, eyátegmowágkokxeyk nahan; wokmek ekhem nélwagkásamáxchexa teyp, ekpasmeyk nahan. Ektaqmelchessegkek ko'o exchep yaqwayam sa' elánekxak makham ekhémo mók sélpaqhetchásamáxkoho m'a énxet'ák, yaqwayam sa' elánekxak makham ma'a apchókxa, tén han etnehek apagkok ma'a xapop kélsawhomo axta aqsok ekhéyak ma'a kañe',

Isaías 51:12

“Ko'o ahagko' sélwasqakkáseykekxoho chá'a kéxegke. ¿Yaqsa kéláya chá'a kéxegke? ¿Énxet ya? ¿Keya kélayeyk chá'a kéxegke m'a énxet'ák apkeletsapmo nak chá'a, aphémo nak pa'at?

Isaías 52:9

¡Kólwehesha ekyennaqte agko' kólátsaha, kélheykha nak Jerusalén tegma apwányam kéltawáseykha nak, hakte apkelásekhákxók Wesse' egegkok ma'a énxet'ák apagkok, apwagkassek teyp ma'a Jerusalén!

Isaías 61:10

¡Appeykásekxeyk ewáxok Wesse' egegkok! Awanhók agko' segkésso sélsawassamo m'a Dios ahagkok, hakte egkéssek ma'a nélwagkásamáxche teyp apagkok, ¡ewagkásawók ahagko' teyp! Máxa ektáhak ma'a ektémól'a énxet élyamhopma kélatchessessól'a apqátek ma'a apkelháxaqxo ektaqmalma, ektémól'a m'a xama kelán'a ekmáheyól'a kalyamhápok kélnáxegkáseykhal'a kólnatmeyásekxak ma'a élnatanma éltaqmalma.

Isaías 65:18

Kólessawaksoho kélagko', kalpeykesekxoho agko' kélwáxok meyke néxa m'a sekmako nak alána', hakte alának sa' ko'o Jerusalén ekmátsa agko' tén han énxet élpayheykekxa apkelwáxok apheykha m'a kañe'.

Jeremías 31:25

Hakte alagkok sa' ko'o aptéyak tén han apyenéyak ekyawe agko' yegmen ma'a apkelyampayo nak, tén han meyke nak apkelyennaqte.”

Ezequiel 28:13

Aphegkek axta m'a Edén, Dios yókxexma éltaqmalma apagkok nak, kélnáxegkáseykha axta m'a mók ektémakxa nak chá'a meteymog éltaqmalma: cham'a meteymog ekyexwasél'a, tén han ma'a yáma ekyátekto ekyepetchél'a yáma hó pa'at, tén han ma'a ekyennaqtél'a hó pa'at, tén han ma'a ekyátektól'a, tén han ma'a ekmopél'a élyenma, tén han ma'a éltaqmalmal'a ektáxama élmakteykha, tén han ma'a ekyápaqmatél'a, tén han ma'a ekyexwase agko' la'a, tén han ma'a hó pa'at la'a; sawo ekyátekto élmomnáwa axta m'a aqsok étkók éltaqmalma apagkok tén han ma'a apkelchenméhe nak, kéllánesso axta m'a sekxók axta apkelánamákpo.

Ezequiel 36:11

Wának sa' ko'o exámekxak kélnepyeseksa m'a énxet tén han ma'a aqsok kélnaqtósso, exámagkohok apagko' sa'. Exnágwakxohok sa' makham apxámokma énxet ma'a apweykenxa axta apxámokma m'a sekxók axta, keñe sa' kéxegke, tásek sa' katnehek kélheykha, megkaxók sa' ma'a ektémakxa axta m'a nentámen axta. Keñe sa' kólya'ásegwók ko'o sektáha Wesse'.

Ezequiel 36:35

Tén sa' etnehek chá'a elpaqmétek se'e: Keso xapop ektamheykekxa axta ekyamayéxma meyke xama aqsok se'e, keñe kaxwók ekhágweykxoho m'a yókxexma Edén; tegma apkelyennaqte nahan kaxwók aptamhágkok ma'a tegma apkelyawe kélnaqtawáseykha axta, tén han kélpalchesso axta tén han kéltemessáseykekxo axta aphopák, apháha nahan kaxwók énxet ma'a kañe'.

Joel 2:3

Máxa m'a táxa eksawhomól'a kalwatnek ekyókxoho aqsok élwatnamól'a amonye' ekyeykhe; keñe ekwatneykekxohol'a ekyeyk'a enxoho. Yókxexma ektaqmalma axta sekxók megkawánxa táxa, keñe ekyeyk'a ektamhákxo m'a ektémól'a yókxexma meykexa énxet. ¡Méko xama aqsok enxoho apcháyam!