Isaías 51:11 - Biblia Enxet

¹¹ Sa' etnahagkok han elwaták ma'a apkelwagkasso nak teyp ma'a Wesse' egegkok, elántexek sa' Sión yetlo apkelwehéseykha élpayheykekxa apkelwáxok; katnahagkok sa' chá'a élátseykha nápaqta'a; elwetak sa' élpayheykekxa apkelwáxok tén han apkeleñémo, kamassegwók sa' ma'a ektémakxa nak apkellekxagweykha tén han apkellegeykegkoho ekmáske.

Isaías 51:11 ပူးပေါင်းရင်းမြစ်များ

Salmos 126:2

Néllektegmeykha egagko' axta, nélwóncháseykha axta élpayheykekxo egwáxok; keñe axta melya'áseyak nak Dios aptáha apkelpaqmeta s'e: “¡Apkelánessek ekyawe agko' aqsok Wesse' apagkok xa énxet'ák nak!”

Salmos 126:5

Énxet apkeneykekxa nak aqsok yetlo apaqtek égmenek, enakxek sa' aqsok ekyexna yetlo apwóncháseykha ekpayheykekxa apwáxok.

Isaías 11:15

Emeykessesek sa' xama ámay Wesse' egegkok ma'a neyseksa Wátsam Ekwányam Ekyexwase nak, ey'aksek sa' apmek ma'a ekpayho nak wátsam Éufrates, etekkesek sa' éxchahayam ekyennaqte agko', kameykásekxak sa' neyseksa, siete aktegák sa' kalána', keñe sa' apwanchek elyeykhekxak meyke apkelhaxyawasso apkeltéto apmagkok.

Isaías 25:8

Emasséssamhok apagko' sa' Wesse' egegkok ma'a nétsapma, elhaxyawássesagkok sa' apaqtek égmen'ák apyókxoho énxet'ák, yának sa' kamassegwók apkelmegqásamáp énxet'ák apagkok ekyókxoho keso náxop. Wesse' egegkok apxeyenma xa.

Isaías 35:10

apkelmeykekxa nak neyseksa aqsok ekmaso m'a Wesse' egegkok; elántexek sa' Sión yetlo apkelmeneykmasso élpayheykekxa apkelwáxok, katnahagkok sa' chá'a élpayheykekxa apkelwáxok neyseksa apheykha. Elwetak sa' élpayheykekxa apkelwáxok tén han apkelátseykha, kamassegwók sa' ma'a apkellekxagweykha tén han éllapwáméyak.

Isaías 44:23

¡Néten, kalpáxamha kátsaha kalanok ma'a apteméssesakxa nak Wesse' egegkok! ¡Kólwehesha, máxek élmattawóneg agko' nak keso náxop! ¡Meteymog élekhahéyak, kólpáxamha ekwányam agko' kólátsaha, tén han ma'a naxma yetlo m'a ekyókxoho yenta'a élyawe agkok nak, hakte apxekmóssek apcheymákpoho Wesse' egegkok apwagkasa teyp ma'a Israel, cham'a Jacob!

Isaías 48:20

Kólántép Babilonia, kólxegánem nepyeseksa m'a énxet'ák caldeos. Kóllegés yetlo kélpáxameykha kélátseykha s'e amya'a nak, kólya'assásegwók ekweykmoho m'a néxa xapop nak. Kólteme kólpaqmétek se'e: “¡Apwagkassek teyp Wesse' egegkok ma'a Jacob cham'a apkeláneykha nak!”

Isaías 49:13

¡Néten, kalpáxamha kapayhekxak awáxok! ¡Xapop, kayánchesho agko' ekpayheykekxa awáxok! ¡Meteymog élekhahéyak, kólpáxamha ekyennaqte kólessawasha! Hakte apkelpeykessásekxeyk makham apkelwáxok Wesse' egegkok ma'a énxet'ák apagkok, apkelásekhákxók makham ma'a apkellegeykegkoho nak ekyentaxno apkelwáxok.

Isaías 55:12

“Kólántépok sa' kéxegke yetlo ekpayheykekxa kélwáxok ma'a, kólmeyekxak sa' makham kélókxa yetlo meyke ektáhakxa kélwáxok. Kelwet'ak sa' agkok ma'a meteymog élekhahéyak nak tén han ma'a egkexe nak, megkaleysagkók sa' kalmeneykmaksek kalpayhekxak awáxok, kaltekpagmakha sa' amék ekyókxoho m'a yenta'a élyawe élaqnéyak nak yókxexma.

Isaías 61:7

Kayeykhágwomhok sa' apkelxawéyak ekxámokma aqsok apkelókxa m'a énxet'ák ahagkok, hakte yeykhágweykmók axta apkellegeykegkoho apkelmegqakto tén han kélwanyeykha, megkamassegwomek sa' élpayheykekxa apkelwáxok.

Isaías 65:14

elmeneykmaksek sa' yetlo élpayheykekxa apkelwáxok eñama ekmátsa apkelwáxok ma'a, keñe sa' kéxegke kalpayheykha kélatña'ák, kóllekxagwaha sa' nahan eñama éllapwáméyak tén han ekyentaxnamo kélwáxok.

Isaías 65:19

Ko'o sa' nahan kapayhekxak ewáxok alanok ma'a Jerusalén, atsek sa' ewáxok alanok ma'a énxet'ák ahagkok. Kamaskok sa' kañexchek kéllekxagweykha m'a kañe' nak tén han ekpayheykha kélátog eñama ekyentaxno apkelwáxok énxet.

Jeremías 31:13

Kaneywagkok sa' yetlo élpayheykekxa awáxok kelán'a étkók, tén han wokma'ák, ekweykekxoho apkelwányamo nak. Altaqmelchessásekxak sa' awáxok: élpayheykekxa awáxok sa' ayaqmagkassesek ma'a éllekxagweykha, ayeykhássessamhok sa' ko'o sekmésso élpayheykekxa awáxok, megkaxók sa' ma'a ekweykenxa nak éllekxagweykha.

Jeremías 33:11

kélmeneykmasso kélessawássessamo, tén han ekpayheykekxa egwáxok, tén han kélmeneykmássesso nak élyamhopma. Kañexchek sa' makham katnehek se'e: Kólmés ekxeyenma kélwáxok Wesse' ekha nak apyennaqte, hakte Wesse' egegkok apteme ektaqmalma apwáxok, megkamassegwomek chá'a segásekhayo. Elsanták sa' aqsok apkelmésso naqsa m'a tegma appagkanamap apkelmésso nak chá'a élxeyenma apkelwáxok. Naqso', ayaqmagkassesek sa' ko'o mók ektémakxa s'e apchókxa nak, yaqwayam sa' katnekxak makham ma'a ektémakxa axta nano'. Ko'o sekxeyenma xa, sektáha nak Wesse'.”