Isaías 5:2 - Biblia Enxet

² Appeyncheykmek axta xapop, apkelhaxyawassegkek axta nahan meteymog apcháxñessama, keñe apkeneykekxo m'a anmen yámet axchakkok éltaqmalma agko' nak. Apxátekhassegkek axta nahan xama tegma apwenaqte netnók ma'a neyseksa nak apkeneykekxexa, apkeláneyak axta nahan ma'a apkelyaqhapmakxa anmen yámet ekyexna. Apkelhaxanmeyk axta nahan keyxek anmen yámet ekmátsa nak ekyexna m'a émók nak, keñe ekyexnama m'a anmen yámet ekmáske nak ekyexna.

Isaías 5:2 ပူးပေါင်းရင်းမြစ်များ

2 Samuel 7:10

Élánéssegkek axta han ko'o xama yókxexma yaqweykenxa exmakha m'a énxet'ák ahagkok Israel, ekheyáseykha axta ko'o m'a yaqwayam enxoho etnehek apagkok apagko', meyke enxoho yaqwánxa chá'a kalya'asha exma, meykexa enxoho yaqwayam enaqtawasagkohok ma'a énxet'ák élmasagcha'a nak apkeltémakxa, ekhawo apteméssessamakxa axta chá'a m'a sekxók axta,

Nehemías 13:15

Ekweteyak han ko'o énxet'ák Judá apkelteyáyam chá'a anmen yámet ekyexna sábado yaqwayam elának vino xa ekhem nak, tén han apkelseykekxo chá'a hótáhap apaktek kéltéteykekxa', tén han apkelpátegkesso chá'a yámelyeheykok vino, tén han anmen yámet ekyexna, tén han higo ekyexna, tén han ma'a mók ektémakxa nak chá'a apkelseykha, ekweteyak han chá'a apkelseykekxo sábado aqsok ma'a Jerusalén. Keñe axta ko'o sélpaqhetchesa ekyennaqte eñama apkexeykekxa aqsok xa ekhem nak.

Salmos 80:8

Egipto axta keñamak apleklo anmen yámet; apkelántekkessegkek axta m'a melpeykessamo nak chá'a exchep, tén axta apkeneykekxo m'a apheykegkaxa axta.

Salmos 80:9

Apchaxñássessegkek axta yaqweykenxa etnekxa', tén axta anmen yámet élatchesa kepmenák xapop, sawheykekxók axta apchókxa.

Éxodo 33:16

Hakte agkok xeyep hẽlyetláwak, ¿háxko katnehek kólya'asagkohok ekyetnama exchep apkelásekhayo énxet'ák apagkok tén han ko'o xa? Hakte cháxa wánxa kélwanchek kólyekpelkohok énxet'ák apagkok tén han ko'o xa maghémo nepyeseksa m'a apyókxoho énxet'ák nak keso náxop.

Isaías 1:8

Sión aqsa kéméxche', máxa kélpakxanmal'a entemék ekyetnama axakkók ma'a neyseksa nak anmen yámet kélcheneykekxa, máxa tegma kélpakxanmal'a aqsa néten meyke kóneg entemék ekyetnama axakkók ma'a nepyeseksa nak yánsamáne kélcheneykekxa, máxa tegma apwányam apwakhél'a apkelenmexma entemék ekyetnama axakko'.

Isaías 5:7

Israel apchókxa m'a apkeneykekxexa nak anmen yámet apagkok ma'a Wesse' ekha nak apyennaqte tén han ma'a Judá, cham'a apkeneykekxa apmopmenyého apagko' nak. Apkelhaxanmeyk axta katnehek kélyeheykekxoho segánamakxa apagkok Wesse' egegkok ma'a, wánxa axta eyke aqsa apweteya chá'a ekyetnama m'a nentekyawa; apkelhaxanmeyk axta katnehek ma'a ekpéwomo nak nentémakxa, wánxa axta eyke aqsa aplegaya chá'a m'a ekpayheykha nak egátog nenlegeykegkoho ekmáske.

Jeremías 11:17

Apkeltamhók kéxegke káhapwak aqsok ekmaso m'a Wesse' ekha nak apyennaqte ektáha axta apkelheyáseykha s'e xapop nak, eñama aqsok ekmaso apkeláneyak ma'a énxet'ák Israel, tén han ma'a Judá, hakte aplókassegkek apkelméssama chá'a aqsok ánek ekmátsa nak ekpaqneyam éten agkok ma'a Baal.

Jeremías 2:21

Máxa anmen yámet éltaqmalma axta ko'o ekteméssessók kéxegke séneykekxo, ektémól'a m'a anmen yámet aktek éltaqmalmal'a. ¡Kélesógweykmók kélagko' axta eyke kéxegke, massegkek axta ko'o sélyekpelche!

Oseas 10:1

Aphawók Israel ma'a anmen yámet ekxámokmal'a ekyexna, xámagkek agkok ma'a ekyexna nak, kaxámagkok han chá'a apkeláneyak ma'a élwatnamáxchexa nak aqsok, yágwokmók agkok chá'a ektaqmalma m'a xapop apagkok nak, kayágwomhok han chá'a aptaqmelchessamo apkeláneyak ma'a meteymog élpagkanamaxche nak.

Miqueas 4:8

Keñe sa' xép, tegma apwányam Jerusalén, tegma apwenaqte tén han apyennaqte nak Sión, xép sa' etnekxak makham tegma apwányam apagkok ma'a apchókxa, ekhawo aptémakxa axta chá'a m'a nanók axta, apheykegkaxa axta apkelwesse'e apkelwányam.”

Números 23:9

Ekwet'ak ko'o neyseksa sénmeykha s'e netnók meteymog ekwenaqte nak, élanawók neyseksa sénmeykha s'e néten egkexe étseksek nak: apteme énxet'ák apheykha apxakcha'awo', megkólpáxaqtésso m'a pók énxet'ák nak.

Deuteronomio 32:6

¿keyaxa kélyaqmagkásekxo mók apteméssessamakxa Wesse' egegkok kéltéma xa ektáha nak? Énxet'ák élyeyhaxma meyke nak kélya'áseyak aqsok, ¿háweya kélyáp kéxegke m'a? ¿Háweya apkelane? ¡Axta apkelane kéxegke m'a tén han apmésso kélyennaqte!

Jueces 16:4

Tén axta Sansón apkeláneya makham xama kelán'a ekwesey axta Dalila, ekhama axta m'a ekyapwátegweykenxa nak xóp ma'a Sorec.