Isaías 45:21 - Biblia Enxet

²¹ Kólpaqmet, kólxén aqsok kélwete, kólteme chá'a kólmaxneyha kélmók kélmako enxoho chá'a kólmaxneyha s'e: ¿Yaqsa axta éltenneykha sekxók eyeynamókxa axta xa aqsok nak? ¿Yaqsa axta eklegasso m'a nanók axta? ¿Háweya axta ko'o, sektáha nak Wesse'? Méko pók Dios. Ko'o sekwánxa ahagkok sekteme Dios sélmallahanchesso aqsok ekmaso énxet'ák ahagkok, tén han sélwagkasso teyp.

Isaías 45:21 ပူးပေါင်းရင်းမြစ်များ

Salmos 26:7

tén sa' anneykmaksek alpeykesho', axének sa' ma'a ektémakxa nak chá'a apkelane aqsok éltaqmalma.

Salmos 83:18

¡Elya'asagkohok sa' xép apteme wánxa Wesse' egegkok, tén han apteme wánxa Dios Meyke Ekhémo ekyókxoho keso náxop!

Salmos 96:10

Kólteme sa' kólának pók aptémakxa énxet'ák se'e: “¡Wesse' egegkok apteme Wesse' apwányam!” Apyennaqtéssamók axta appekkenma nélwanmeygkaxa, yaqwayam enxoho megkayawheykha; aphéssamók han mók apkeltaqmelchesso m'a énxet'ák.

Isaías 19:20

Katnehek sa' aqsok magkenatchesso, yaqwayam sa' kaxénwakxohok chá'a kélwáxok Wesse' ekha nak apyennaqte m'a apchókxa Egipto. Apkelwóneyha sa' agkok chá'a Wesse' egegkok yának epasmok eñama apkelápagqánamap ma'a ektáha nak chá'a apnaqtawáseykegkoho, yáphássesek sa' chá'a xama appasmo, yaqwayam sa' elmeyók chá'a tén han elwagkasek chá'a teyp.

Isaías 41:26

¿Yaqsa axta eklegassama sekxók eyeynókxa axta xa yaqwayam enxoho agya'asagkoho'? ¿Yaqsa axta éltenneykencha'a sekxók axta, yaqwayam enxoho anxének ekpayhawo ektémakxa? Méko kélxama kéxegke kélxeyenma xa, méko eklegaya xama enxoho kélpeywa.

Isaías 43:11

Ko'o aqsa exakkók sekteme Wesse'; méko pók apmopwána enxoho elwagkasek teyp énxet.”

Isaías 43:3

Hakte ko'o sekteme Wesse' apagkok, apwagkasso teyp, Dios Sektaqmalma nak ma'a Israel. Ekmomchek axta ko'o exchep; ekyánmagkassegkek axta ekyaqmageykekxa exchep ma'a Egipto, Etiopía tén han Sabá,

Isaías 43:9

Énxet'ák, kólaqnekxa kélyókxoho, kólyepetchekxa kélmók pók aptémakxa nak chá'a énxet'ák ¿Yaqsa axta xama nepyeseksa xa énxet'ák nak apkeltenneykencha'a chá'a s'e aqsok nak? ¿Yaqsa axta xama aplegassama chá'a m'a ektémakxa axta nentámen? Kólyentementa sa' ektáha apweteykegkoho yaqwayam sa' exének ektáha naqso', yaqwayam sa' kahaxnaxkoho' keñe sa' kaxénaxchek ektáha naqso'.”

Isaías 45:14

Aptáhak apcháneya Wesse' egegkok Israel se'e: “Elyelqakpok sa' aqsa nápaqtók xép ma'a énxet'ák Egipto apkeltamheykha nak chá'a yókxexma, tén han ma'a énxet'ák ekha nak chá'a aqsok apkexeykekxa m'a Etiopía, tén han ma'a énxet'ák Sabá, cham'a énxet'ák apkelwenaqte nak, apkelásenneykha naqsa sa' etnehek; elxog sa' neptámen xép yetlo kélpextete cadenas, eltekxeyagkok sa' aptapnák xóp apmonye' exchep tén sa' etnehek yának se'e: ‘Naqsók apha kélnepyeseksa kéxegke Dios, méko pók, méko pók kéláyókxa.’”

Isaías 45:18

Aptáhak appeywa ektáha axta apkelane néten se'e, cham'a apteme nak Dios, tén han Wesse' egegkok, apkelane axta xapop tén han aptekkesso axta, ektáha axta appekkenma, apkeláneya axta háwe yaqwayam keytek aqsa meyke aqsok ma'a kañe' yaqwayam exek nahan énxet ma'a: “Ko'o sekteme Wesse', méko pók.

Isaías 45:25

Ko'o sa' kañék elmallánek apyókxoho m'a énxet'ák Israel, kaqheykha sa' apkelwáxok hélanok ko'o.”

Isaías 45:5

Ko'o sekteme Wesse', méko pók; méko pók Dios mók nekha. Eltáméssegkek axta ko'o exchep yaqwayam elnapakpok neyseksa mehey'áseyak,

Isaías 48:14

Kólaqnekxa sa' kélyókxoho kéxegke, kóleyxho sa' nahan: ¿Yaqsa axta kélxama kéxegke aplegassama ekmáheyo katnehek xa: apmáheyo etnéssesek ekxeyenmakxa nak ko'o ewáxok atnéssesek Babilonia m'a énxet ektáha axta ko'o sélyéseykha tén han ma'a énxet'ák caldeos?

Isaías 48:3

Eklegassegkek axta ko'o kéxegke sekxók eyeynókxa axta m'a aqsok nentámen axta; ko'o ahagko' axta nahan sélya'assásegwayam. Pelakkassek axta nahan sélana, naqsók axta nahan táhak élántepa.

Isaías 60:16

Elmések sa' nento élmátsa agko' ma'a pók aptémakxa nak chá'a énxet'ák, elsókásegmak sa' aqsok apagkok ekxámokma élmomnáwa m'a kelwesse'e apkelwányam nak; elya'ásegwók sa' sektáha ko'o sélwagkasso teyp, ko'o sektáha nak Wesse', tén han sektáha sélmallahanchesso aqsok ekmaso, ko'o ekha nak Sekyennaqte Jacob Wesse' apagkok.

Isaías 63:1

—¿Yaqsa xa ekxegakmo nak eñama Bosrá, apyawakxa nak tegma agkok ma'a Edom, apkelyexwase nak apkelnaqta, apxegakmo nak apkeltaqmalma apagko' apkelnaqta, apyennaqtésakmo apagko' nak apyempehek apxegakmo? Ko'o xa, sekxeyenmo nak chá'a negmallanma, émeyhek han ko'o yaqwayam alwagkasek teyp.

Jeremías 50:2

“Kóllegés sa' se'e, kólya'assásegwom sa' nepyeseksa apyókxoho énxet'ák. Kóllegés sa' yaqwayam kólya'asagkoho'; nágkólpós xama enxoho. Kólteme sa' se'e: ‘¡Apteyekmek Babilonia! ¡Aqsok eyesmésamaxche tamhákxak ma'a dios Bel, megkay'ásegkok ektáhakxa élmenaye m'a dios Marduc! ¡Aqsok élasmésamaxche tamhákxak ma'a aqsok kéleykmássesso apagkok, tén han ma'a aqsok apkeláyókxa élmowancha'a amya'a nak, kelmenakawók agko'!’

Oseas 13:4

Aptáhak Wesse' egegkok se'e: “Ko'o Wesse', ko'o Dios apagkok eyeynamo m'a aphamakxa axta Egipto: Ná etne aqsa Dios apagkok mók aqsok enxoho, ko'o sa' aqsa, ko'o sekwánxa ahagkok sekwagkasso teyp xép.

Sofonías 3:17

Apheyk kélnepyeseksa kéxegke m'a Dios Wesse' kélagkok; ¡apmeyhek nahan ma'a, elwagkasek sa' teyp! Kapayhekxak sa' apwáxok elanok kéxegke m'a Wesse' egegkok. Egkeyásekxak sa' axnagkok kélyennaqte eñama apkelásekhayo; enneykmaksek sa' eñama kélpeykessáseykekxa apwáxok

Sofonías 3:5

Aphegkek eyke Wesse' egegkok ma'a tegma apwányam nak; apkeláneyak chá'a aqsok ektaqmela m'a, melaneyk chá'a m'a aqsok ekmaso nak. Yókxoho axto'ók chá'a yának kalanaxchek ma'a aqsok ekpéwomo, meyke kélyeykhasso. Keñe m'a ekmaso nak aptémakxa mey'ásegweykmok ektémakxa m'a negmegqakto.

Zacarías 14:7

Katnehek sa' xama ekhem, wánxa apya'áseykegkoho m'a Dios. Magyekpelchek sa' ekhem tén axta'a, hakte axta'a sa' eykhe chá'a katnehek, kalsáwhok sa' eyke aqsa chá'a exma.

Zacarías 14:9

Cháxa ekhem yaqwánxa sa' etnehek Wesse' apwányam Wesse' egegkok ekyókxoho keso náxop. Wánxa sa' nahan xama etnehek ma'a Wesse' egegkok, xama sa' nahan katnehek ma'a apwesey.

Zacarías 9:9

¡Kapayhekxoho agko' apwáxok xép, tegma apwányam Sión! ¡Enneykmés kapayhekxak apwáxok, xép tegma apwányam Jerusalén! Apya'aweykteyk xép, Wesse' apwányam apagkok Wesse' appéwomo, tén han segwagkassamo teyp, háwe eyke eyeymáxkoho apwáxok, yámelyeheykok apchánte, yámelyeheykok étkok.