Isaías 43:2 - Biblia Enxet

² Peyk sa' agkok eyeykhekxak neyseksa yegmen, ko'o sa' atnehek sekxegexma, peyk sa' agkok eyeykhekxak neyseksa wátsam, meweywagkek sa'; peyk sa' agkok exog neyseksa táxa, memyetek sa', megkawatnek sa' xép ma'a táxa eyáléwe nak.

Isaías 43:2 ပူးပေါင်းရင်းမြစ်များ

Job 5:19

Megkatnégwomek sa' nahan néxa apmallahanchesso chá'a neyseksa aqsok ekmaso, megyohok sa' káhapwak ma'a aqsok ekmaso nak.

Salmos 23:4

Ekxegkek agkok ekyáqtésakxa exma m'a ekyapwátegweykenxa nak xapop, magwakyek xama enxoho aqsok ekmaso, hakte sekxegexma ko'o exchep Wesse'; hegkések chá'a meyke ektamheykha ewáxok ma'a aptasqapeykha nak, apmeykencha'awól'a chá'a eltaqmelchesek nepkések.

Salmos 32:6

Cháxa keñamak peya nak chá'a ewónmakha exchep ekwa'a enxoho chá'a ekmaso apheykha m'a melyenyaweykha nak chá'a exchep, katyapok sa' eykhe m'a yegmen ekmattawóneg nak, megkammók sa' eyke m'a apheykegkaxa nak.

Salmos 66:10

Dios egagkok, apkelányok negko'o exchep nentémakxa yaqwayam ékpelkoho', ¡ẽláxñáseykekxe', máxa enteméssessók ma'a kéltémól'a sawo ekmope kólaxñásekxa'!

Salmos 66:12

Apchahayók han sẽlteyammeykencha'a m'a sẽlenmexma nak; nélmalláneykekxeyk chá'a negko'o m'a yegmen, tén han táxa, ẽlwagkassa'ak eyke yaqwánxa óllókasek nélyampe.

Salmos 91:15

Ewóneyha sa' agkok chá'a, wátegmowagkok sa'; ¡ko'o ahagko' sa' han axek xamók ma'a! Amallahanchesek sa' ekyentaxno apha, ayánchesseshok sa' sekmésso apteme ekha kéláyo;

Éxodo 14:29

Keñe axta m'a israelitas apkelyeykhákxo aqsa xapop agko' ma'a neyseksa nak wátsam ekwányam, cham'a neyseksa nak ekmayheykekxa m'a ánet nekhaw'ék yegmen, xama axta m'a nélya'assamakxa nak tén axta nahan mók ma'a nensagqalwa nak.

Éxodo 3:12

Tén axta aptáha apchátegmowágkokxo Dios se'e: —Ko'o sa' atnehek sekxegexma exchep. Sa' katnehek magkenatchesso ektáha ko'o exchep seyáphasso apkelántekkesa sa' Egipto m'a énxet'ák ahagkok. Kélyókxoho sa' hélpeykeshok ko'o s'e néten egkexe nak.

Isaías 30:27

Kólenmexho hana makhawo nak, apyókxoho apagko' apxegakmok Wesse' egegkok; aplókók apagko', máxa éten ekyentaxno ekpánmal'a entáhak aplo, negyekpelchawók aplawa m'a apátog nak, máxa táxa, ekmassesseykmohol'a aqsok entáhak ma'a apaxkok nak,

Isaías 41:10

Nágyé aqsa, ekheyk ko'o xamók xép; nágkatneykha aqsa apwáxok, ko'o sekteme Dios apagkok. Agkések sa' ko'o exchep apyennaqte, apasmok sa' nahan, amagkok sa' ko'o exchep apmek ma'a émek ekmallahanmo nak chá'a kempakhakma.

Isaías 41:14

Aptáhak Wesse' egegkok se'e: “Énxet'ák Israel, kélketcheyetsék eykhe kéxegke, nágkóle'; Jacob énxet'ák apagkok, kélyelqáxkók eykhe kéxegke, apasmok sa'. Ko'o sekteme sélmallanchesso chá'a ekyentaxno kélheykha, ko'o sektáha nak Dios sektaqmalma m'a Israel.

Isaías 43:5

Nágye' aqsa, ekheyk ko'o xamók xép. Wának sa' ko'o elchexyók énxet'ák apagkok yaqwayam ewakhegwata', sa' elenyenták ma'a teyapmakxa ekhem nak tén han ma'a taxnegwánxa ekhem.

Jeremías 42:11

Nágkóle aqsa m'a wesse' apwányam Babilonia, kéláya kélagko' nak chá'a kéxegke. Nágkóle', hakte ekheyk ko'o xamók kéxegke yaqwayam alwagkasek teyp tén han almallahanchesek neyseksa apmáheyo elmok. Ko'o sekxeyenma xa, sektáha nak Wesse'.

Jeremías 46:28

Ektáhak ko'o sekpeywa s'e, sektáha nak Wesse': Jacob énxet'ák apagkok, apteme nak séláneykha, nágkóle, hakte ekheyk ko'o xamók kéxegke. Amasséssók sa' ko'o ekyókxoho apkelókxa, cham'a sélya'assamakxa axta chá'a ko'o kéxegke séxpánchessama. Keñe sa' kéxegke mamassésseme'; allegássesagkohok sa' aqsa ekpayhawo nak atnéssesek séllegassáseykegkoho: megkatnehek sa' mallegassáseykegkoho kéxegke.”

Daniel 3:23

appalleynteyk axta yetlo kélpextete kañe' táxa axagkok ma'a Sadrac, Mesac tén han Abed-negó.

Hageo 1:13

Tén axta Hageo apteme axta Wesse' egegkok apchásenneykha, apkeltennasa m'a aptáhakxa axta appeywa Dios. Axta aptáhak apkeláneya s'e: “Aptáhak Wesse' egegkok se'e: ‘Ekheyk ko'o kélnepyeseksa kéxegke, ko'o sekxeyenma xa sektáha nak Wesse'.’”

Malaquías 4:1

Aptáhak Wesse' egegkok ekha apyennaqte s'e: “Chágketwa'ak ekhem, ekmexanma ektémól'a táxa axagkok, yaqwánxa sa' elmétek apyókxoho m'a éleymáxkoho nak apkelwáxok ektémól'a kalmétek ma'a pa'at apák eyáléweykhal'a ekyawe. Elmétek sa' ekwa'a enxoho xa ekhem nak, Cháxa ekhem peya nak kawa', megyeymakpek sa' xama enxoho.

Josué 1:5

Méko sa' kaxhok ekwánxa nak xép apyennaqte neyseksók apha makham se'e náxop, hakte ko'o sa' atnehek sekxegexma ekhawo sekteméssessamakxa axta m'a Moisés, meyke sekyenyaweykha, mayenseykmok han xama ekhem enxoho.

Josué 1:9

Ko'o neykhe sektáha sekmésso yaqwayam ewasqápekxoho tén han énnaqtéshok apwáxok. Nágye aqsa hakte ko'o sektáha xeyep Wesse' apagkok, keñe han Dios apagkok. Atnehek sa' sekxegexma apmakókxa enxoho chá'a emhagkok.”