Isaías 40:15 - Biblia Enxet

¹⁵ Máxa xama eksekkenmal'a yegmen entemék apkelányo énxet'ák ma'a Dios, ektémól'a m'a xóp ánek ekheykegkokxal'a m'a kañe' kelyetsátéyak; hawók apkelányo yagkamex keyetsék la'a m'a apkelókxa egkexe étkók ekhéyak nak neyseksa wátsam ekwányam.

Isaías 40:15 ပူးပေါင်းရင်းမြစ်များ

Génesis 10:5

Cháxa Jafet axta aptawán'ák neptámen xa, apheykencha'a axta neyáwa wátsam ekwányam. Apagkok apagko' axta han chá'a xapop, ektáhakxa nak chá'a apnámakkok apancha'awo', apkelpeywa apancha'awo' axta han chá'a xama apheykegkaxa'.

Salmos 62:10

Nágkólásenneykxa m'a negyennaqteyáseykha nak egyempehek, ¡nágkaxénmakha kélwáxok kapasmok ma'a aqsok élmenyexamaxche'! Kéltemék sa' agkok ekxámokma aqsok kélagkok, nágkólásenneykxa m'a selyaqye kélagkok nak.

Salmos 62:9

Aphawók énxet ma'a xama negwátekhapma ekmanyehel'a kamaskok, cham'a énxet meyke nak aqsok apagkok, tén han ma'a ekxámokma nak aqsok apagkok; kélyetsátegkek agkok xama kelyetsáteyák xa apyókxoho nak, exhok pók apkelexyawe.

Isaías 11:11

Exekmósek sa' makham apmopwána Wesse' egegkok apmako sa' enaqlanták makham énxet'ák apagkok apkeleymomap xa ekhem nak, apnaqlósawákxo sa' makham ma'a Asiria, Egipto, Patros, Etiopía, Elam, Sinar, Hamat tén han ma'a apkelókxa ekhéyak nak neyáwa wátsam ekwányam.

Isaías 17:13

Xama axta apkelpaqhetchesa ekyennaqte agko' ma'a Dios, makhawók axta apkelmahágkok apkelyexanma, axta aptamhágkok ma'a ektémól'a pa'at kalsók éxchahayam ma'a yókxexma, ektémól'a am'ák kalpexyawasagkok náxop kalsók ma'a éxchahayam ekyennaqte agko'.

Isaías 2:22

Kólwátésák kélteme kéláyo énxet, apteme nak mékoho, yaqwatakxoho negwete m'a ektémakxa nak apyennaqte énxet, ñohók kamaskok.

Isaías 29:5

Katlakkasek sa' eyke aqsa ellegássesagkohok ekmanyehe agko' Wesse' ekha nak apyennaqte m'a apkelenmexma nak, yetlo takha' aplo, xóp ekyawheykha, tén han éxtegyawà ekyennaqte, éxchahayam ekyennaqte, tén han yaphope néten ekmaso yetlo eyáléwe ekmassesseykmohol'a aqsok. Xapop ánek agko' sa' etnekxak ma'a apkelenmexma apxámokma nak, máxa pa'at apák élchampe sa' kólteméssesek ma'a apyaqmáseykha apxámokma nak.

Isaías 40:22

Aphegkek Dios ma'a teyp yaphope eyapma nak keso náxop, máxa séta nahan aptemék apkeláneykencha'a m'a énxet'ák. Máxa kélpakxanma aptemék appeykessama yaphope m'a néten, máxa kélpakxanma aptemék appeykessama, negmowánal'a anxek ma'a kóneg.

Isaías 41:5

Apkelweteyak axta m'a énxet'ák apheykha nak neyáwa wátsam ekwányam, apkeláyók apagko' axta nahan; apkelyegwaktegkek axta énxet'ák ekyókxoho apheykegkaxa ekweykekxoho m'a mók néxa xapop nak. Apchágketchessa'ak kaxwo', apkelxegakme'.”

Isaías 59:18

Egkések sa' chá'a Wesse' egegkok xama m'a ekpayhawo nak chá'a egkések; ellegássesagkohok sa' ma'a apkelenmexma nak. Egkések sa' chá'a ekpayhawo nak chá'a egkések ma'a aptaqnagko nak chá'a; kawakxohok sa' nahan ma'a apheykha nak apkelókxa neyáwa wátsam ekwányam.

Isaías 66:19

Agkések sa' ko'o xama aqsok magkenatchesso. Wohok sa' elxeganmok nápakha keñe sa' aláphaksek ma'a apheykegkaxa nak chá'a pók aptémakxa énxet'ák: cham'a Tarsis, Libia tén han ma'a Lidia, apkelókxa, apmopwancha'a nak elmaha m'a yágke, tén han ma'a Tubal, Grecia tén han ma'a apkelókxa makhawók agko' nak, neyáwa nak ma'a wátsam ekwányam, cham'a, mellegaya nak ko'o makham axénaxche', melweteya nak makham ma'a seyeymáxkoho; Sa' ellegaksek nepyeseksa pók aptémakxa énxet'ák seyeymáxkoho m'a.

Jeremías 10:10

Wesse' egegkok apteme Dios apmámnaqsoho, Dios megyetsapma, Wesse' apwányam memassegwayam. Aplókek agkok ma'a, kayawheykha chá'a xapop; mopwanchek elenmaxakpohok aplo m'a pók aptémakxa énxet'ák.

Daniel 11:18

Keñe sa' ektamagkok han ma'a tegma apkelyawe aphéyak nak neyáwa wátsam ekwányam, elmok sa' han apxámokma m'a; xama sẽlpextétamo wesse' sa' eyke emasséssók xa ektémakxa nak megkannawagko, emegqaksek sa' ma'a wesse' apwányam apha nak nexcheyha.

Daniel 4:32

kóltekkesek sa' xép nepyeseksa apnámakkok, aqsok nawha'ák sa' epaxqaha; pa'at sa' etwok ektémól'a weyke, ekweykmoho siete apyeyam, ekwokmoho apya'ásegwokmo ekha apmopwána m'a Dios meyke nak ekhémo, nepyeseksa m'a aptamheykegkaxa nak chá'a kelwesse'e apkelwányam keso náxop, tén han apteméssesso chá'a apkeláneykha apchókxa m'a apmakókxa enxoho chá'a etnéssesek.”

Daniel 4:35

Mékoho apancha'awók nápaqtók ma'a apyókxoho énxet'ák nak keso náxop. Elának chá'a apmakókxa enxoho chá'a elána', cham'a aqsok ekhéyak nak néten tén han keso náxop. Méko awanchek kanmexekxak apmopwána, tén han katnehek kának se'e: ¿Yaqsa ektáha aptáha nak xa ektáha nak?”

Sofonías 2:11

Asagkók agko' sa' katnehek apteméssesakxa Wesse' egegkok ma'a énxet'ák nak. Emasséssók sa' ekyókxoho aqsok kéláyókxa nak chá'a m'a apchókxa, sa' aqsa wánxa kólpeykeshok chá'a ekyókxoho apheykegkaxa m'a, kawakxohok sa' ma'a énxet'ák apheykha nak neyáwa wátsam ekwányam.