Isaías 37:23 - Biblia Enxet

²³ ¿Yaqsa axta énxet apkenmexeyncha'a cha'a tén han apwanyeyncha'a chá'a? ¿Yaqsa axta énxet apkelpáxegkáseyncha'a chá'a tén han megyésa chá'a apkelano yetlo eyeymáxkoho apwáxok? ¡Apkenmexáha axta exchep ma'a Dios Appagkanamap nak Israel!

Isaías 37:23 ပူးပေါင်းရင်းမြစ်များ

2 Reyes 19:22

¿Yaqsa axta énxet apkenmexeyncha'a chá'a tén han apwanyeyncha'a chá'a? ¿Yaqsa axta énxet apkelpáxegkáseyncha'a chá'a tén han megyésa chá'a apkelano yetlo eyeymáxkoho apwáxok? ¡Apkenmexáha axta exchep ma'a Dios Appagkanamap nak Israel!

2 Reyes 19:4

Eñoho annal'a Dios Wesse' apagkok appeywa m'a sẽlpextétamo apwesse' apcháphasso nak wesse' apagkok, cham'a wesse' apwányam nak Asiria, yaqwayam enxoho ewanyaha m'a Dios megyetsapma nak, eñássesagkoho annal'a aplege apagko' enxoho aqsok apxeyenma m'a Dios Wesse' apagkok nak. Elmaxnésses sa' ma'a apkeleymomap nak meletsapma.”

2 Crónicas 32:17

Aptáxéssek axta han Senaquerib weykcha'áhak apwanyeyncha'a m'a Wesse' egegkok, Dios apagkok nak Israel, aptáhak axta appeywa s'e: “Mopwanchek elwagkasek teyp énxet'ák apagkok ma'a Dios apagkok nak Ezequías sélmá enxoho ko'o, ekhawo ektémakxa axta aqsok apcháyókxa énxet'ák ma'a mók apkelókxa megkamowagko axta kalwagkasek teyp sélmoma ko'o.”

Salmos 44:16

eñama m'a sélenmexma nak, apmáheyo nak chá'a hektámegma', tén han hetaqnók, tén han hetwasagkoho'.

Salmos 73:9

exénmakha chá'a ekmaso Dios apha nak néten, kaleyxkohok aqsa chá'a apkelpeywa elweynchamha keso náxop.

Salmos 74:10

Oh Dios, ¿háxko sa' ekwánxa katnégwók néxa sẽlenmexeykha m'a sẽlenmexma nak? ¿Háxko sa' ekwánxa katnégwók néxa apxéneykha ekmaso exchep?

Salmos 74:18

Wesse', kaxénwakxoho apwáxok aplókassama exchep ma'a apkelenmexma nak, tén han apxéneykencha'a chá'a ekmaso m'a énxet'ák élyeyháxma nak.

Salmos 74:23

Nágkalwánaqma apkelpáxameykha ekyennaqte nak ma'a apkelenmexma, tén han ma'a melwátésseyam nak apyennegkessóxma m'a apkenmexeykekxa nak chá'a exchep.

Éxodo 15:11

“Wesse' egegkok, ¡méko pók dios egwanchek aghéshok xép! ¡Méko apwányam aphawo nak xeyep! ¡Xeyep apkelane chá'a m'a aqsok ekpelakkasso nak agweta' tén han ma'a ekpexchessamo nak egyempehek agweta'! ¡Payhawók xeyep kólteméssesek apcheymákpoho!

Éxodo 5:2

Keñe axta faraón aptáha apchátegmowágkokxo s'e: —¿Yaqsa Wesse' m'a apkeltamho nak ko'o alyahakxoho' tén han apkeltamho nak han wohok elántépok ma'a israelitas? Mateyk ko'o m'a Wesse' nak, magwohok nahan ko'o elxog ma'a israelitas.

Éxodo 9:17

Apkelenxanmeykegkok eyke makham xeyep apkelmasma m'a énxet'ák ahagkok, megyahayók nahan elxog.

Proverbios 30:13

Yetneyk énxet apkenagko nak etnahak ekyawe kéláyo, elanok chá'a pók yetlo eyeymáxkoho apwáxok.

Isaías 10:12

Appenchessek sa' agkok Wesse' egegkok ekyókxoho aqsok apmáheyo nak elának ma'a egkexe Sión tén han ma'a Jerusalén, eñássesagkohok sa' ma'a wesse' apwányam Asiria eñama eyaqheykha apwáxok se'e aptamheykha nak, tén han eñama megyésso yeykpoho', tén han eyeymáxkoho apwáxok.

Isaías 10:17

Etnekxak sa' táxa eyáléwe m'a Dios aptaqmalma, apkelsássessóxma nak chá'a m'a Israel, xama ekhem agko' sa' nahan elwatnek tén han emasséssók ekyókxoho m'a yámet ekha nak am'ák tén han ma'a ekmompánaqma ekyetnama nak ma'a apchókxa.

Isaías 10:20

Kamaskok sa' etnehek apkeláyo ektáha nak apmassésseyam, apkeleymomap nak apqántawók kañe' Israel xa ekhem nak, cham'a Jacob énxet'ák apagkok meletsapma nak, Wesse' egegkok sa' aqsa elyennaqtések apteme apkeláyo, cham'a Dios aptaqmalma apagko' nak ma'a Israel.

Isaías 12:6

Kólwehesha yetlo ekpayheykekxa kélwáxok, kélheykha nak Sión, hakte apheyk kélnepyeseksa kéxegke m'a Dios Aptaqmalma apagkok nak ma'a Israel, yetlo ekyawe apcheymákpoho.”

Isaías 17:7

Elenmexekxohok sa' aphakxa ektáha nak apkelane énxet'ák xa ekhem nak, cham'a Dios Appagkanamap nak ma'a Israel.

Isaías 2:11

Elháxahagkok sa' yetlo apkelmegqakto m'a énxet'ák apkeleymákpoho nak; kólmasséssesek sa' nahan apkeleymákpoho m'a apkene nak etnahágkok ekha kéláyo. Wesse' egegkok sa' aqsa exekmósek apteme apwányam apagko' xa ekhem nak,

Isaías 37:4

Eñoho annal'a Dios Wesse' apagkok appeywa m'a sẽlpextétamo apwesse' apcháphasso nak wesse' apagkok, cham'a wesse' apwányam nak Asiria, yaqwayam enxoho ewanyaha m'a Dios megyetsapma nak, eñássesagkoho annal'a aplege apagko' enxoho aqsok apxeyenma m'a Dios Wesse' apagkok nak. Elmaxnésses sa' ma'a apkeleymomap nak meletsapma.”

Isaías 41:14

Aptáhak Wesse' egegkok se'e: “Énxet'ák Israel, kélketcheyetsék eykhe kéxegke, nágkóle'; Jacob énxet'ák apagkok, kélyelqáxkók eykhe kéxegke, apasmok sa'. Ko'o sekteme sélmallanchesso chá'a ekyentaxno kélheykha, ko'o sektáha nak Dios sektaqmalma m'a Israel.

Isaías 41:16

Yempaksek sa' tén sa' kalsók éxchahayam; segyettekhane ekyennaqte sa' kaxpánchesha. Keñe sa' xép kapayhekxak apwáxok xamók ma'a Wesse' egegkok, kaqheykha sa' apwáxok ma'a Dios Aptaqmalma nak Israel.

Isaías 43:14

Aptáhak Wesse' egegkok se'e, cham'a Dios Aptaqmalma nak Israel, apkelwagkasso axta teyp: “Aláphaksek sa' ko'o énxet'ák ma'a Babilonia yaqwayam alwagkasek teyp kéxegke, wának sa' elmeykesagkok ekyókxoho atña'ák, apkellegeykegkoho ekmáske sa' katnekxak élpayheykekxa nak chá'a apkelwáxok ma'a caldeos.

Isaías 43:3

Hakte ko'o sekteme Wesse' apagkok, apwagkasso teyp, Dios Sektaqmalma nak ma'a Israel. Ekmomchek axta ko'o exchep; ekyánmagkassegkek axta ekyaqmageykekxa exchep ma'a Egipto, Etiopía tén han Sabá,

Isaías 5:15

Kóneg sa' kóltemessásekxak apyókxoho m'a énxet'ák; elháxahagkok sa' apkelmegqakto m'a énxet'ák apkeleymákpoho nak.

Isaías 5:21

¡Kéxegke laye, kélanagko nak kóltáhak ekha kélmowancha'a kéltemessásamáxche nak ekha kélya'áseyak aqsok!

Jeremías 48:42

Kamaskok sa' ekteme apchókxa m'a Moab, hakte énmexeykekxeyk ko'o sektáha nak Wesse'.

Ezequiel 28:2

“Xép énxet, etne sa' yának wesse' apwányam Tiro s'e: “Keso aptáhakxa exchek appeywa Wesse' egegkok se'e: Awanhók agko' xép eyeymáxkoho apwáxok, apkenagkamchek xép etneyk xama aqsok kéláyókxa ekha ekmowána aphama chá'a m'a néten taháno ekyawe ektaqmalma ekheykegkaxa nak ma'a aqsok kéláyókxa, tén han ekwakhaya m'a wátsam ekwányam. Háwe exchep xama aqsok kéláyókxa ekha nak ekmowána, énxet xeyep apkenagkama chá'a kaxnémók apya'áseyak aqsok ma'a xama aqsok kéláyókxa.

Ezequiel 28:9

¿Melwátéssemeya sa' apkeltemessásamap aphémo xama aqsok kéláyókxa ekha nak ekmowána, apkenmeyncha'a sa' apmonye'e m'a apmáheyo nak yaqhek? ¡Énxet apagko' sa' etnehek ma'a yaqwayam nak yaqhek, cham'a apma nak xép!

Ezequiel 35:13

Paqmetchek axta exche' sewañencha'a, kayhek axta ekpeywa sexéneyncha'a ko'o. Ekleg'ak axta nahan ko'o.

Ezequiel 39:7

Wának sa' ko'o elya'asagkohok sekwesey ektaqmalma m'a énxet'ák ahagkok Israel, magwohok sa' chá'a kaxwók kóllenxanmagkohok kéltawáseykha. Keñe sa' ma'a énxet'ák apkeleñama nak mók apkelókxa elya'ásegwók sektáha ko'o sektaqmalma m'a kañe' Israel, ko'o sektáha nak Wesse'.

Daniel 7:25

Kanmexmakha sa' appeywa m'a Dios meyke nak ekhémo enaqtawássesagkohok sa' ma'a énxet'ák apagkok; emáwhok sa' eyaqmagkasek mók ma'a Dios segánamakxa apagkok, tén han ma'a kélessawássessamókxa nak chá'a ekhem apagkok, elmok sa' ma'a Dios énxet'ák apagkok ekweykmoho apqántánxo apyeyam nepxet pók.

Daniel 8:11

wanyeyha axta han ma'a apkemha apmonye' nak élápogwátéyak néten; mágwokmek axta élánamáxche m'a aqsok ektekyawa, élánamáxche nak chá'a yókxoho ekhem, tawáseyha axta m'a kélpeykessamókxa axta chá'a.

1 Samuel 17:26

Keñe axta David aptáha apkelmaxneyáncha'a m'a apchaqneykha axta nápakha: —¿Yaqsa aqsok kólmések énxet apchaqhe enxoho xa filisteo, keñe han apmasséssesso enxoho apkelmegqakto m'a Israel? ¡Mékoho apagko' xa filisteo mey'áseyak nak Dios, kaqhok etnehek elxénmakha ekmaso Dios memassegwayam nak sẽlpextétamo apagkok xa ektáha nak!

1 Samuel 17:36

Cháxa sektémakxa ko'o waqhek méwa essenhan aqsok nawhak eklo, ko'o sektáha nak xép apkeláneykha wesse'. Kaxhok sa' han ektáhakxa xa filisteo mey'áseyak nak Dios, hakte apkellókaseykegkek chá'a m'a Dios memassegwayam nak sẽlpextétamo apagkok.