Isaías 31:2 - Biblia Enxet

² Apwanchek eyke nahan aqsok ma'a, apwanchek etekkesek ma'a ekmaso nak negha, apxénchek agkok xama aqsok, elának nahan. Yenmexek sa' ma'a énxet'ák élmasagcha'a nak apkeltémakxa, appasmo nak chá'a m'a apkeláneykegkoho nak aqsok ekmaso.

Isaías 31:2 ပူးပေါင်းရင်းမြစ်များ

Job 12:13

Dios akke m'a ekha nak apya'áseykegkoho, tén han apyennaqte; cha'a apkeláneykekxa han chá'a yaqwánxa etnehek ma'a, keytlawhok han chá'a apkelane,

Job 12:16

Apmopwána chá'a keñamak ekmallahanchesso m'a. Apkeláneykha han ma'a kélyexancháseykha nak chá'a, tén han ma'a apkelyexancháseykha nak chá'a pók.

Job 5:13

Yának han kápekxak chá'a aqsok apkelane m'a ekmanyehe nak chá'a ey'asagkohok yaqwánxa etnehek, megyohok chá'a katyapok aqsok ekmaso ekxeyenma apwáxok elána':

Isaías 1:4

¡Énxet'ák melya'assáxma laye, ekyentaxno nak apkeltémakxa ekmaso, énxet'ák élmasagcha'a nak apkeltémakxa aptawán'ák neptámen, énxet'ák apkeláneykegkoho nak aqsok ekmaso! Kélyamasmeyk ma'a Wesse' egegkok, kélyetnakhassegkek ma'a Dios Aptaqmalma apagkok nak ma'a Israel, kélpekkeneykekxeyk kélnentámen.

Isaías 14:20

Megkólátawanyek sa' ektéma nak ma'a nápakha kelwesse'e apkelwányam nak, hakte aptawáseykha m'a apchókxa, apkelnapmeyk ma'a énxet'ák apagkok. Megkawegqók sa' chá'a apkelweynchámeykha m'a énxet'ák élmasagcha'a nak apkeltémakxa aptawán'ák neptámen.

Isaías 21:17

Ántawók agko' sa' nahan kaleymaxchek yágke apagkok ma'a kempakhakma yapmeyk nak Quedar.” Israel Dios Wesse' apagkok apxeyenma xa.

Isaías 22:14

Tén axta sexekmowásekpoho ko'o m'a Wesse' ekha nak apyennaqte. Aptáhak axta seyáneya s'e: “Malásekhekxók sa' ko'o xa megkólya'assáxma nak; kóletsapok sa' kéxegke eñama xa kéltémakxa nak.” Wesse' egegkok ekha nak apyennaqte appeywa xa.

Isaías 28:21

Sa' etnehek elának aqsok Wesse' egegkok ma'a aptémakxa axta egkexe Perasim, sa' etnehek elwok ma'a aptémakxa axta aplama m'a ekyapwátegweykenxa nak xóp Gabaón, yaqwayam sa' elának ma'a aqsok apmáheyo nak elána', magweteya nak, yaqwayam sa' epenaksek ma'a aqsok apkelane, aqsok apkelane magya'áseyak nak.

Isaías 28:29

Cháxa aptémakxa nahan elánekxak yaqwánxa etnehek ma'a Wesse' ekha nak apyennaqte. Yetneyk aqsok sempelakkasso nak agwetak ekxeyenma apwáxok elának ma'a, yetlo apya'áseykegkoho ekyawe nahan chá'a epenaksek apkelane.

Isaías 30:3

Elyexanchesha sa' eyke aqsa chá'a elmeyók ma'a faraón, elmegqágwakxohok sa' ma'a apkelheykekxa nak chá'a kañe' Egipto.

Isaías 30:7

megkalmopwancha'a nak elanagkok xama aqsok, megkalmopwancha'a nak epasmok pók. Cháxa keñamak sekteméssessama nak ko'o apkelwesey: “Yéwa ekwányam ekyexwéweykha naqsa méko xama aqsok kalána'”.

Isaías 31:3

Énxet apancha'awók ma'a egipcios, háwe m'a aqsok ekha nak élmowancha'a; yátnáxeg apancha'awók nahan ma'a apkelchánte nak, háwe m'a aphagák la'a. Ellegássesagkohok sa' Wesse' egegkok, esawhakpohok sa' elyaqnenek ma'a apkelmasma nak chá'a ekweykekxoho m'a apkeltaqmelchesso nak chá'a, elmassegwók sa' apyókxoho.

Isaías 32:6

Hakte asagkek chá'a katnehek appeywa m'a énxet ekmaso nak aptémakxa, keñe m'a apwáxok nak kalchetmok chá'a ekmaso agko' yaqwánxa etnehek; ektamok chá'a yaqwánxa etnehek elának aqsok ekmaso agko', apmopwána amya'a nahan chá'a etnehek yenmexmakha m'a Wesse' egegkok; yáphaksek aqsa nahan chá'a etaqhekxak meyke apmésso apto m'a meyk áto nak, megyagkek nahan yegmen ma'a hem áto' nak.

Isaías 45:7

Ko'o sélane m'a élseyéxma tén han ekyaqtéssóxma, sektekkesso nahan ma'a ektaqmalma nak negha tén han ma'a ekmaso nak negha. Ko'o sélane chá'a xa ekyókxoho aqsok nak, sektáha nak Wesse'.

Isaías 9:17

Cháxa keñamak melásekhákxoho nak Wesse' egegkok ma'a wokma'ák nak, tén han megkaleyósa nak elanok ma'a élyeheykha nak tén han ma'a xentampe'e nak. Hakte apyókxoho énxet apteme apkelya'ásseyam tén han élmasagcha'a apkeltémakxa, asagkók nahan chá'a katnehek apkelpeywa apkelxeyenma aqsok ma'a apyókxoho nak. Megkamassak makham aplo m'a Wesse' egegkok; xénchek makham apwáxok ellegássesagkoho'.

Jeremías 10:12

Yetlo apmopwána axta apkelaneyk Wesse' egegkok xapop; yetlo apya'áseykegkoho axta appekkenmak nélwanmégkaxa; yetlo apmopwána aqsok axta appeykessók ma'a néten.

Jeremías 10:7

¿Yaqsa megkakyek xép, Wesse' apwányam apagkok nak pók aptémakxa énxet'ák? Payhawók xép yeykpok. Méko ekhawo exchep nepyeseksa m'a apkelya'áseykegkoho nak aqsok, tén han kelwesse'e apkelwányam nak keso nélwanmeygkaxa.

Jeremías 36:32

Apmeyk axta makham mók weykcha'áhak ma'a Jeremías, tén axta apmésa Baruc, aptáxéssesso axta chá'a weykcha'áhak, aptáxessek axta ekyókxoho m'a aptáhakxa axta apkelyetsetchesso m'a Jeremías, cham'a ekyókxoho ektémakxa axta kéltáxésso m'a weykcha'áhak apkelwatna axta wesse' apwányam Joaquim. Apxegkásekxók axta han ekxámokma mók aqsok apxeyenma Jeremías ekhémo m'a.

Ezequiel 29:6

Elya'ásegwók sa' ko'o sektáha Wesse' m'a apyókxoho énxet'ák apheykha nak Egipto. Apkelye'eykekxeyk axta eykhe exchep apkeltémo epasmok ma'a énxet'ák Israel, máxa yámámok axta eyke aqsa aptemék xép:

Amós 3:6

páweyk agkok kélaqkahasso m'a tegma apwányam, énxet'ák akke kéltamhók kaltemeykha apkelwáxok; temégwokmók agkok exma ekmaso m'a tegma apwányam, Wesse' egegkok akke apcháphasso m'a.

Sofonías 3:8

Hélleyx sa' aqsa m'a ekhem, sémpákxo sa' néten yaqwayam alxénchásekxohok ko'o kéltémakxa kéxegke. Ektáhak ko'o sekpeywa s'e sektáha nak Wesse': Ekxénchek ko'o wánchásekxak pók aptémakxa énxet'ák tén han kelwesse'e yaqwayam sa' ko'o ayenyenták seklo nepyeseksa. ¡Kamasséssók sa' ekyókxoho xapop ma'a seklo ekho nak táxa eyáléwe!

Zacarías 1:6

Cham'a sekpeywa tén han seyánamakxa axta chá'a etnahagkok, séltémo axta ko'o eltennasagkok ma'a séláneykha apkellegasso axta sekpeywa, apwagkassegkek axta apheykegkaxa m'a kélyapmeyk nano' axta kéxegke. Tén axta sey'eykekto ko'o m'a, apkelya'ásegweykmo m'a sekteméssessamakxa axta chá'a ko'o sektáha nak Wesse' ekha sekyennaqte eñama m'a apkeltémakxa tén han aqsok ekmaso apkeláneyak.’”

Números 10:35

Xama axta emáwhok chá'a elxegekxak ma'a apkelseykha axta chá'a yántéseksek. Axta etnehek chá'a Moisés se'e: “¡Wesse' egegkok, exatakha'! ¡Yexpánches sa' ma'a apkelenmexma! ¡Yenyahagkok sa' apwet'a enxoho m'a aptaqnagko nak chá'a exchep!”

Números 23:19

Maghawok negko'o m'a Dios nentáha nak énxet néletsapmo nak chá'a, metnehek apmopwána amya'a, meyaqmagkassemek nahan mók ma'a aqsok apxeyenma. Apxénchek agkok xama aqsok, elának nahan. Apxénchek agkok nahan élanak xama aqsok, elának nahan.

Josué 23:15

Sa' etnehek han yahak kéxegke mók ektémakxa nak chá'a aqsok élmasagcha'a Wesse' egegkok ma'a aptémakxa nak apkeláneya ekyókxoho m'a aqsok éltaqmela apkeltennassama axta etnéssesek, ekwokmoho kélsawhéxkoho kélagko' kéxegke s'e xapop ektaqmalma apmésso axta,

1 Samuel 2:3

Méko sa' keyxkohok ekpeywa kapaqmeyesmakha, méko sa' kapaqmeyesmakha kaxénaxchekxohok agko', hakte Wesse' egegkok apteme Dios apya'áseykegkoho ekyókxoho aqsok, cha'a apkelyetsátéyak chá'a aqsok apkelane nak énxet tén han apkelyekpelchémo.