Isaías 30:10 - Biblia Enxet

¹⁰ Etnehek chá'a elának énxet'ák apkelwetayo nak chá'a aqsok se'e: “Nágkayet akke aqsok kélwete”, keñe chá'a etnehek elának apkellegasso nak Dios appeywa s'e: “Ná hẽltennasha eyke aqsok ekxekmowásamáxkoho ekmámnaqsoho nak; hẽltennasha aqsa chá'a m'a amya'a ekmátsa nak ageyxho'; náhentawássesha m'a aqsok élxéneykencha'a nak egwáxok agweta'.

Isaías 30:10 ပူးပေါင်းရင်းမြစ်များ

1 Reyes 21:20

Apchátegmowágkek axta Ahab ma'a Elías: —¿Sénmexma, éteyákxéya makham xép? —Ekwetákxe' neykhe —axta aptáhak apchátegmowágko Elías—. Aqsok ekmaso aqsa chá'a exchep elának nápaqtók Wesse' egegkok.

1 Reyes 22:27

Kóltennés sa' sektáha ko'o séltémo kólaqxegkesek kañe' negmomaxchexa', tén han séltémo kólmések wánxa ketchetseyk pán tén han yegmen, ekwokmoho sekwa'akto sa' ko'o makham meyke setnahakxa'.

2 Crónicas 16:10

Aptaqnókkók apagko' axta Asá m'a Dios appeywa aplegasso, apkeltamhók axta kólaqxegkesek kañe' negmomaxchexa'. Asagkók agko' axta han apteméssesakxa nápakha énxet'ák apagkok ektáha xa ektáha nak.

2 Crónicas 25:16

Xama axta aptáha apcháneya Dios appeywa aplegasso xa ektáha nak, aptáhak axta wesse' apwányam apchátegmowágko s'e: —¿Xépya appaqhetchesso chá'a wesse' apwányam? ¡Ewanmeyekxa sa'! ¿Apkeltamhók enxeykel'a emátog? Massék axta appaqhetchesa m'a Dios appeywa aplegasso, wánxa axta aqsa aptáha apcháneya s'e: —Ekya'ásegkók ko'o exchep ekxeyenma apwáxok Dios emasséssók, eñama apteme xa ektáha nak, tén han melyaheykekxa chá'a sektémakxa sekpeywa sekmésso.

Job 41:3

¿Kaltamhoya sa' kayóshok elano'? ¿Kayóshoya sa' ekpeywa kalának kának metnéssessamók exma ekmaso?

Isaías 28:15

Kéltáhak kélpaqmeta kéxegke s'e: “Nenlanak negko'o ekhémo mók nélpaqhetchásamáxkoho m'a nétsapma, nélpaqhetchásexkók negko'o m'a apkelmaheykegkaxa nak chá'a apkeletsapma, yaqwayam sa' mehegwatamók ma'a ekwa'a sa' aqsok ekmaso agko'; nélyexanmomchek negko'o m'a nélmowancha'a amya'a nak, néláhakkásamaxcheyk ma'a nélyexancháseykha nak egmók.”

Isaías 29:10

Hakte apcháhakkassegkek kéxegke teyn ekyentaxno agko' ma'a Wesse' egegkok. Dios appeywa apkellegasso eykhe chá'a apkeltennaséyak aqsok ma'a énxet'ák, apkeláhakkassessegkek eyke apáwa nápaqta'a m'a Wesse' egegkok.

Isaías 5:20

¡Kéxegke laye, kélxeyenma nak ektaqmalma m'a ekmaso nak, tén han kélxeyenma nak ekmaso m'a ektaqmalma nak; kéltemessáseykekxoho nak han élseyéxma m'a ekyaqtessóxma, keñe ekyáqtessóxma m'a élseyéxma nak; kéltemessáseykekxo nak han ekmátsa m'a ekmáske nak, keñe ekmátsa kéltemessáseykekxo m'a ekmáske nak!

Jeremías 11:21

Keñe m'a énxet'ák Anatot, apmáheyo nak chá'a heyaqhek, apkeltémo nak chá'a maxének ma'a Wesse' egegkok apwesey, maltamho enxoho heyaqhek,

Jeremías 23:17

Etnehek chá'a elának apkelwanyeykha nak chá'a sekpeywa s'e: ‘Méko sa' katnehek ektáhakxa kélheykha kéxegke.’ Keñe m'a apkelyennaqtésso nak chá'a apkelwáxok apkelyetleykekxa m'a ektémakxa élchetámeykha apkelwáxok, etnehek chá'a elának se'e: ‘Megkáhapweyk sa' xama enxoho aqsok ekmaso.’”

Jeremías 26:11

Keñe axta m'a apkelmaxnéssesso nak Dios énxet'ák apagkok, tén han ma'a Dios appeywa apkellegasso aptáha apkeláneya m'a apkelámha apmonye'e tén han apyókxoho énxet'ák se'e: “Payhawók kólának ematñekxak se'e énxet nak, hakte apxénchek ekmaso s'e tegma apwányam nak. Kélheyk'ák kélagko' han kélleg'ak kéxegke m'a aptáhakxa appeywa.”

Jeremías 29:27

¿Yaqsa axta ektéma menókáseykencha'a exchep Jeremías, apkeñama nak Anatot, appaqmeyesma nak chá'a kélnápaqta'awók kéxegke, aptémól'a m'a Dios appeywa aplegasso?

Jeremías 36:29

Etne sa' yának se'e: ‘Keso aptáhakxa exchek Wesse' egegkok se'e: Apwatneyk axta exchep weykcha'áhak, appaqhetchessek axta han Jeremías eñama aptáxésso apxeyenma apmáheyo exegmak wesse' apwányam Babilonia emasséssak se'e apchókxa nak, tén han apmáheyo etnessásekxak meyke énxet, tén han aqsok kélnaqtósso.

Jeremías 38:4

Tén axta apkelámha apmonye'e aptáha apcháneya wesse' apwányam se'e: —Tásek agaqhek xa énxet nak, hakte kelyélaqtéssessegkek chá'a apkelwáxok appeywa m'a sẽlpextétamo apkeleymomap nak makham se'e tegma apwányam nak, tén han ma'a apyókxoho énxet'ák. Mektagkassók ektaqmalma apheykha énxet'ák xa énxet nak, apmáheyók aqsa etwássesha apheykha.

Jeremías 5:31

Wanchek amya'a m'a apkelxeyenma nak chá'a Dios appeywa apkellegasso; etnahagkok nahan chá'a apmakókxa enxoho etnahagkok apkeláneykha apchókxa m'a apkelmaxnéssesso nak Dios énxet'ák apagkok, ¡kalkohok nahan apkelwáxok énxet'ák ahagkok katnehek xa ektáha nak! ¿háxko sa' eyke kéxegke kóltéhek ekwokmo sa' néxa ekhem?’”

Amós 2:12

“Kéleykegkek axta eyke kéxegke anmen yámet égmenek ma'a nazareos, keñe axta megkólhayo ellegaksek sekwesey m'a apkellegasso axta sekpeywa.

Amós 7:13

Ná eltennaha kaxwók se'e kañe' Betel nak, hakte wesse' apwányam apkelpeykessamókxa aqsok apcháyókxa s'e, tén han kélpeykessamókxa aqsok kéláyókxa m'a aptémakxa nak wesse' apwányam.

Miqueas 2:11

Yetneyk agkok xama énxet aptamheykha apmopwána amya'a, etnehek chá'a s'e: “Añeksohok chá'a ko'o kéxegke m'a anmen yámet égmenek, tén han ma'a mók anmen nak”, cháxa yaqwayam etnehek Dios appeywa aplegasso apagkok ekleklamo apwáxok xa énxet'ák nak.

Miqueas 2:6

“Ná hẽlyo'óta chá'a negko'o yetlo sẽllegasseykta amya'a yaqwánxa katnehek egmonye' —etnehek chá'a elpaqmétek ma'a. ¡Yawanchek negko'o hegwohok ma'a aqsok ekmaso nak!”

1 Samuel 9:9

(Apmenyeyk axta agkok chá'a elpaqhetchesakpohok Dios xama israelita ma'a nanók axta, axta etnehek chá'a s'e: “Agyo'ókxak ekha apmopwána”; cham'a kéltéma nak kaxwók “Dios appeywa aplegasso”, kéltéma axta nanók “ekha apmopwána”.)