Isaías 3:24 - Biblia Enxet

²⁴ Kampak sa' ekpaqneyam ekmanyása ekyaqmageykekxa m'a sokmátsa; keñe sa' éltétamáxche katnehek ekyaqmageykekxa m'a táma'; keñe sa' ma'a éltaqmalma nak chá'a áwa', kayaqmagkasek ma'a meyke áwa' akqatkok; keñe sa' élántaxno apkelexyawáyól'a, etnehek apyaqmageykekxa m'a apáwa sẽlwáxaqxamól'a; keñe sa' ma'a éltaqmalma nak, kayaqmagkasek kélqaháseyak.

Isaías 3:24 ပူးပေါင်းရင်းမြစ်များ

Ester 2:12

Doce pelten axta nahan kéltexnassáséyak émpe'ék pánaqte néltexnémaxche ektaqmelchessamo nak egyempehek xa ekyókxoho kelán'a étkók nak. Sekxók axta émha amonye' seis pelten kéltexnassáseykegko émpe'ék ma'a aqsok ánek ekmátsa nak ekpaqneyam pexmok agkok tén axta makham pók seis pelten kéltexneykegkokxo m'a sokmátsa tén han ma'a pexmok néltexnémaxche ekmátsa nak ekpaqneyam élmeykegkól'a chá'a m'a kelán'ák. Wokmek axta néxa élxawéyak ma'a pánaqte, kélyentamákxeyk axta chá'a xama kelán'a étkok ma'a aphakxa nak wesse' apwányam Asuero.

Job 16:15

Yetlo ekyentaxno ewáxok élántaxneykxak ma'a apáwa sẽlwáxaqxamo nak, ekheyk náxop sektekxeya xapop épátek sekmegqakto.

Proverbios 31:24

Kalának chá'a apáwa tén han nentete nenxet, keñe kakxák chá'a ekha ekyánmaga kalmések ma'a apkexeykekxa nak chá'a aqsok.

Proverbios 7:17

éxpaqhákxók xeyk han ma'a aqsok ánek ekmátsa nak ekpaqneyam, tén han mók aqsok élmátsa nak élpaqneyam.

Isaías 15:2

Apkelmeyákxeyk axta énxet'ák Dibón peya ellekxagwaha m'a tegma kélpeykessamókxa axta chá'a mók ektémakxa aqsok kéláyókxa m'a néten egkexe nak. Kellapwámegkek axta énxet'ák Moab kélmasséssekmo m'a tegma apwányam Nebo tén han ma'a Medebá. Apkelmópesawók axta chá'a apkelyese apyókxoho, apkelyéseságkek axta nahan chá'a áwa' apatña'ák.

Isaías 15:3

Apyókxoho énxet axta nahan chá'a apkelxegak ámay apkelántaxneykekxa m'a apáwa magkenatchesso nak senlapwayam; kelpayheyha axta chá'a apatña'ák apkellekxagweyncha'a m'a néten apxanák nak. Apyókxoho énxet axta nahan kellapwámegkok ma'a apkelweynchámeykegkaxa nak chá'a énxet, apkellekxagweyha axta chá'a.

Isaías 22:12

Apkeláneyáha axta kéxegke Wesse' ekha nak apyennaqte apkeltamho kóllekxagwaha xa ekhem nak tén han kallapwomagkok, tén han kólmópésagkohok kélyese kólántaxnekxak ma'a apáwa sẽlwáxaqxamól'a magkenatchesso éllapwáméyak.

Isaías 3:23

tén han ma'a nélanyantáxama agkok, tén han ma'a apáwa apkeláxñe apkelexyawe agkok nak, tén han ma'a élatchesso akqatkok, tén han ma'a apáwa élpextete nak chá'a akqatkok.

Isaías 4:4

Apxénchek sa' agkok yaqwánxa etnéssesek Wesse' egegkok ma'a, peya enxoho ellegássesagkoho', ényeyásekxak sa' éma éltexnémáxche nak ekyegkenamaxche m'a kañe' Jerusalén, elyenyessásekxak sa' nahan élpeysameykha nak élmanyása apyempe'ék ma'a énxet'ák apheykha nak Sión.

Isaías 57:9

“Kólnaqtémagkokxohok axta chá'a kólsakxések pexmok égmenek ma'a dios Mélec tén han ekxámokma agko' ma'a sokmátsa; kéláphassegkek axta nahan chá'a apseykha amya'a ekweykmoho m'a makhawók agko' nak, kélwagkassamók axta chá'a m'a apkelmaheykegkaxa nak chá'a apkeletsapma.

Jeremías 4:8

Kólántaxnekxa apáwa sẽlwáxaqxamo nak, kóllekxagwaha, kólápentegmakha kóllegagkohok ekmáske, hakte mehegkexeyk negko'o m'a Wesse' egegkok aplo.”

Jeremías 48:37

Apkelmópésawók apagko' apkelyese énxet'ák, apkelyéseságkek han áwa' apatña'ák, apyókxoho nahan apkelpexyekháseyha apmék, tén han apkelántaxneykxo m'a apáwa sẽlwáxaqxo nak.

Jeremías 49:3

“¡Énxet'ák Hesbón, kalpayheykha kélatña'ák kóllegagkohok ekmáske, hakte kélmasséssekmek ma'a Ai! ¡Kóllekxagwaha kelán'ák Rabá! ¡Kólántaxnekxa apáwa nentaxneykekxohol'a apketsapma egmók, kóltekpogmakha kélnénya'ák! ¡Kólenyahák, máxa élyeyháxma kólteme kólpexyekhasha kélyempe'ék! hakte megkatnahakxa apchókxa peyk kólyentamok ma'a dios Milcom, yetlo apkelmaxnéssesso nak chá'a énxet'ák apagkok, tén han ma'a ekha nak kéláyo.

Jeremías 6:26

¡Énxet'ák ahagkok, kólántaxnekxa apáwa sẽlwáxaqxamo nak, magkenatchesso kéllegagkoho ekmáske; kólpexyawha neyseksa táhap, kallapwomák, nágkóleysagkoho kóllekxagwaha, ektémól'a yetsapok xama kélketche apteme nak wánxa xama apagko'; hakte kaxwo' sa' elwak ma'a apmáheyo nak hegmasséssók!

Lamentaciones 2:10

Apkelwanmeyágkek aqsa apheyncha'a náxop ma'a apkelámha apmonye'e nak Sión, apkelexpaqha'ak chá'a apqatkok xapop, apkelántaxneykxeyk han apáwa sẽlwáxaqxamo nak. Kelháxahágkek ekwokmoho éltekxeya naqta'a xapop ma'a kelán'a étkók nak Jerusalén.

Ezequiel 27:31

Elmopaksohok sa' apkelyese eñama exchep, elántaxnekxak sa' ma'a apáwa nentaxneykekxohol'a eñama apketsapma egmók, ellekxagwaha sa' nahan yetlo ekyawe agko' élmayóseka apkelwáxok.

Ezequiel 7:18

Elántaxnekxak sa' ma'a apáwa sẽlwáxaqxamól'a magkenatchesso éllegágkoho apkelwáxok; kalpexyennók sa' ekyókxoho apyempe'ék, elxog sa' yetlo élyexwáseykekxa nápaqta'a apkelmegqakto, tén han élmópeyo agko' apkelyese.

Joel 1:8

Máxa kelán'a étkok élekxagweykhal'a apketsapma ekpagkanma, ektaxneykekxal'a apáwa senlapwayam

Levítico 26:16

sa' atnéssesek ko'óxa kélxegkáxa s'e: wáphássesek sa' aqsok segyegwakkassamo nak, tén han negmasse segaqhamo nak, ekmexanma egyempehek, tén han negmasse élmaso nak egaqta'ák, tén han ma'a ekyelqamáxche egyempehek; kaqhok sa' kólchenekxak aqsok, hakte kélenmexma sa' etókasek ma'a aqsok kélcheneykekxa kélnakxo.

Amós 8:10

Kéllekxagweykegkaxa eñama apkeletsapma énxet sa' atnessásekxak ma'a ekhem kélessawassessamókxa nak chá'a, keñe sa' kélmeneykmasso katnekxak ma'a senlapweykenxa; wának sa' ko'o kólántaxnekxak kéxegke m'a apáwa sẽlwáxaqxamo nak, tén han kólmopaksohok kélyese magkenatchesso éllapwámegko. Máxa sa' kóltéhek kóllekxagwaha m'a aptémól'a énxet elekxagwaha exyánegkesek apketche apteme nak wánxa xama apagko', kélyókxoho sa' kalyélaqtések kéllegeykegkoho ekmáske.

Miqueas 1:16

Kéxegke, kélheykha nak tegma apwányam Sión, kólmopaksoho kéltegye kélyese, magkenatchesso éllapwáméyak, eñama m'a kélketchek kélásekhayo nak. Kólmopaksoho kélyese, ekwokmoho ektáha meyke agko' kélwa', ektémól'a máma apwenaqte, hakte kólnaqlakxak sa' megkatnahakxa apkelókxa m'a kélketchek nak kéxegke.”

Deuteronomio 28:22

Yáphássesek sa' nahan ma'a negmasse ekmanyehe nak chá'a kapayhekxa', ekmexanma egyempehek ekmaso, élyephe egyempehek, tén han ekmexanma agko' exma, ekyamáyóxma meyke yegmen, tén han askok yaqwayam katwássesha m'a hótáhap kélcheneykekxa, negmasse ekmaso yaqwayam sa' katnahagkok chá'a kéxegke ekwokmoho ekmasséssekmo.

Deuteronomio 32:24

eletsapok sa' meyk élnapma tén han negmasse; kamasséssók sa' negmasse ekmáske nak hentéhek; wahak sa' ko'o m'a aqsok nawha'ák éllo élleykha nak naxma tén han ma'a yéwa ekmáske nak hentakxek.