Isaías 24:16 - Biblia Enxet

¹⁶ Nenleg'awók nahan aptáha apkelmeneykmasa énxet'ák apheykha nak ektemegwánxa néxa xóp se'e: “¡Apcheymákpoho ektáha nak appéwomo!” Tén axta ko'o sektáha s'e: ¡Ko'o laye, asagke nak la'a setnamakxa! ¡Yeykhágwokmók agko' nak la'a ekmaso aptamhágkaxa chá'a appelakkassesso apsexnenagko pók ma'a énxet'ák appelakkassesso nak chá'a esexnenak pók!

Isaías 24:16 ပူးပေါင်းရင်းမြစ်များ

Salmos 106:15

Apméssegkek axta Dios ma'a aqsok apkelmaxneyeykha, apchahayak axta eyke han negmasse segaqhamo nak.

Salmos 119:158

Megkalchek ko'o ewáxok alanok ma'a apkelyenseyam nak chá'a aptamhéyak melya'ásseyam, melyaheykekxoho nak ma'a apkeltémókxa nak antéhek.

Salmos 2:8

Hélmaxna ko'o ekyókxoho apkelókxa, almések sa', apagkok sa' etnehek ekweykmoho m'a ektemegwánxa nak néxa xapop.

Salmos 58:10

Kalpayhekxak sa' apkelwáxok kélyaqmagkassásekxo enxoho kélteméssessamakxa m'a apkelpéwomo nak; ¡elyássesek sa' apmagkok éma apagkok ma'a élmasagcha'a nak apkeltémakxa!

Salmos 65:8

kawomhok apkelpexyennama elwetak aqsok sempelakkasso nak agwetak apkelane exchep ma'a énxet'ák apheykha nak makhawók agko' keso náxop; apkelwóncháseyha apkelátseyncha'a énxet'ák ma'a ekpayho nak ekteyapmakxa ekhem, tén han taxnegwánxa ekhem, eñama exchep.

Salmos 67:7

¡Dios sa' hempasmok! ¡Kóláwhok sa' chá'a ekyókxoho apkelókxa keso náxop!

Salmos 98:3

megkalwagqeykmok apkelásekhayo tén han melyenyaweykha m'a énxet'ák Israel. ¡Weykmók néxa xapop apkelwete énxet'ák apmallanma m'a Dios egagkok!

Éxodo 15:11

“Wesse' egegkok, ¡méko pók dios egwanchek aghéshok xép! ¡Méko apwányam aphawo nak xeyep! ¡Xeyep apkelane chá'a m'a aqsok ekpelakkasso nak agweta' tén han ma'a ekpexchessamo nak egyempehek agweta'! ¡Payhawók xeyep kólteméssesek apcheymákpoho!

Isaías 10:16

Cháxa keñamak peya nak etnessásekxak meyke apkelwasqapma Wesse' ekha nak apyennaqte xa énxet'ák élyenneykha agko' nak apyempe'ék, elméxenchessesek sa' apyempe'ék máxa táxa élwatno sa' etnéssesek.

Isaías 11:12

Ekxenchesek sa' néten aqsok magkenatchesso yaqwayam sa' elwetak ma'a pók aptémakxa nak chá'a énxet'ák, yánchásekxak sa' makham ma'a israelitas kélnaqleykekxa axta megkatnahakxa apkelókxa; yánchásekxak sa' makham ma'a apkelmahéyak axta ekyókxoho yókxexma cham'a énxet'ák Judá apkexpánma axta.

Isaías 17:4

Kamaskok sa' ekyennaqte Samaria xa ekhem nak, eyaqheykencha'a nak chá'a apkelwáxok ma'a Jacob énxet'ák apagkok, kamassegwók sa' ma'a ektémakxa nak ektaqmalma apheykha énxet ma'a kañe'.

Isaías 21:2

Asagkók agko' ma'a aqsok sexekmósso nak ma'a Dios: Appelakkassessek chá'a apsexnáneya pók ma'a énxet apsexnenagkamo nak chá'a pók, apmasséssekmek aqsok ma'a apmassesseykmoho nak chá'a aqsok. ¡Kólchempekxa néten, énxet'ák Elam! ¡Énxet'ák Media, kólchetamák! ¡Maltamhók ko'o kaxwo' kólpaqmésmakha eñama kéllegeykegkoho!

Isaías 26:15

Wesse', apxámáseykekxeyk xép pók aptémakxa énxet'ák; apxámáseykekxeyk yaqwayam kataxchek chá'a m'a apcheymákpoho, apyáncháseykegkek chá'a m'a ekyókxoho nak néxa xapop apkelókxa.

Isaías 28:5

Etnehek sa' ekho kélháxaqxo élyenma ektaqmalma Wesse' ekha nak apyennaqte xa ekhem nak, ekho kélnatanma ektaqmalma apagkok ma'a énxet'ák apagkok apkeleymomap nak,

Isaías 33:1

¡Xép laye, apmassésseyam nak chá'a aqsok memassegwayam nak makham! ¡Xép laye, appelakkassesso nak chá'a esexnenak pók, megkólpelakkassesso nak makham kólsexnena'! Appenchessek sa' agkok apmassésseyam aqsok, kólmasséssók sa' xép, appenchessek sa' agkok appelakkassesso chá'a apsexnenagko pók kólpelakkassesek sa' xépxa kólsexnena'.

Isaías 42:10

Kólmeneykmásses Wesse' egegkok negmeneykmasso axnagkok; kólpeykesho kélheykha nak makhawók agko' keso náxop, cham'a kélxega nak chá'a neyseksa wátsam ekwányam tén han ma'a aqsok élleykha nak ma'a kañe', tén han ma'a apkelókxa ekhéyak nak neyáwa wátsam ekwányam yetlo m'a énxet'ák apheykha nak ma'a kañe'.

Isaías 48:8

Meñeyk xép kaxénaxchek xa, meteyk nahan, hakte yókxoho ekhem ekteme meyke apeyk'ák. Ekya'ásegkók ko'o exchep apteme melane chá'a m'a aptáhakxa enxoho appeywa, apkeltamhomakpek axta exchep ekyennaqte apwáxok ma'a apyetnamakxa axta egken awáxok.

Isaías 52:10

Apxekmóssek apmopwána Wesse' egegkok nápaqta'awók ma'a apyókxoho pók aptémakxa énxet'ák. Kólya'asagkohok sa' ekyókxoho keso náxop sẽlwagkasa teyp ma'a Dios egagkok.

Isaías 6:5

Keñe axta ektáha élchetama ewáxok se'e: “¡Ko'o laye, watsapok sa'! Ekwet'ak ahaqta'ák ahagko' ma'a Wesse' Apwányam, cham'a Wesse' ekha nak apyennaqte; ko'o sekteme énxet ekteyapmól'a chá'a appeywa ekmaso, ekhegkek ko'o nepyeseksa m'a énxet'ák élánteyapmo nak chá'a apkelpaqmeyesma ekmaso.”

Isaías 60:21

“Énxet meyke apkeltémakxa sa' etnahagkok apyókxoho m'a énxet'ák kélagkok, etnahagkok sa' chá'a apagkok apchókxa meyke néxa, éltekteyapmakxa m'a xama yámet ektáha axta ko'o séneykekxa ahagko', sélane axta ko'o yaqwayam axekmósek ektémakxa seyeymáxkoho.

Jeremías 12:1

Wesse', élátegmoweyxchek agkok ko'o exchep, xeyep aqsa chá'a kapayhohok aptáhakxa appeywa; peyk eykhe almaxneyha ko'o exchep ektémakxa aqsok sekwete. ¿Yaqsa enxoho ektéma ektaqmalma chá'a ekteyapma aqsok apkelánéyak ma'a élmasagcha'a nak apkeltémakxa? ¿Yaqsa enxoho ektéma megkatnegweykmoho chá'a exma apheykha m'a appelakkassesso nak chá'a elsexnenak apnámakkok?

Jeremías 12:6

Weykmók xép apkelenmexeykekxa m'a apkelyáxeg'a apancha'awo nak, tén han ma'a apnámakkok apagko' nak, neptámen chá'a elpáxegkesha ématchesha. Nágyáwho aqsa exchep ma'a, tásek sa' eykhe chá'a katnehek apkelpeywa elána'.’

Jeremías 3:20

Kéltemék kéxegke sélyenseykmo sélyetleykha m'a, ektémól'a kelán'a ektawáseykegkoho atáwa' élánegwayam la'a chá'a pók énxet megkatnahakxa atáwa'. Ko'o sekxeyenma xa, sektáha nak Wesse'.

Jeremías 5:11

Eyamasmeyk ko'o m'a énxet'ák Israel tén han Judá. Ko'o sekxeyenma xa, sektáha nak Wesse'.”

Lamentaciones 1:2

Yókxoho axta'a élekxagweykha; kelsekkenmék aqtek égmenek ma'a amáxempenák. Méko xama enxoho yaqwayam epeykessásekxak awáxok ma'a apyókxoho éláneykxa nak chá'a. Apkenmexeykekxeyk ma'a apyókxoho námakkok; élenmexma aptamheykekxa'.

Oseas 5:7

Apkelyamasmeyk apkelyetleykha m'a Wesse' egegkok, hakte pók énxet apketchek ma'a apketchek nak. Ekmanyehe agko' sa' kólmasséssessók ma'a xapop apagkok nak, eñama apkelyamasma apkelyetleykha m'a Wesse' egegkok.

Oseas 6:7

“Aphawók Adán ma'a énxet'ák ahagkok, meláneykegkok ma'a ekhémo mók nélpaqhetchásamáxkoho ahagkok, eyamasmeyk nahan sélyetleykha.

Levítico 26:39

Keñe sa' ma'a kéleymomáxche nak megkóletsapma m'a xapop apagkok nak kélenmexma, kóletsapok sa' eñama kéltémakxa ekmaso; ¡kóletsapok sa', kólhágwakxohok sa' ma'a kélyapmeyk nano', eñama apkeltémakxa ekmaso m'a!

Miqueas 5:4

Yempekxak sa' néten ma'a wesse' apwányam yaqwayam sa' eltaqmelchesek ma'a énxet'ák apagkok, yetlo apmopwána, tén han apcheymákpoho eñama nak apmésso m'a Dios Wesse' apagkok, exmakha sa' meyke élya'ásekhaxma m'a, hakte kólteméssesek sa' apcheymákpoho Wesse' egegkok, ekweykmoho m'a néxa xapop nak.

Habacuc 1:13

Mopwanchek xép yohok aqsa katyapok aqsok ekmaso, hakte cháxña'awók aptémakxa, mopwanchek elanok yetlo ekleklamo apwáxok ma'a aqsok élmasagcha'a, ¿yaqsa ektéma exchep apwanmeyeykencha'a nak aqsa apkeláneykencha'a m'a énxet'ák apkelánéyak nak chá'a aqsok ekmaso agko'? ¿yaqsa ektéma apwanmeyeykencha'a nak apkeláneykencha'a m'a énxet'ák élmasagcha'a nak apkeltémakxa apmassésseykmo m'a énxet'ák megkaxnawo nak apkeltémakxa?

Habacuc 1:3

¿Yaqsa ektéma sexekmóssama nak chá'a ko'o m'a ekyentaxnamo nak egwáxok, tén han aqsok ekmaso? Yetnegkek ko'o sekhakxa m'a apkelyennaqteyáseykha nak apyempe'ék énxet'ák, tén han sẽlmassésseyam nak, sawheykekxók apkello m'a énxet'ák, tén han ma'a apkelenmexamap.