Isaías 24:1 - Biblia Enxet

¹ Kóllano, esawhohok sa' aqsok Wesse' egegkok keso náxop, yetsagkasek sa', ekmaso sa' etnessásekxa', yexpánchesek sa' énxet'ák apheykha m'a kañe'.

Isaías 24:1 ပူးပေါင်းရင်းမြစ်များ

2 Reyes 21:13

Allegássesagkohok sa' ma'a énxet'ák nak Jerusalén ekhawo sekteméssesakxa axta m'a Samaria, keñe han ma'a Ahab axta aptawán'ák neptámen; wáxñásekxohok sa', ektémól'a kólmópeyásekxak awáxok sokpayhe keñe kólpólchesagkok.

Nehemías 1:8

Kaxénwakxoho apwáxok ma'a appaqhetchessama axta apkeltennassama nenlánegko enxoho negko'o mólya'assáxma, apxeyenma hẽxpánchesek hẽlya'aksek ekyókxoho yókxexma nak keso náxop,

Salmos 146:9

eltaqmelcheshok chá'a Wesse' egegkok ma'a énxet'ák apkeleñama nak mók nekha, epasmok chá'a m'a élyeyheykha nak, tén han xentampe'e nak, yetsagkasseshok eyke chá'a ámay apagkok ma'a élmasagcha'a nak apkeltémakxa.

Isaías 13:13

Keñe sa' kalpexyennók ma'a néten, kaqxegmakha sa' nahan ekyetnamakxa m'a xapop seklawa sa' ko'o xa ekhem nak, cham'a seklawa ahagko' sa'.

Isaías 13:5

Apkeleñamak ma'a xama apkelókxa makhawók agko' nak, cham'a teyp agko' nak ma'a néxa xapop. Wesse' egegkok neykhe m'a, yetlo m'a apkelmeykha nak chá'a apkenchesso aplo, apxegakmo nak yaqwayam emasséssók ekyókxoho keso náxop.

Isaías 2:19

Apkempákxeyk sa' agkok néten Wesse' egegkok, apsawheyáseykxoho sa' apyawheyáseykha m'a xapop, elántexek sa' énxet'ák ma'a meteymog áxwa, cham'a kañe' xapop nak; elyexanmok sa' apmonye' m'a Wesse' egegkok negáyo nak, elyexanmok sa' amonye' m'a Wesse' apcheymákpoho.

Isaías 24:19

Kalpexyennók sa' ekmaso agko' xapop, kayawheykha sa', nekha étkók sa' katnekxa'.

Isaías 24:20

Máxa anmen áto' sa' katnehek kayawheykha, máxa tegma aphápak sa' katnehek kayawheykha meykel'a apyennaqte apkelánamap. Yentexók agkók ma'a megkay'assáxma, teyekmek sa' agkok, megkólxátekhásekxeyk sa' chá'a.

Isaías 27:10

Apmopso aptáhak ma'a tegma apwányam apyennaqte nak, máxa m'a tegma aptaqmópéyak la'a, máxa m'a ekyamayél'a exma yókxexma meykel'a énxet. Weyke ekteykegkaxa pa'at ma'a, ekteykegkaxa m'a yámet áwa' tén han ekheykegkaxa chá'a kallókasek élyampé.

Isaías 29:16

¡Asagkók agko' nak la'a kéltémakxa kélnaqtawáseykencha'a aqsok! Máxa m'a yelpa' éltémól'a kaxhok ma'a ektáha nak apkelane. Megkatnehek kának xama aqsok ektáha nak chá'a apkelane s'e: “Mehélaneyk xép”, megkatnehek nahan kának nekha yelpa' ektáha nak chá'a apkelane s'e: “Mey'ásegkok aqsok apkelana nak.”

Isaías 29:2

wának sa' eyke ko'o ewakhakpok ma'a Ariel, keñe sa' katyapok nenlekxagweykha tén han negápentega nenlegeykegkoho ekmáske m'a kañe'. Naqsók sa' ko'o atnéssesek aphawo tegma apwányam ma'a kélwatnamakxa nak chá'a aqsok ekwesey nak Ariel.

Isaías 30:32

ekyókxoho apyenyeykenta apmopwána sa' chá'a Wesse' egegkok kañexchek élpáwá aqsok kéltekpaga tén han arpa apkelpáwá m'a kañe' nak. Yempakhak sa' Wesse' egegkok ekyennaqte agko' ma'a.

Isaías 32:12

Kólxekmós kéllegágkoho éllapwámeyak ma'a yókxexma ekmátsexa nak agweynchamha tén han ma'a anmen yámet kélcheneykekxa éltaqmalma nak.

Isaías 33:9

Kesagkék ma'a xapop yaqhapchek nahan exma, kelyameygkek aqsok naxma m'a Líbano, kelyetcheyk áwa' yenta'a, yókxexma ekyamayéxma tamhákxak ma'a ekyapwátegweykenxa nak xapop Sarón, meyke xama aqsok entamhákxak ma'a yókxexma Basán tén han ma'a egkexe Carmelo.

Isaías 34:10

Megkaspónhek sa' ekhem tén han axta'a; kapaqnek sa' aqsa chá'a; kataqmopagkohok agko' sa' meyke néxa; méko sa' kaxwók kapéwhok ma'a ekpayhókxa nak.

Isaías 34:2

Apkeltaqnaweygkek Wesse' egegkok apyókxoho énxet'ák keso náxop ekweykekxoho m'a apyókxoho sẽlpextétamo apagkok nak, apkeltamhók kólsawhohok kólnápekxa'.

Isaías 42:15

Amasséssók sa' ko'o m'a meteymog élekhahéyak nak tén han ma'a egkexe náxap'awo nak, alyamaksek sa' ekyókxoho m'a aqsok elyápaqmátéyak nak áwa' m'a néten; ekyamayéxma sa' atnessásekxak ma'a wátsam nak, meyke yegmen sa' nahan atnessásekxak ma'a awáxok ekheykegkaxa nak chá'a yegmen.

Isaías 5:6

ektaqmópeyak sa' atnessásekxa'. Megkólyaqténchesagkek sa' nahan chá'a m'a axchakkok, megkólápetchesek sa' nahan chá'a m'a pa'at, kápekxak sa' ma'a am'ák tén han ma'a ekmompánaqma nak. Wának sa' nahan ko'o megkáphássesek ekmámeye m'a yaphope, yaqwayam sa' megkayássese'.

Jeremías 4:7

Tekkek yámakméwa m'a ekyáqtamakxa nak, xegakmek ma'a ekmassésseykmoho nak pók aptémakxa énxet'ák; tekkek ma'a eyókxa nak, peyk kamasséssak kélókxa, yaqwayam kamasséssessók ma'a apchókxa tén han katnéssásekxak yókxexma meykexa énxet, tén han nápakha'a apketkók ma'a tegma apkelyawe kélagkok nak.

Jeremías 40:15

Keñe axta Johanán apyexákpoho aptáha apcháneya Guedalías se'e: —Yoho ko'o ay'ókxak Ismael tén han waqhek. Méko sa' kay'asagkohok ektáha eyaqhe. Mogwanchek negko'o óghok yaqhek xép ma'a. Yexpaqnek katnehek ma'a apyókxoho judíos apwakhegweykta nak xép, enaqtawasakpok katnehek ma'a apkeleymomap nak makham ma'a Judá.

Jeremías 50:17

“Máxa nepkések apkelxegányam la'a m'a énxet'ák Israel, ekmenxeneykhal'a méwa. Wesse' apwányam Asiria axta apto apmonye', keñe axta natámen Nabucodonosor wesse' apwányam nak Babilonia, apkeltakxékencha'a apexchakkok.

Jeremías 51:34

Aptáhak Jerusalén se'e, tegma apwányam Sión nak: “Nekha'a étkók axta ko'o etnéssáseykekxak Nabucodonosor wesse' apwányam nak Babilonia, emasséseykmek axta; máxa axta etnessáseykekxak ma'a sokpayhe meykel'a aqsok awáxok. Máxa yegmen askok ekyawe axta aptemék senaqsapma, ekyetno nak wátsam ekwányam; apyaqkáneykmek axta aptama ekleklamókxa nak apwáxok ekyetno sekyókxa, keñe m'a nekha nak apkexakhama. ¡Kólyaqmagkásekxak sa' setnéssessamakxa axta ko'o m'a Babilonia! ¡Kólyaqmagkásekxa sa' ektémakxa axta sẽlnapma negko'o m'a caldeos!”

Jeremías 9:16

Waxpánchesek sa' alya'aksek nepyeseksa m'a pók aptémakxa énxet'ák, melya'ásegko nak ma'a, tén han melweteya axta m'a apyapmeyk nano'; sókwenaqte sa' wának kólmenxenchesek, ekwokmoho megyeymékpo xama enxoho.”

Ezequiel 12:20

Kólmasséssók sa' apyókxoho tegma apkelyawe apheykegkaxa nak chá'a énxet; meyke xama aqsok sa' katnekxak ma'a apchókxa. Keñe sa' kólya'ásegwók kéxegke sektáha ko'o Wesse'.’”

Ezequiel 24:11

keñe sa' epekkenek nátex weygke meyke aqsok apwáxok, ekwokmoho ekyexwásekxoho agko' ma'a sawo ekyexwase nak tén han ekmópekxoho agko' ma'a ekmanyása nak apwáxok; ¡ekwokmoho sa' ekmassa m'a apyéw'ák nak!

Ezequiel 35:14

“Keso sektáhakxa nak ko'o sekpeywa s'e sektáha nak Wesse': Kalpayhekxak sa' apkelwáxok apyókxoho énxet apheykha nak keso náxop sekmasséssekmo sa' xeye'.

Ezequiel 5:14

Jerusalén, atnessásekxak sa' ko'o exche' meteymog ektaháneykekxa mók; amegqaksek sa' nepyeseksa m'a énxet'ák apwakhaya nak neyáwa, yaqwayam sa' elanok chá'a apyókxoho m'a ektáhakxa enxoho chá'a apyeykhágwayam.

Ezequiel 5:2

Wokmek sa' agkok néxa apwakhamap ma'a tegma apwányam, elwet sa' ektáhakxa nak ántánxo apkelyaqténma apwa' m'a nepyeseksa nak tegma apwányam; tén sa' natámen emok xama sawo, elyaqtennagkok nahan nepyáwa tegma apwányam ma'a mók nak apnegkenma apkelyaqténma m'a apwa', keñe sa' ma'a éleymomáxche nak, ekxák néten elchampaksek. Axog sa' ko'o neptámen ma'a énxet'ák apheykha nak tegma apwányam, yetlo sekmeykha sókwenaqte.

Ezequiel 6:14

Amha sa' ko'o sekmowána yaqwayam allegássesagkohok ma'a énxet'ák nak, atnessásekxak sa' ko'o apkelókxa ekmaso agko' ekyókxoho yókxexma apheykegkaxa nak chá'a énxet, eyeynamo m'a meykexa nak énxet ekpayho nak nepyeyam, ekweykmoho m'a Riblá ekpayho nak nexcheyha. Keñe sa' elya'ásegwók sektáha ko'o Wesse'.”

Ezequiel 6:6

Kólmasséssók sa' chá'a tegma apkelyawe ekyókxoho yókxexma kélhámxa enxoho chá'a kéxegke, élmasagcha'a agko' sa' katnekxak ma'a néten kélpeykessamókxa nak chá'a kéleykmássesso kélagkok. Kólnaqtawasha agko' sa' ma'a kélwatnamakxa nak chá'a aqsok, nekha'a étkók sa' katnekxak ma'a kéleykmássesso kélagkok; kólpalchesek sa' ma'a kélwatnamakxa nak chá'a aqsok ekmátsa agko' nak ekpaqneyam éten agkok; kamassegwók sa' ekyókxoho m'a aqsok kéllánéyak nak chá'a kéxegke.

Ezequiel 7:12

Wokmek kaxwo', xegakmek ekhem. Megkalpayhekxeyk sa' chá'a kaxwók apkelwáxok ma'a apkexakha nak chá'a aqsok, megkatnehek sa' nahan chá'a megkalyaqhápeykha apkelwáxok ma'a apkelma nak chá'a aqsok. Allegássesagkohok sa' ko'o yetlo seklo m'a énxet'ák apkeleymákpoho nak Israel.

Ezequiel 7:14

“Kapáwak sa' eykhe kélaqkahasso yaqwayam kampakhaxche'; elánekxak sa' aptamhágkaxa apyókxoho énxet, méko sa' eyke xama enxoho yaqwayam exog elnapakpok. Allegássesagkohok sa' ko'o yetlo seklómo ahagko' ma'a énxet'ák apxámokma nak Israel.

Nahúm 1:5

Kalpexyennók chá'a apmonye' m'a meteymog élwenaqte nak; kalpayhekxak chá'a apmonye' m'a xapop élekhahéyak nak. Kayawheykha chá'a xapop ekwet'a enxoho; tén han ma'a ekyókxoho yókxexma nak keso náxop, ekweykekxoho m'a ekhéyak nak awáxok.

Nahúm 2:10

Kélmasséssekmek Nínive, meyke xama aqsok tamhákxa', ekmaso táhak. Kelyelqáxcheyk apkelwáxok apkelaye, kelpexyennegkek aptapnák, apyókxoho massak apkelyennaqte, kelmópeykxeyk nápaqta'a.

Deuteronomio 28:64

Yexpánchesha sa' Wesse' egegkok elya'aksek ma'a ekyókxoho apkelókxa apheykegkaxa nak chá'a pók aptémakxa énxet'ák, eyeynamo m'a xama nekha nak xapop ekweykekxoho m'a mók nekha xapop nak, sa' kólpeykeshok chá'a mók aqsok kéláyókxa nak chá'a m'a, cham'a aqsok kéláyókxa élánamáxche nak chá'a m'a yántéseksek tén han ma'a meteymog, megkólweteya nak kéxegke tén han melweteya axta m'a kélyapmeyk nanók axta.

Deuteronomio 32:26

“Xénchek axta eykhe ko'o ewáxok waxpánchesek tén han amasseksek apkelxénamap keso náxop,

Deuteronomio 4:27

Yexpánchesha sa' kéxegke Wesse' egegkok elya'aksek ma'a nepyeseksa nak pók aptémakxa énxet'ák, kélqántawók kélagko' sa' kóleymaxchek kéxegke, wánxa sa' aqsa m'a kélheykha nak chá'a apkelókxa apkelya'asakxa enxoho chá'a m'a Wesse' egegkok.