Isaías 22:12 - Biblia Enxet

¹² Apkeláneyáha axta kéxegke Wesse' ekha nak apyennaqte apkeltamho kóllekxagwaha xa ekhem nak tén han kallapwomagkok, tén han kólmópésagkohok kélyese kólántaxnekxak ma'a apáwa sẽlwáxaqxamól'a magkenatchesso éllapwáméyak.

Isaías 22:12 ပူးပေါင်းရင်းမြစ်များ

2 Crónicas 35:25

Aptáxéssessek axta han Jeremías xama amya'a ekxeyenma nak senlapwayam, weykmók makham se'e negwánxa, élxeyenweykekxoho chá'a apkelwáxok apkelmeneykmasso, tén han kelán'a élmeneykmasso m'a Josías, negmeneykmasso ekxeyenma nak senlapwayam. Élmeneykmásamáxche han temék Israel xa negmeneykmasso nak, naqtáxésamaxcheyk han ma'a eknaqtáxésamaxchexa nak xa negmeneykmasso nak.

Esdras 9:3

Xama axta sekleg'a ko'o xa amya'a nak, élyepteyk axta sektaxno, eyepteyk axta han éwa', tén han áwa' ahátog, magkenatchesso seklegágkoho ekyentaxno ewáxok, ekheyk axta aqsa yetlo ekyaqhapmo ewáxok.

Nehemías 9:9

Apweteyak axta exchep ektémakxa apkellegeykegkoho ẽlyapmeyk nano' ma'a Egipto, apháxenmók axta han exchep apkellekxagweykha m'a neyáwa nak wátsam Ekwányam Ekyexwase.

Job 1:20

Tén axta apchampákxo néten Job, apkelyepteyk axta aptaxno aplegágkoho ekyentaxno apwáxok, apmópesawók axta apqátek aptegya'a apyese, keñe apháxahánto apkelpeykásawo m'a Dios.

Eclesiastés 3:11

Dios axta apkelane amonye' aqsok éltaqmela, appekkenchessegkek axta han apwáxok énxet néltémo nak agya'asagkohok yaqwánxa katnehek egmonye' tén han nentámen meyke néxa, neyseksa mey'áseyak eykhe m'a ekyókxoho aqsok ekyawe apkelane nak Dios, tén han ma'a apmáheyo nak chá'a elána'.

Eclesiastés 3:4

Yetneyk ekhem nenlekxagweykegkaxa', tén han néktegmeykegkaxa'. Yetneyk ekhem senlapweykenxa', tén han ekpayheykekxexa egwáxok.

Isaías 15:2

Apkelmeyákxeyk axta énxet'ák Dibón peya ellekxagwaha m'a tegma kélpeykessamókxa axta chá'a mók ektémakxa aqsok kéláyókxa m'a néten egkexe nak. Kellapwámegkek axta énxet'ák Moab kélmasséssekmo m'a tegma apwányam Nebo tén han ma'a Medebá. Apkelmópesawók axta chá'a apkelyese apyókxoho, apkelyéseságkek axta nahan chá'a áwa' apatña'ák.

Isaías 26:10

Elepyóshok sa' eykhe elanok xép ma'a élmasagcha'a nak apkeltémakxa, megkaltámeyagkek sa' eyke yaqwayam elanagkok aqsok ekpéwomo m'a; élmasagcha'a agko' apkeltémakxa nepyeseksa énxet'ák ekha nak apkelyeheykekxoho m'a, melya'ásegkok nahan ektémakxa nak apteme apwányam apagko' ma'a Wesse' egegkok.

Isaías 29:1

¡Tegma apwányam Ariel laye, tegma apwányam appakxenweykenxa axta m'a David! Elyeykhagkok sa' apagkok sekxók apyeyam xa yetlo m'a ekneywomáxche nak kañe',

Isaías 3:24

Kampak sa' ekpaqneyam ekmanyása ekyaqmageykekxa m'a sokmátsa; keñe sa' éltétamáxche katnehek ekyaqmageykekxa m'a táma'; keñe sa' ma'a éltaqmalma nak chá'a áwa', kayaqmagkasek ma'a meyke áwa' akqatkok; keñe sa' élántaxno apkelexyawáyól'a, etnehek apyaqmageykekxa m'a apáwa sẽlwáxaqxamól'a; keñe sa' ma'a éltaqmalma nak, kayaqmagkasek kélqaháseyak.

Isaías 32:11

Kéxegke, kélweynchámeykha nak meyke élyetnakhayo kélwáxok, kólyegwe'; kéxegke, ektaqmalma nak kélheykha kólpexyennem, kólhaxyawasák xa kélántaxno nak, kólántaxnekxa m'a apáwa sẽlwáxaqxamól'a magkenatchesso éllapwámeygko.

Isaías 37:1

Xama axta apleg'a wesse' apwányam Ezequías xa amya'a nak, apkelyepteyk axta apkelnaqta, apkelántaxnékxeyk axta m'a apáwa sẽlwáxaqxamól'a magkenatchesso élapwokmo, apmeyákxeyk axta m'a Wesse' egegkok tegma appagkanamap apagkok.

Isaías 37:2

Tén axta apkeláphasa, cham'a Eliaquim apkemha apmonye' axta m'a tegma apyawe aptaqmalma yetlo Sebná apnaqtáxéseyak axta chá'a weykcha'áhak tén han ma'a apkelmaxnéssesso Dios énxet'ák apagkok apkelwányamo nak, yetlo apkelántaxneykekxa m'a apáwa sẽlwáxaqxamo magkenatchesso éllapwámeygko elyo'ókxak ma'a Dios appeywa aplegasso Isaías, Amós axta apketche,

Isaías 58:3

keñe etnehek chá'a elpaqmétek se'e: ‘kaqhok mantewek nento mehenlano enxoho m'a Dios, kaqhok óghaxchek ma'a megkaxéna enxoho apwáxok.’ Megkóleyxek eyke chá'a kéxegke kólyanmagkasaxchek ma'a ekwokmo enxoho ekhem mantamakxa nento, kólhak chá'a m'a kélásenneykha nak;

Jeremías 16:6

Eletsapok sa' ekyawe nak kéláyo tén han meyke nak kéláyo s'e apchókxa nak; méko sa' kalátawanyek, tén han kalekxagwaha kalano', méko sa' nahan kalpexyekhasha émpehek kaxekmóshok élapwayam élányo, méko sa' nahan kamopaksohok ektegye ekyese.

Jeremías 16:8

“Ná etaxnegwom han xama tegma élánéxchexa enxoho ektámáxche ekyawe, yaqwayam enxoho etwohok xamók apto m'a énxet'ák, tén han ének xamók ma'a apyenéyak nak.

Jeremías 4:8

Kólántaxnekxa apáwa sẽlwáxaqxamo nak, kóllekxagwaha, kólápentegmakha kóllegagkohok ekmáske, hakte mehegkexeyk negko'o m'a Wesse' egegkok aplo.”

Jeremías 7:29

¡Énxet'ák Jerusalén, kólyaqtén kélwa', keñe sa' kólchexa'! ¡Kólmeneykmés sa' negmeneykmasso senlapwayam ma'a néten nak xóp eyáxñeyo meykexa nak xama aqsok! Hakte apkeltaqnaweygkek Wesse' egegkok ma'a énxet'ák kélagkok nak, apkexakke', apkelyetnakhássek nahan.

Ezequiel 27:31

Elmopaksohok sa' apkelyese eñama exchep, elántaxnekxak sa' ma'a apáwa nentaxneykekxohol'a eñama apketsapma egmók, ellekxagwaha sa' nahan yetlo ekyawe agko' élmayóseka apkelwáxok.

Daniel 5:1

Apkelanak axta ektámáxche ekyawe Belsasar, wesse' apwányam nak Babilonia, apkeláneyáha axta mil énxet'ák ekyawe nak kéláyo m'a apchókxa', apyenágkek axta vino yetlo wesse' apwányam ma'a ektáha axta apkeláneyeykha.

Oseas 9:1

Nágkólátsaha aqsa énxet'ák Israel; nágkólnextegmakha aqsa néten kalpayhekxak kélwáxok, aptamheykegko nak chá'a pók énxet'ák nak, hakte kélyamasmeyk Dios kélagkok eñama kélláneyak kéltémakxa ekmaso megkólmasexta'a. Atsek chá'a kóltamhok kólxawak ekyánmaga kélláneyak kéltémakxa megkólmasexta'a m'a kélchexakkassamakxa nak chá'a apyempe'ék ma'a hótáhap apaktek.

Joel 1:13

Kéxegke kélmaxnéssesso nak chá'a Dios énxet'ák apagkok, kéltamheykha nak chá'a ekwatnamáxchexa aqsok, kólántaxnekxa apáwa sẽlwáxaqxo nak, kóllekxagwaha yetlo éllapwámeyak, hakte méko entáhak aqsok kélcheneykekxa ekyexna m'a Dios nak tegma appagkanamap apagkok, tén han vino yaqwayam kóltéhek kélmésso naqsa Dios.

Joel 1:8

Máxa kelán'a étkok élekxagweykhal'a apketsapma ekpagkanma, ektaxneykekxal'a apáwa senlapwayam

Joel 2:12

“Aptáhak makham segáneya Wesse' egegkok se'e: hélyo'óta ko'o yetlo ekmámenyého agko' kélwáxok. ¡Nágkóltaw kéltéyak, kólwehesha, kóllekxagwaha!”

Joel 2:17

Kóllekxagwaha apkelmaxnéssesso énxet'ák ahagkok, apkeltamheykha nak chá'a sekhakxa ko'o sektáha nak Wesse', kólteme kólpaqmétek émha amonye' apwáxok nak tegma appagkanamap, tén han élwatnamáxchexa nak aqsok se'e: “Wesse', elásekhekxoho énxet'ák apagkok; nágyoho aqsa ey'ássók xama énxet enxoho m'a énxet'ák apagkok; nágyoho enaqtawasagkohok ma'a pók énxet'ák nak, nágyoho etnehek énxet melya'áseyak nak xép se'e: ¿Háxko aphakxa Dios apagkok?”

Amós 8:10

Kéllekxagweykegkaxa eñama apkeletsapma énxet sa' atnessásekxak ma'a ekhem kélessawassessamókxa nak chá'a, keñe sa' kélmeneykmasso katnekxak ma'a senlapweykenxa; wának sa' ko'o kólántaxnekxak kéxegke m'a apáwa sẽlwáxaqxamo nak, tén han kólmopaksohok kélyese magkenatchesso éllapwámegko. Máxa sa' kóltéhek kóllekxagwaha m'a aptémól'a énxet elekxagwaha exyánegkesek apketche apteme nak wánxa xama apagko', kélyókxoho sa' kalyélaqtések kéllegeykegkoho ekmáske.

Jonás 3:6

Xama axta nahan ekwokmo amya'a aphakxa m'a wesse' apwányam Nínive, apkempákxeyk axta néten aptaháno, aplekkek axta aptaxno aptaqmalma, aptaxneykxo m'a apáwa sẽlwáxaqxamo nak, keñe axta apha náxop.

Miqueas 1:16

Kéxegke, kélheykha nak tegma apwányam Sión, kólmopaksoho kéltegye kélyese, magkenatchesso éllapwáméyak, eñama m'a kélketchek kélásekhayo nak. Kólmopaksoho kélyese, ekwokmoho ektáha meyke agko' kélwa', ektémól'a máma apwenaqte, hakte kólnaqlakxak sa' megkatnahakxa apkelókxa m'a kélketchek nak kéxegke.”