Isaías 19:21 - Biblia Enxet

²¹ Eltennasakpok sa' Wesse' egegkok ma'a egipcios, keñe sa' elya'asagkohok Wesse' egegkok ma'a, elpeykeshok sa', elmések sa' nahan aqsok apkelnapma tén han ma'a aqsok apkelmésso naqsa. Eltennaksek sa' nahan aqsok apmáheyo elanagkok ma'a Wesse' egegkok, elanagkok sa' nahan.

Isaías 19:21 ပူးပေါင်းရင်းမြစ်များ

1 Reyes 8:43

yeyxho sa' xeyep ma'a aphakxa nak néten, egkés sa' xép ekyókxoho m'a aqsok apkelmaxnagko, yaqwayam sa' elyekpelkohok xép ma'a apyókxoho pók aptémakxa nak énxet'ák keso náxop, tén han yáwhok chá'a, aptamheykegko nak ma'a énxet'ák apagkok Israel, tén han elya'asagkohok ekxénamaxchexa apwesey s'e tegma appagkanamap nak, sélánésso axta ko'o exchep.

Salmos 61:8

keñe sa' alteméssesek chá'a ko'o eyeymáxkoho apwesey meyke néxa, alának sa' chá'a ko'o aqsok sekxeyenma alának yókxoho ekhem.

Salmos 67:2

yaqwayam sa' elya'ásegwók apyókxoho énxet'ák apheykha nak keso náxop, cham'a apmopmenyého nak, tén han ektémakxa nak segwagkasso teyp.

Salmos 68:31

Egipto sa' eleñék apkelámha apmonye'e kélásenneykha; elya'ássesek sa' néten apmék Dios elmaxneyagkok ma'a énxet'ák Etiopía.

Salmos 68:32

¡Kólmeneykmásses Dios kélheykha nak ekyókxoho apkelókxa keso náxop, kólmeneykmásses negmeneykmasso m'a Wesse' egegkok,

Eclesiastés 5:4

Apxénchek agkok elanaksek aqsok Dios, elanés ekmanyehe, hakte etaqnawhok chá'a Dios ma'a énxet ekyeyháxma nak. Elána m'a aqsok apxeyenma nak elána',

Isaías 11:11

Exekmósek sa' makham apmopwána Wesse' egegkok apmako sa' enaqlanták makham énxet'ák apagkok apkeleymomap xa ekhem nak, apnaqlósawákxo sa' makham ma'a Asiria, Egipto, Patros, Etiopía, Elam, Sinar, Hamat tén han ma'a apkelókxa ekhéyak nak neyáwa wátsam ekwányam.

Isaías 11:9

Méko sa' xama enxoho kalának ekmaso ekyókxoho m'a egkexe ekpagkanamaxchexa ahagkok nak, hakte kasawhekxohok sa' apya'áséyak Wesse' egegkok ma'a ekyókxoho nak apchókxa, sa' katnehek ma'a ektémól'a ekláneyo yegmen ma'a wátsam ekwányam.

Isaías 27:13

Kólpáwaksek sa' kélaqkahasso ekyennaqte ekpáwà xa ekhem nak, keñe sa' ma'a apkelxegánegwayam axta m'a Asiria, ekhawo nahan ma'a kélnaqleykekxa axta m'a Egipto, elmeyenták sa' Jerusalén elpeykessetámhok ma'a Wesse' egegkok, cham'a egkexe ekpagkanamaxchexa nak.

Isaías 37:20

Dios Wesse' egegkok, hẽlmallahanches negko'o neyseksa apmáheyo hẽlnápok ma'a asirios, yaqwayam sa' elya'asagkohok apyókxoho pók aptémakxa nak chá'a énxet'ák apheykha keso náxop, apteme exchep Wesse', wánxa xama Dios.”

Isaías 44:5

Sa' etnehek chá'a epaqmétek xama s'e: ‘Ko'o sekteme Wesse' egegkok énxet apagkok, keñe sa' pók elteméssesakpok chá'a Jacob aptáwen neptámen, keñe sa' pók elqahaksek chá'a awáxok apmek ektéma nak se'e: ‘Wesse' egegkok apagkok’, keñe sa' naw'a apwesey etnehek chá'a, Israel.”

Isaías 45:14

Aptáhak apcháneya Wesse' egegkok Israel se'e: “Elyelqakpok sa' aqsa nápaqtók xép ma'a énxet'ák Egipto apkeltamheykha nak chá'a yókxexma, tén han ma'a énxet'ák ekha nak chá'a aqsok apkexeykekxa m'a Etiopía, tén han ma'a énxet'ák Sabá, cham'a énxet'ák apkelwenaqte nak, apkelásenneykha naqsa sa' etnehek; elxog sa' neptámen xép yetlo kélpextete cadenas, eltekxeyagkok sa' aptapnák xóp apmonye' exchep tén sa' etnehek yának se'e: ‘Naqsók apha kélnepyeseksa kéxegke Dios, méko pók, méko pók kéláyókxa.’”

Isaías 49:7

Aptáhak Wesse' egegkok apcháneya énxet kélwanyémo kélagko' axta chá'a s'e, cham'a Dios Aptaqmalma nak Israel, segwagkassamo nak teyp, aptaqnagkamo apagko' axta chá'a m'a pók énxet'ák nak, aptéma axta chá'a apchásenneykha naqsa m'a kelwesse'e apkello nak: “Apwet'ak sa' agkok chá'a exchep ma'a kelwesse'e apkelwányam nak tén han ma'a pók kelwesse'e nak, elchempekxak sa' chá'a néten eltekxeyagkok aptapnák xóp apmonye' exchep hakte ko'o axta sélyéseykha exchep sektáha nak Wesse' Dios Sektaqmalma m'a Israel, alánhok chá'a ko'o m'a sekxeyenma nak alána'.”

Isaías 55:5

Elwónmakha sa' xép ma'a énxet'ák melya'ásegko nak; enaqtémegmak sa' elya'áwak xép ma'a énxet'ák melweteya nak, hakte ekteméssessegkek ko'o exchep ekha kéláyo ko'o sektáha nak Wesse' apagkok, Dios Aptaqmalma nak ma'a Israel.

Isaías 56:7

anaqlanták sa' ko'o m'a egkexe ahagkok ekpagkanamaxchexa nak alpeykessásekxak sa' apkelwáxok ma'a exagkok ektamhomaxchexa nak chá'a nempeywa nélmaxnagko. Almok sa' ko'o takha' aqsok apkelwatno tén han apkelnapma apnegkenweykekxa chá'a m'a néten nak ekwatnamáxchexa aqsok sélmésso, hakte eltamhakpok sa' ko'o exagkok ektamhomaxchexa nempeywa nélmaxnagko apagkok ma'a apyókxoho énxet'ák.

Isaías 60:7

Kélnaqtósso sa' kóltéhek kéxegke apyókxoho m'a nepkések apkeleñama nak Quedar; elyagqak sa' nahan kélheykegkaxa m'a nepkések apkelennay'a Nebaiot apnaqtósso nak, yaqwayam sa' kólmések chá'a Wesse' egegkok kólnegkenchesek ma'a néten nak kélwatnéssamakxa aqsok, kólteméssesek aqsok kélmésso naqsa ekleklamo nak apwáxok, keñe sa' kayágwomhok apteméssesso aptaqmalma apagko' ma'a tegma appagkanamap aptaqmalma apagkok nak.

Isaías 66:23

Elmeyenták sa' chá'a eltekxekwaták aptapnák emonye' ko'o apyókxoho énxet'ák yókxoho pelten, ekwákxo enxoho chá'a pelten aphaxnagkok, tén han yókxoho sábado. Ko'o sekxeyenma xa, sektáha nak Wesse'.

Jonás 1:16

Xama axta apkelwet'a ektáhakxa m'a apkeltamheykha nak yántakpayhe, apkelakawók apagko' axta Wesse' egegkok, tén axta apkelmésa aqsok apnaqtósso apkelnapma, apméssek axta nahan apkelpeywa apmako chá'a etnehek apkeláyo.

Habacuc 2:14

Kasawhekxohok sa' ekyókxoho keso náxop apkelya'áseykegkoho énxet'ák Wesse' egegkok apcheymákpoho, ektémól'a yegmen eksawheykekxohol'a ekláneyo m'a wátsam ekwányam.

Sofonías 3:10

Elmaxneyeynták sa' elchexyók énxet'ák ahagkok apkexpánma axta hélsantagkasek aqsok sélmésso naqsa, cham'a apheykha nak neyp wátsam Etiopía.

Malaquías 1:11

Apyókxoho pók aptémakxa énxet'ák chá'a ko'o etnehek seyáyo, ekyókxoho yókxexma chá'a hélwatnések ma'a aqsok ánek ekmátsa nak ekpaqneyam éten agkok, tén han hélmések chá'a aqsok sélmésso naqsa ekpayhawo nak chá'a hélmések.

1 Samuel 17:46

Hegkések sa' ko'o exchep ma'a Wesse' egegkok, sakhem sa' ko'o waqhek xép, keñe sa' ma'a sẽlpextétamo nak filisteos aphopák, almésagkok yaqwayam etawagkok máma, tén han aqsok nawha'ák éllo. Keñe sa' ekyókxoho nélwanmeygkaxa kólya'asagkohok apha xama Dios ma'a Israel.