Isaías 13:3 - Biblia Enxet

³ Élwóneyha ko'o m'a énxet'ák ahagkok apkelyennaqte nak, ekméssek nahan sekpeywa m'a kempakhakma yapmeyk ahagkok sélyéseykha nak, élpayheykekxoho nak chá'a apkelwáxok atnessásekxak kóneg ma'a sélenmexma, yaqwayam enxoho elanagkok chá'a m'a ektémakxa ko'o séllegassáseykegkoho.”

Isaías 13:3 ပူးပေါင်းရင်းမြစ်များ

Salmos 149:2

Israelitas, kalpayhekxa kélwáxok, kélteme nak énxet'ák Sión, hakte Dios apteme apkelane kéxegke, tén han Wesse' apwányam kélagkok.

Isaías 23:11

Apya'ássek axta apmek neyseksa wátsam ekwányam ma'a Wesse' egegkok, apkelpexyennegkessek axta apkelaye m'a pók aptémakxa nak chá'a énxet'ák, apkeltamhók axta kólmasséssók ma'a tegma apkelyennaqte nak Canaán.

Isaías 5:26

Apya'ássek néten bandera m'a Wesse' egegkok, apkelmóhéssek nahan apkelwóneyncha'a m'a énxet'ák apheykha nak makhawo'; apkeltamhók elxegmak ma'a énxet'ák apheykha nak makhawók agko' keso náxop. Kaxwók sa' nahan elwak ma'a, ekmanyehe agko' sa' elwa';

Jeremías 25:9

aláneyha sa' ko'o apyókxoho énxet'ák apheykha nak nexcheyha yetlo séláneykha Nabucodonosor, wesse' apwányam nak ma'a Babilonia, yaqwayam sa' elxegma', ektámegmak se'e apchókxa nak, yetlo apyókxoho énxet'ák apheykha nak kañe', tén han ma'a apyókxoho énxet'ák apheykha nak neyáwa'. Amasséssók sa' ko'o ekyókxoho. Meteymog ektaháneykekxa mók meyke néxa sa' atnessásekxa', negaye agweta', tén han segyegwakkassamo.

Jeremías 51:46

Nágkólyegwe', nágkóle kéllegeykha nak amya'a ektépeykha m'a apchókxa. Ekyókxoho apyeyam sa' chá'a katyapmakha mók ektémakxa amya'a, katyapmakha sa' amya'a negyennaqteyáseykha egyempehek ma'a apchókxa, tén han apkelenmexamap ma'a apkeltaqmelchesso nak chá'a apkelókxa.

Jeremías 51:53

Yántek sa' eykhe Babilonia m'a néten, yaqwayam epekkenwók netnók agko' ma'a apxagkok apyennaqte nak, aláphaksek sa' eyke han ko'o apkelenmexma m'a, yaqwayam emasséssók. Ko'o sekxeyenma xa, sektáha nak Wesse'.”

Joel 3:11

Kéxegke kélheykha nak neyáwa negókxa', ¡kólpekhésha, kólxegma heykxa kólaqnekxa'! ¡Kempakhakma yáp sa' etnekxak ma'a meyke aplo nak!

Sofonías 1:7

¡Kólwanmeyák sa' nápaqtók Wesse' egegkok, hakte chágketwa'ak ma'a Wesse' egegkok ekhem apagkok! ¡Appenchessek apkeláneykekxa aptáhakxa Wesse' egegkok yaqwayam elának aqsok ektekyawa, apkelpagkanchek nahan ma'a ektáha nak apkeláneyeykha!