15 Apyókxoho kélweteykekxa enxoho chá'a, kólyetxák sa' chá'a sawo, apyókxoho apkelmomap nak chá'a etekyók sa'.
Hakte apkenyahágkek apmonye'e m'a apkelmeykha nak sókwenaqte, sókwenaqte élmahamta nak, tén han ma'a yágke ketók kélyáteykxa nak tén han ma'a kempakhakma ekmaso agko' nak.
Apmeykásekxeyk átog Wesse' egegkok ma'a apxátamakxa nak chá'a apkelmeykha apkenchesso kempakhakma, apkelhaxyawássekxeyk apkelmeykha, hakte aplóke', yetneyk han aqsok yaqwayam elának Wesse' ekha nak apyennaqte neyseksa m'a caldeos apchókxa.
¡Kólnáhap apyókxoho m'a sẽlpextétamo apagkok nak, kólnaqlakxa yaqwánxa nak etekyók! ¡Apyósekak eyke eykhel'a! ¡Wokmek ekhem yaqwánxa kóllegássesagkoho'!
Xép chá'a wásenneykxak alyaqtennagkok ma'a énxet'ák, tén han kelán'ák, apkelwányam, tén han wokma'ák, wokma'ák apketkók tén han kelán'ák étkók.