Isaías 11:15 - Biblia Enxet

¹⁵ Emeykessesek sa' xama ámay Wesse' egegkok ma'a neyseksa Wátsam Ekwányam Ekyexwase nak, ey'aksek sa' apmek ma'a ekpayho nak wátsam Éufrates, etekkesek sa' éxchahayam ekyennaqte agko', kameykásekxak sa' neyseksa, siete aktegák sa' kalána', keñe sa' apwanchek elyeykhekxak meyke apkelhaxyawasso apkeltéto apmagkok.

Isaías 11:15 ပူးပေါင်းရင်းမြစ်များ

Éxodo 14:21

Apya'ássek axta apmék ekpayhókxa neyseksa wátsam ekwányam ma'a Moisés, tén axta Wesse' egegkok apcháphasa éxchahayam ekyennaqte agko' eñama m'a ekteyapmakxa ekhem, kexchahakmek axta nahan yókxoho axta'a m'a, tén axta ekmeykásekxo neyseksa élana ánet nekhaw'ék ma'a wátsam ekwányam nak. Xapop agko' axta aptemessásekxak Wesse' egegkok ma'a neyseksa wátsam ekwányam,

Éxodo 14:22

xapop agko' axta nahan apkelyeykhákxak ma'a israelitas, cham'a ánet nekhaw'ék ekmayheykekxa nak neyseksa m'a yegmen, xama axta m'a ekpayho nak nélya'assamakxa tén axta nahan mók ma'a ekpayho nak nensagqalwa.

Éxodo 14:29

Keñe axta m'a israelitas apkelyeykhákxo aqsa xapop agko' ma'a neyseksa nak wátsam ekwányam, cham'a neyseksa nak ekmayheykekxa m'a ánet nekhaw'ék yegmen, xama axta m'a nélya'assamakxa nak tén axta nahan mók ma'a nensagqalwa nak.

Isaías 19:16

Máxa kelán'a sa' etnahagkok egipcios xa ekhem nak; metwasha sa' yeyk apkelwet'a enxoho emáwhok ellegássesagkohok ma'a Wesse' ekha nak apyennaqte, elyegwáwhok apagko' sa' nahan.

Isaías 43:16

Apmeykessek axta xama ámay Wesse' egegkok ma'a neyseksa wátsam ekwányam, xama ámay neyseksa m'a yegmen ekyennaqte nak élyaqyahayam;

Isaías 44:27

Ewanchek ko'o wának keymék ma'a wátsam ekwányam nak tén han katnehek meyke yegmen ma'a wátsam étkók agkok nak.

Isaías 50:2

¿Yaqsa axta ektéma móteya ko'o xama énxet sekxók axta sekwaya? ¿Yaqsa axta ektéma méko seyátegmoweykegko m'a sélwóneykencha'a axta? ¿Kélanagkamcheya axta ko'o mowanchek alwagkasek teyp? ¿Kélanagkamcheya axta ko'o mowanchek alántekkesek neyseksa aqsok ekmaso? Megkatnohók ko'o apaqhetchesek altamhok keymék ma'a wátsam ekwányam nak tén han wának katnekxak ekyamayéxma m'a wátsam nak; yaqwayam enxoho kaletsapok hem át'ák ma'a kelasma tén han kaltahápok eñama meyke yegmen.

Isaías 51:11

Sa' etnahagkok han elwaták ma'a apkelwagkasso nak teyp ma'a Wesse' egegkok, elántexek sa' Sión yetlo apkelwehéseykha élpayheykekxa apkelwáxok; katnahagkok sa' chá'a élátseykha nápaqta'a; elwetak sa' élpayheykekxa apkelwáxok tén han apkeleñémo, kamassegwók sa' ma'a ektémakxa nak apkellekxagweykha tén han apkellegeykegkoho ekmáske.

Isaías 63:12

apkeltémo axta keytlawha apmopwána eyeymáxkoho m'a Moisés, apmeykáséykekxo axta neyseksa wátsam ekwányam apmonye'e m'a énxet'ák apagkok yaqwayam enxoho kólya'asagkohok chá'a ekyókxoho yókxexma, meyke néxa,

Isaías 7:20

Yásenneykxak sa' Wesse' egegkok wesse' apwányam Asiria xa ekhem nak, máxa sa' etnéssesek ma'a ektémól'a sawo kélmeykha naqsal'a eñama m'a teyp wátsam Éufrates, elmópésseshok sa' apqatkok elyésésagkok ma'a israelitas, tén han ma'a áwa' apatña'ák nak ekweykekxoho m'a áwa' apexchakkok.

Isaías 8:7

yáhakkasek sa' yegmen ekyawe ekyennaqte ényé wátsam Éufrates ma'a Wesse' egegkok, (wesse' apwányam Asiria m'a yetlo m'a ektémakxa nak apyennaqte). Kallanagkok sa' ekyókxoho m'a yegmen atamnek apagkok nak, kalántépok sa' ma'a neyáwa',

Ezequiel 29:10

Ekxénchek ko'o exchep aptáha sénmexma tén han ma'a wátsam apagkok nak. Atnessásekxak sa' ko'o exchep yókxexma meykexa énxet eyeymáxchexa tén han meyke xama aqsok, eyeynamo m'a Migdol ekweykekxoho m'a Asuán, tén han ekweykekxoho m'a néxa xapop nak Etiopía.

Ezequiel 30:12

Wának sa' ko'o keymék ma'a Nilo, keñe sa' agkések apchókxa m'a énxet'ák élmasagcha'a nak apkeltémakxa; sa' kañék ko'o sektawáseykha apchókxa xa énxet'ák apkeleñama nak mók nekha tén han ma'a ekyókxoho aqsok ekhéyak nak ma'a kañe'. Ekxénchek ko'o xa, sektáha nak Wesse'.

Zacarías 10:11

Alyeykhásekxak sa' ma'a wátsam ekwányam Egipto, atekpog sa' ko'o m'a yegmen nak. Eymaksohok agko' sa' yegmen ma'a wátsam Nilo. Amasséssesek sa' ektémakxa nak éleymáxkoho apkelwáxok ma'a énxet'ák Asiria. Amasséssesek sa' nahan ektémakxa nak apkelyennaqte m'a énxet'ák Egipto.