Isaías 11:14 - Biblia Enxet

¹⁴ Épetchekxak sa' pók ektamagkok ma'a énxet'ák filisteos, ekpayho nak taxnegwánxa ekhem, neptámen sa' yeñék yáhapwók; épetchekxak sa' pók elyementamagkok aqsok apagkok ekxámokma m'a énxet'ák apheykha nak teyapmakxa ekhem. Kawomhok sa' nahan apteme apagkok ma'a yókxexma Edom tén han ma'a Moab, apkeláneykha sa' etnahagkok ma'a amonitas.

Isaías 11:14 ပူးပေါင်းရင်းမြစ်များ

Isaías 14:29

Filisteos, nágkalpayhekxa aqsa kélwáxok kélekkexchesa m'a yámet kéltekyaweykencha'a axta chá'a, hakte sa' kañék katyapok xama yéwa m'a ekteyapmakxa nak chá'a m'a yéwa, katyapok sa' xama yéwa ekwányam ekmowána kampa'.

Isaías 15:1

Moab ekxénamaxche yaqwánxa kólteméssesek. Kéltawáseyha axta Moab cham'a axta'a kélmasséssekmo axta m'a Ar; kéltawáseyha axta Moab cham'a axta'a kélmasséssekmo axta tegma apwányam Quir.

Isaías 16:14

Aptáhak kaxwók Wesse' egegkok se'e: “Kólmasséssók sa' ektémakxa nak ekha ekyennaqte Moab ma'a ekwokmo sa' apqántánxo apyeyam, ektémól'a m'a xama énxet kélméssól'a aptamheykha ekweykmoho apqántánxo apyeyam, megkeyxek sa' apxámokma énxet apheykha m'a kañe', apqántawók apagko' sa' eleymakpok, mékoho sa' nahan etnahagkok.”

Isaías 25:10

Etaqmelchesek sa' Wesse' egegkok ma'a egkexe Sión, keñe sa' ma'a Moab elteyammaha, máxa sa' etnéssesek ma'a ektémól'a pa'at apák kélteyammeykhal'a m'a kélchexakhamakxa nak aqsok apák.

Isaías 33:1

¡Xép laye, apmassésseyam nak chá'a aqsok memassegwayam nak makham! ¡Xép laye, appelakkassesso nak chá'a esexnenak pók, megkólpelakkassesso nak makham kólsexnena'! Appenchessek sa' agkok apmassésseyam aqsok, kólmasséssók sa' xép, appenchessek sa' agkok appelakkassesso chá'a apsexnenagko pók kólpelakkassesek sa' xépxa kólsexnena'.

Isaías 59:19

Apyókxoho énxet sa' yáwhok Wesse' egegkok apkelwet'a sa' apcheymákpoho, eyeynamo m'a teyapmakxa ekhem nak ekweykekxoho m'a taxnegwánxa ekhem, hakte máxa yégayam ekyawe sa' etnehek éxyamok ma'a, ekyawheyáseykhal'a éxchahayam ekyennaqte agko'.

Isaías 60:14

Elya'áwak sa' kéxegke m'a apketchek nak énxet'ák apnaqtawáseykegkoho axta chá'a, eltekxeyagkok sa' aptapnák kélmonye'e, metwasha apagko' sa' elháxahagkok eltekxeyagkok aptapnák xóp kélchaqnágkaxa apyókxoho m'a ektáha axta chá'a apkelwanyeykha, eltéhek sa' nahan Jerusalén ‘Wesse' egegkok Tegma Apwányam apagkok’, ‘Dios Aptaqmalma nak Israel Sión apagkok’.

Isaías 63:1

—¿Yaqsa xa ekxegakmo nak eñama Bosrá, apyawakxa nak tegma agkok ma'a Edom, apkelyexwase nak apkelnaqta, apxegakmo nak apkeltaqmalma apagko' apkelnaqta, apyennaqtésakmo apagko' nak apyempehek apxegakmo? Ko'o xa, sekxeyenmo nak chá'a negmallanma, émeyhek han ko'o yaqwayam alwagkasek teyp.

Isaías 9:12

Énxet'ák Siria m'a ekpayho nak teyapmakxa ekhem, keñe filisteos ma'a ekpayho nak taxnegwánxa ekhem. Xama apketáméyak apsawhawo m'a énxet'ák Israel. Makke kamassak makham aplo m'a Wesse' egegkok; xénchek makham apwáxok ellegássesagkoho'.

Jeremías 40:11

Keñe axta nahan ma'a judíos apkelhayam axta m'a Moab, Amón, Edom, tén han ma'a mók apchókxa nak, apkelleg'a amya'a apchahayo apkelheykmo nápakha judíos xapop apagkok ma'a wesse' apwányam Babilonia, tén han apteméssessama apkeláneykha apchókxa m'a Guedalías.

Jeremías 48:40

Aptáhak Wesse' egegkok se'e: “Apketámegkek apkenmexma Moab, ektémól'a náta ekyawe élpeykessól'a axempenák kaktamagkok ekyógkexma.

Jeremías 49:2

“Ektáhak ko'o sekpeywa s'e, sektáha nak Wesse': Kammok sa' ekhem yaqwánxa wának ko'o kañexchek élpayheykha kélatña'ák kempakhakma m'a tegma apwányam Rabá apkelókxa nak ma'a amonitas; meteymog ektaháneykekxa mók sa' etnekxa', kamyetek sa' ma'a apheykegkaxa nak. Keñe sa' énxet'ák Israel elmekxak makham ma'a tegma apkelyawe apagkok axta. Ko'o sekxeyenma xa, sektáha nak Wesse'.

Jeremías 49:22

Ektamagkok sa' apkelenmexma m'a Bosrá, ektémól'a náta ekyawe élpeykessól'a axempenák kaktamagkok ekyógkexma, elpexyennók sa' kempakhakma yapmeyk Edom xa ekhem nak, máxa sa' etnahagkok ma'a kelán'a ekmáheyól'a katnehek naqláwa.”

Jeremías 49:28

Aptáhak Wesse' egegkok apkelxéna énxet'ák Quedar, tén han ma'a apkelámha apmonye'e nak Hasor, apkelmoma axta m'a Nabucodonosor, wesse' apwányam nak Babilonia: “¡Kólxeg, kólchetamák Quedar, kólmasséssem xa énxet'ák apheykha nak teyapmakxa ekhem!

Ezequiel 25:14

Axnéshok sa' ko'o mók setnéssessamakxa m'a énxet'ák Edom, énxet'ák ahagkok Israel sa' eyke wásenneykxa'; sa' etnéssesek Edom ma'a éltamhókxa enxoho etnéssesek ma'a seklo nak. Keñe sa' elya'ásegwók ektémakxa m'a sekhéssamo nak chá'a ko'o mók sélteméssesakxa. Ko'o sekxeyenma xa, sektáha nak Wesse'.

Daniel 11:41

Etaxnegwók sa' nahan ma'a Xapop Ektaqmalma, elnápok sa' apxámokma apagko' énxet'ák; elwagkasakpok sa' eyke teyp ma'a apheykha nak Edom tén han Moab, keñe han ma'a Amón, háwe eyke ekyókxoho m'a xapop nak.

Joel 3:19

Ekmaso sa' katnekxak ma'a Egipto, keñe sa' Edom katnekxak meykexa énxet, hakte apketámeykegkek axta m'a énxet'ák Judá, apkelnapmeyk axta énxet'ák meyke nak apkeltémakxa apheykha axta m'a.

Amós 9:12

yaqwayam sa' etnekxak makham apagkok Israel ma'a apkeleymomap nak ma'a Edom, tén han ma'a apyókxoho énxet'ák ektáha nak ko'o ahagkok.” Apméssek appeywa m'a Wesse' egegkok, elának sa' nahan.

Habacuc 1:8

Apmelyeyha'awók apagko' han apkenyahéyak apkelchánte yátnáxeg, apyeykhásseykmok ma'a ekwánxa nak ekyennaqte apkenyahéyak yánneptána, apkellómók apancha'awók nahan, apyeykhásseykmok ma'a aqsok nawha'ák éllo élleykha nak yókxexma meykexa énxet. Apxámok apagko' han chá'a etnehek enaqtégkesagkok apkelchánte yátnáxeg, makhawo chá'a elleñék ektamagkok ma'a apkelenmexma, ektémól'a náta ekyawe kathánek aqsok ekmáheyo kamok.

Sofonías 2:5

¡Kéxegkel'aye, énxet'ák Creta, kélheykha nak neyáwa wátsam ekwányam! Apxénchek Dios se'e yaqwánxa nak etnéssesek kéxegke: “¡Canaán, énxet'ák filisteos nak apchókxa, amasséssók sa' ko'o exchep, meyke énxet apheykha kañe' sa' atnessásekxa'!

Sofonías 2:7

Énxet'ák Judá sa' emekxak xa apchókxa nak, cham'a apkeleymomap nak meletsapma, apwa'akto sa' epásegwaták ma'a Dios Wesse' apagkok, apyaqmagkassesa sa' mók ma'a ektémakxa nak apheykha. Sa' elanha apnaqtósso nepkések ma'a, keñe sa' axta'a ellókassekxak chá'a apkelyampe m'a tegma apheykegko nak Ascalón.

Números 24:17

Ekwet'ak ko'o yaqwánxa katnehek egmonye', ekwet'ak ko'o makhawók agko' aqsok: yaw'a m'a aptepa nak aphakxa Jacob xama wesse' apwányam ma'a aptepa nak Israel. Eyaqhakkasek sa' apqátek ma'a Moab, eltepelchássesek sa' apqatkok ma'a apyókxoho nak Set aptawán'ák neptámen.

Jueces 6:3

Apkenákxeyk axta agkok chá'a aqsok ma'a israelitas, tén axta ektámenták chá'a m'a madianitas, tén han ma'a amalecitas, apheykha axta m'a ekteyapmakxa ekhem.