Isaías 10:3 - Biblia Enxet

³ ¿Háxko sa' kóltéhek kéxegke apkelyetsetchásekxo sa' kéltémakxa m'a Dios, kélwet'a sa' kaxegmak makhawók ma'a kéllegeykegkoho nak? ¿Yaqsa sa' kólyo'ókxak kólmaxnegwakxak yaqwayam kapasmok? ¿Háxko sa' kólnegkenwók ma'a aqsok kélagkok ekxámokma élmomnáwa nak?

Isaías 10:3 ပူးပေါင်းရင်းမြစ်များ

Génesis 31:1

Aplegayak axta chá'a Jacob apkelpaqméteykencha'a Labán apketchek, aptéma chá'a apxeyenma s'e: “Apkelmomchek Jacob ma'a ekyókxoho aqsok ektáha axta apagkok ma'a egyáp nak negko'o, cháxa ekteméssessama nak ekxákma aqsok apagkok.”

2 Reyes 7:15

Apkelyetlókek axta aptamnek sirios ekweykekxoho m'a Jordán, apkelwet'ak axta han chá'a ámay apxámokma apáwa apkexakha m'a sirios, tén han mók aqsok, eñama apkelpekhésso apkenyahéyak. Keñe axta apkeltaqháwo makham ma'a wesse' apwányam apkeláneykha, apkeltennássekxo ekyókxoho ektáhakxa apkelwete.

Job 31:14

Agkok ko'o atnahak xa, ¿háxko atnehek ko'o amyekxak nápaqto' Dios? ¿Háxko atnehek ko'o wátegmowagkok sélyetsetchásekxoho enxoho sektémakxa?

Proverbios 11:4

Mehempasmek sa' ekxámokma aqsok egagkok ma'a ekhem nélyekpelchamáxchexa sa', ektaqmalma nentémakxa sa' eyke hegwagkasek teyp ma'a nétsapmakxa nak.

Isaías 13:6

Kalpayheykha kélatña'ák, hakte chágketwa'ak ma'a Wesse' egegkok ekhem apagkok, máxa apkelyekpexchetma sa' katnehek kawak ma'a Ekha nak Apyennaqte.

Isaías 17:4

Kamaskok sa' ekyennaqte Samaria xa ekhem nak, eyaqheykencha'a nak chá'a apkelwáxok ma'a Jacob énxet'ák apagkok, kamassegwók sa' ma'a ektémakxa nak ektaqmalma apheykha énxet ma'a kañe'.

Isaías 20:6

Sa' etnehek elpaqmétek apyókxoho apheykha nak neyáwa wátsam ekwányam xa ekhem nak: ‘Kóllano ektáhakxa nélásenneykekxo nak chá'a, negye'eykekxo nak chá'a óltamhok hempasmok yaqwayam hegkexakkásekxak ma'a wesse' apwányam Asiria. ¿Yaqsa sa' kaxwók hẽlwagkasek teyp?’”

Isaías 26:14

Apkeletsekkek eyke m'a, menaqxétekhágwomek chá'a; pessesse aptamhágkokxa', melchempekxeyk chá'a néten hakte apkellegassásegkok xép, apmasséssekmek nahan, apmasséssekmók apagko' nahan apkelxénamap chá'a.

Isaías 26:21

Hakte etyapok sa' Wesse' egegkok ma'a aphamakxa nak chá'a yaqwayam ellegássesagkohok apkeltémakxa melya'assáxma m'a énxet'ák apheykha nak keso náxop, kamaskok sa' kakpósek kaxwók énxet apmatñà keso náxop, yáxñakxoho sa' kapekkenekxak ma'a ektémakxa nak chá'a ekyetno apyógkexma énxet ma'a kañe'.

Isaías 28:20

Sa' kóltéhek ma'a ektémól'a agyetek negyetnamakxa néten ketse' magmowánal'a ólpéwak agyetek, tén han ektémól'a agaqlaxchek ma'a yát'apáwa apyaqwátamól'a.

Isaías 30:16

kéltáhak aqsa kélpaqmeta s'e: “Ma', tásek eyke negko'o ólxog ólchántek yátnáxeg ólxeganmok.” Hoy táse', kólteme sa' kólxeganmok xa ektáha nak. Kéltáhak nahan kélpaqmeta s'e: “Ólchántek sa' yátnáxeg apkelyenyawasso élyennaqte nak ényahéyak.” Táse', apmelyeha'ak sa' etnehek apkenyehéyak ma'a ektáha nak apmenxenma.

Isaías 30:5

apyókxoho sa' eyke elmegqágwakxohok eñama xa énxet'ák megkamopwána nak epasmok pók, mesókáseyam nak ma'a aqsok yaqwayam kapasmok tén han ekpayhawo nak kólmaha, wánxa aqsa m'a eyaqhémo nak anleyxmakha tén han ekmaso negha.”

Isaías 30:7

megkalmopwancha'a nak elanagkok xama aqsok, megkalmopwancha'a nak epasmok pók. Cháxa keñamak sekteméssessama nak ko'o apkelwesey: “Yéwa ekwányam ekyexwéweykha naqsa méko xama aqsok kalána'”.

Isaías 33:14

Apkelpexyennegkek éltamheykha apkelwáxok énxet melya'assáxma m'a Sión, apkelyegwakkók apagkók ma'a énxet'ák élmasagcha'a nak apkeltémakxa, aptáhak apkelpaqmeta s'e: “¿Yaqsa enxama negko'o apwanchek exek neyseksa m'a táxa ekmassesseykmoho nak aqsok, cham'a eyáléwe ekyawe meyke néxa nak?”

Isaías 39:3

Tén axta m'a Dios appeywa aplegasso Isaías apya'aweykxo m'a wesse' apwányam Ezequías. Aptáhak axta apkelmaxneyáncha'a s'e: —¿Háxko apkeleñamakxa m'a énxet'ák nak? ¿Háxko aptáhakxa apcháneya? Aptáhak axta Ezequías apchátegmowágkokxo s'e: —Apkeleñamak ma'a apkelókxa makhawo' nak; cham'a Babilonia.

Isaías 5:14

Mayhak ekyawe agko' átog ma'a takhaxpop, máxa m'a xama aqsok nawhak eklól'a kamayhek, yaqwayam kalmenaqsapok ma'a énxet'ák ekweykekxoho m'a apkelámha apmonye'e apagkok, cham'a énxet'ák ekmátsa nak chá'a eneywagkok yetlo apyennegkessóxma.

Isaías 5:26

Apya'ássek néten bandera m'a Wesse' egegkok, apkelmóhéssek nahan apkelwóneyncha'a m'a énxet'ák apheykha nak makhawo'; apkeltamhók elxegmak ma'a énxet'ák apheykha nak makhawók agko' keso náxop. Kaxwók sa' nahan elwak ma'a, ekmanyehe agko' sa' elwa';

Jeremías 22:7

Wának sa' ko'o exchep ey'áwak ma'a apkelempakhayo nak chá'a, yaqwayam emasséssók xép. Elyaqténchesek sa' ma'a yámet élámha éltaqmalma, élánamáxche nak yámet cedro, keñe sa' ekxák nátex.

Jeremías 4:30

Tegma apwányam, aptamhákxo nak nápakha'a apketkók, ¿yaqsa ektáha aptaxnékxo nak apáwa hómáyok? ¿yaqsa ektáha apwakhésakpo nak aqsok étkók éltaqmalma sawo ekyátekto élmomnáwa? ¿yaqsa ektáha apkelpeysegkesa nak apaqta'ák? Kaqhok etaqmelchesakpok elnáxamha, aptaqnawágwokmek kaxwók xép ma'a apkelásekhayókxa nak, peyk yaqhek kaxwo'.

Jeremías 5:31

Wanchek amya'a m'a apkelxeyenma nak chá'a Dios appeywa apkellegasso; etnahagkok nahan chá'a apmakókxa enxoho etnahagkok apkeláneykha apchókxa m'a apkelmaxnéssesso nak Dios énxet'ák apagkok, ¡kalkohok nahan apkelwáxok énxet'ák ahagkok katnehek xa ektáha nak! ¿háxko sa' eyke kéxegke kóltéhek ekwokmo sa' néxa ekhem?’”

Jeremías 9:9

¿Mallegássesagkóya sa' ko'o eñama apkeláneyak xa aqsok nak? ¿Matnésseseya sa' ko'o ekpayhawo nak atnéssesek séllegassáseykegkoho énxet'ák aptamhéyak nak xa ektéma nak? Ko'o sekxeyenma xa, sektáha nak Wesse'.

Oseas 5:13

“Apwet'ak sa' agkok Efraín apháxekpo, apwet'ak sa' agkok apkelyense m'a Judá, emhagkok sa' Efraín ma'a Asiria etegyaha yaqwayam epasmok ma'a wesse' apwányam ekyawe nak kéláyo, mopwanchek sa' eyke eltaqmelchessók, mopwanchek sa' han eltaqmelchessessók ma'a apkelyense nak.

Oseas 9:5

¿Yaqsa sa' kóllának kéxegke kélessawássessamókxa nak chá'a Wesse' egegkok?

Oseas 9:7

¡Wokmek kaxwók yaqwánxa kóllegássesagkoho'! ¡Wokmek kaxwók yaqwánxa kólyaqmagkásekxak ekpayhawo nak kólteméssesek! ¡Ey'asagkohok sa' eyke Israel ekwokmo enxoho xa ekhem nak! Kéltemék chá'a kéxegke s'e: “Ekyeyháxma m'a Dios appeywa aplegasso nak. Ekyeyháxma m'a énxet apha nak apwáxok espíritu.” Kéltemegkek chá'a kéxegke kélpeywa xa ektáha nak, hakte láneyók kélwáxok ma'a kéltémakxa ekmaso, kéllómok kélagko'.

Amós 5:19

Sa' katnehek ma'a ektémól'a xama énxet yenyehek étak méwa, keñe ethanyohok xama óso, essenhan ma'a ektémól'a énxet aptaxnegweykekxal'a kañe' apxagkok, apyepetchegweykekxal'a nápakha tegma, keñe katakxek yéwa.

Miqueas 7:4

Máxa yámet ekha nak am'ák apkelxénamap nak chá'a éltaqmalma apkeltémakxa xa énxet'ák nak, máxa pegke m'a apkelxénamap nak chá'a ekha kéláyo. Xegakmek eyke ekhem yaqwánxa kólyaqmagkásekxak apkeltémakxa, apkeltennassama axta m'a énxet apkelhaxneykha cham'a aplegasso nak Dios appeywa. Keñe sa' katyapok nepyeseksa melya'áseyak aptamhágkaxa.

Sofonías 1:18

Megkalwagkasek sa' teyp sawo ekmope élmomnáwa tén han sawo ekyátekto élmomnáwa apagkok énxet'ák ma'a ekhem, aplawa sa' Wesse' egegkok, hakte kasawhohok sa' Wesse' egegkok aplo ekyókxoho apkelókxa ektémól'a táxa kalwatnek aqsok. ¡Ekmanyehe agko' sa' kólmasséssók apyókxoho apheykha nak keso náxop!

Deuteronomio 28:49

Ektágkásegmak sa' kéxegke Wesse' egegkok ma'a énxet'ák apkeleñama nak apchókxa makhawók agko' keso náxop, cham'a énxet'ák megkólmowána nak kéxegke m'a apkelpeywa. Máxa sa' etnahagkok ma'a ektémól'a náta meyke ahekhek ekyennaqtél'a kampa';