Isaías 1:11 - Biblia Enxet

¹¹ Aptáhak Wesse' egegkok se'e: “¿Yaqsa ektáha sélsántegkesa nak ekxámokma kélnaqtósso kélnapma? Élekleykmek ko'o m'a nepkések apkelennay'a nak kélwatno tén han ma'a weyke étkók pexmok agkok nak; ektaqnawágweykmek ko'o m'a weyke kelennay'a nak éma agkok tén han ma'a nepkések apkelennay'a nak tén han ma'a yát'ay apketkók nak éma apagkok.

Isaías 1:11 ပူးပေါင်းရင်းမြစ်များ

Salmos 40:6

Mopmenyeyk xép ma'a kélnaqtósso ektekyawa nak, tén han ma'a aqsok kélcheneykekxa ekyexna kélmésso naqsa nak chá'a; meltémók han kólsakxések ma'a aqsok kélwatno nak, tén han ma'a aqsok kélmésso naqsa ekmasséssamo nak magya'assáxma. Enegkenchessegkek xép eheyk'ák yaqwayam aña'.

Salmos 50:8

Mataqnawássessók ko'o m'a kélnaqtósso kélnapma, tén han aqsok kélwatno sélméssama nak chá'a ko'o.

Salmos 51:16

Hakte mopmenyeyk xép ma'a aqsok ektekyawa tén han ma'a aqsok ekwatnamáxche nak; agkések eykhe ko'o exchep xa, háwe eyke m'a ekpeykessáseykekxohol'a apwáxok.

Proverbios 15:8

Etaqnawhok Wesse' egegkok aqsok apchaqhássesso m'a énxet élmasagcha'a nak apkeltémakxa', yetlo ektaqmeleykha apwáxok eyke chá'a emok takha' nempeywa nélmaxnagko apagkok ma'a énxet apkelpéwomo nak.

Proverbios 21:27

Eltaqnawásseshok Wesse' egegkok aqsok apkelmésso naqsa m'a énxet'ák élmasagcha'a nak apkeltémakxa', hakte yetlo ekmaso élchetámeykha apkelwáxok chá'a elmések.

Proverbios 21:3

Nenlane nak nentémakxa ekpéwomo tén han nenláneseykekxa ektaqmela apheykha m'a énxet'ák, cháxa ekleklamókxa nak apwáxok Dios antéhek xa, kaxnók ma'a kélnaqtósso ektekyawa nak negmésso.

Isaías 58:2

Yókxoho ekhem ko'o sétamso xa énxet'ák nak atsek apkeltémo elwetekxak ma'a ámay ahagkok, máxa m'a énxet'ák apkeláneykegkohol'a aqsok ektaqmela, meyamasmal'a m'a segánamakxa ahagkok; élmaxnagkamchek ma'a segánamakxa ahagkok ekpéwomo nak, atsek chá'a emáwhok hépetchegwatámhok ko'o,

Isaías 66:3

Yetneyk eyke nahan ma'a apkelnapma nak chá'a weyke kelennay'a, tén han ma'a apkelnapma nak chá'a énxet; apyaqténchesso nak chá'a apyespok ma'a nepkések tén han apwápakhe nak chá'a m'a semheg; tén han apkelmésso nak chá'a aqsok aktek kélcheneykekxa tén han yátapomap éma apagkok; tén han apkelwatno nak chá'a aqsok ekmátsa nak ekpaqneyam éten agkok, apkelpeykessamo nak chá'a m'a kéleykmássesso. Apmenyeyk elanagkok ekyókxoho apkelyéseykha nak chá'a xa ektéma nak élánamáxche aqsok ekmaso agko'.

Jeremías 6:20

¿Yaqsa ektáha sélsántegkesa nak ko'o kéxegke aqsok ánek ekmátsa nak ekpaqneyam éten agkok éleñama nak Sabá, tén han yámet ekmátsa nak ekpaqneyam éleñama nak ma'a apkelókxa makhawók agko'? Megkalchek ko'o ewáxok ma'a aqsok kélwatno nak, tén han ma'a mók aqsok kélnaqtósso kélnapma nak.”

Jeremías 7:21

Aptáhak apkeláneya énxet'ák apagkok Wesse' ekha nak apyennaqte, Dios apagkok nak Israel: “Kólmés sa' ekyókxoho aqsok yaqwayam kólwatnek, tén han kélnaqtósso ektekyawa kélmakókxa enxoho, kóltawák sa' nahan xa ápetek nak.

Oseas 6:6

Wánxa eyke aqsa seyámenyého ko'o kéxegke hélásekhoho', maltamhók hélnáhakkasek ma'a aqsok kélnaqtósso; éltamhók kólya'asagkohok sektáha ko'o Dios, maltamhók hélwatnések ma'a aqsok kélnaqtósso.

Oseas 8:13

Aqsok ektekyawa aqsa apmenyeyk ma'a, keñe elnápok chá'a, etawagkok chá'a ápetek ma'a aqsok ektekyawa nak; megkalchehek eyke chá'a ko'o ewáxok xa aqsok nak, ko'o sektáha nak Wesse'; kaxének sa' ewáxok ma'a apkeltémakxa ekmaso apkeláneyak nak, allegássesagkohok sa' eñama melya'assáxma wának eltaqhohok makham ma'a Egipto.

Amós 4:5

Kólwet sa' kelpasmaga meyke nak kempáseyak kélmésso naqsa nak chá'a eñama kélmésso ekxeyenma kélwáxok, kóltennasák nahan ekyókxoho yókxexma m'a aqsok kélmésso naqsa ekxeyenma agko' nak kélwáxok yaqwayam kólmések, hakte cháxa ekleklamo nak chá'a kélwáxok kéxegke kóltéhek xa ektáha nak.” Wesse' egegkok apxeyenma xa.

Amós 5:21

“Ataqnawhok agko' ko'o m'a ekhem kélessawássessamókxa nak chá'a; megkalchek ewáxok ma'a ektémakxa nak chá'a kélaqneykekxa hélpeykesho'.

Amós 5:22

Mómenyeyk ko'o m'a aqsok kélwatno sélwatnésso nak chá'a ko'o, tén han ma'a sélmésso naqsa nak chá'a aqsok aktek ekyexna kélcheneykekxa; malmehek sa' ko'o takha' m'a weyke étkók eknaqmele kélnapma ekwetassamól'a chá'a kélásekhamaxchekxoho.

Miqueas 6:7

¿Kapayhekxaya sa' apwáxok Wesse' egegkok, sélmésa enxoho ko'o mil nepkések apkelennay'a, essenhan diez mil litro pexmok égmenek? ¿Essenhan sekmésa enxoho hatte átnaha apketkok, ekyánmaga sénmexeykekxa Dios, tén han may'assáxma?

Hageo 2:14

Keñe axta aptáha Hageo s'e: “Aptáhak Wesse' egegkok se'e: Hawók ektémakxa nak se'e énxet'ák nak: ekyókxoho aqsok apkeláneyak nak ekteme élmanyása, tén han ma'a aqsok sélmésso nak chá'a.

Zacarías 7:5

“Etne sa' elának apyókxoho énxet'ák apheykha nak apkelókxa s'e tén han ma'a apkelmaxnéssesso nak énxet'ák ahagkok: ‘Setenta apyeyam apwokmok kélláneyak kéxegke m'a manto nak nento tén han éllapwáméyak, cham'a ekwákxo enxoho chá'a pelten cinco, tén han pelten siete. Háwe eyke yaqwayam héláwhok chá'a ko'o kélláneykegko xa,

Malaquías 1:10

“¡Kólápekxoho annal'a kélxama kéxegke m'a apátog nak tegma appagkanamap, yaqwayam enxoho megkaqhók makham kóláléwássekxak táxa m'a ekwatnamáxchexa nak chá'a aqsok ahagkok! Massegkek ko'o ekleklamo ewáxok alanok kéxegke, mómenyeyk kaxwók amok takha' m'a kélmésso naqsa nak aqsok kéxegke.

1 Samuel 15:22

Keñe axta Samuel aptáha s'e: “Wánxa eyke aqsa kapeykesekxak apwáxok Wesse' egegkok kélyahákxoho enxoho, kaxnók kólmések ma'a aqsok ektekyawa nak, keñe han ma'a kélwatno nak; tásek kólyahakxoho, tén han kóleyxhok chá'a appeywa, kaxnók kólmések ma'a aqsok ektekyawa, tén han ma'a nepkések apkelennay'a nak pexmok apagkok.