Habacuc 3:3 - Biblia Enxet

³ Apxegakmek Dios apkeñama m'a yókxexma Temán; egkexe Parán apkeñamak apxegakmo m'a Dios Appagkanamap. Sawheykekxók apcheymákpoho m'a ekyókxoho nak néten, cháxa keñamak kélpeykessamo nak ekyókxoho keso nélwanmégkaxa'.

Habacuc 3:3 ပူးပေါင်းရင်းမြစ်များ

Génesis 36:11

Keso Elifaz axta apketchek se'e: Temán, Omar, Sefó, Gatam, tén han Quenaz.

1 Reyes 11:18

Apkelánteyepmeyk axta Madián, keñe apkelweykmo m'a yókxexma Parán, apkelmomakxa axta nápakha énxet'ák yaqwayam etnehek apkeláneykha. Apkelweykmek axta Egipto keñe apkelmaheykegko m'a aphakxa axta faraón, wesse' apwányam Egipto, apkelmeyásegkek axta apxanák tén han aptéyak, apkelmeyásegkek axta aqsa han apkelmésso naqsa m'a xapop.

Salmos 113:4

Wesse' egegkok apteme néten agko' nepyeseksa m'a apyókxoho énxet'ák; ¡yetnegkek apcheymákpoho m'a teyp yaphope nak!

Salmos 148:13

¡Kólpeykesho kélyókxoho Wesse' egegkok apwesey, hakte wánxa ekteme meyke ekhémo apwesey m'a! ¡Hakte cha'a apteme ekyeykhágweykmoho apcheymákpoho néten ma'a, tén han keso náxop!

Salmos 3:2

¡apxámok apagko' énxet'ák apteme nak chá'a ko'o sexeyenma s'e: “Mewagkasek teyp Dios!”

Salmos 3:4

Magweyságkohok ko'o sekwóneyncha'a Wesse' egegkok séltamho hepasmok, tén seyátegmowágko m'a ekpayhókxa nak egkexe apagkok ektaqmalma.

Salmos 4:4

¡Kóláwho sa', kólwátésák kélláneyak megkólya'assáxma! Kólhák kaxwo', meyke kélpaqméteykha, kólxénekxa kélagko' ma'a ektémakxa nak élchetamso kélwáxok;

Salmos 48:10

Oh Dios, kólteméssesek chá'a exchep apcheymákpoho ekyókxoho keso náxop, ekhawo ektémakxa nak ekxénamaxche' apwesey, hakte yetlo apmopwána chá'a exchep etaqmelchessásekxak apheykha m'a énxet'ák.

Salmos 68:17

Xámok agko' yátnáxeg apkelyenyawasso apagkok ma'a Dios; Sinaí apkeñamak apmeyánto m'a tegma appagkanamap apagkok, yetlo m'a yátnáxeg apkelyenyawasso nak.

Salmos 9:16

Apkeltennásamákpek aptémakxa m'a Wesse' egegkok: ¡apkelánekxésso chá'a apheykha énxet'ák ekpéwomo aptémakxa! Kalmekxohok chá'a agkok kelhanma apnegkenéyak ma'a élmasagcha'a nak apkeltémakxa.

Salmos 9:20

Wesse', elyegwakkas xép, ¡yána elya'asagkohok aptamhéyak aqsa énxet!

Éxodo 20:18

Apyókxoho israelitas axta nahan apteme apkelweteykegkoho m'a takha' appáwà axta tén han ma'a apkelyenmayam axta, tén han ma'a ekpáwà axta kélaqkahasso, tén han ekhaxnencheykmo axta éten ma'a egkexe nak; apkelakak axta eyke, apchaqnágwa'ak axta aqsa m'a makhawo'.

Isaías 31:1

¡Énxet'ák laye, apkelmeyeykekxa nak chá'a Egipto aptegyeykha ekpasmo, apkeláyo nak chá'a m'a ekha nak yátnáxeg apkelchánte, apkeláyo nak chá'a m'a ekxámokma nak yátnáxeg apkelyenyawasso apagkok, tén han apteme nak apkeláyo m'a énxet apxámokma apkelchánte nak yátnáxeg, keñe melenmexeykekxoho m'a aphakxa nak Dios Aptaqmalma nak Israel, melchetamsók ma'a Wesse' egegkok!

Isaías 6:3

Axta aptáhak nahan chá'a apcháneya pók se'e: “Aptaqmalma, aptaqmalma, aptaqmalma Wesse' egegkok ekha nak apyennaqte; sawheykekxók apcheymákpoho ekyókxoho keso náxop.”

Isaías 64:3

Kelpexyennegkek axta exchep nápaqtók meteymog élekhahéyak, apweywento axta apkelana m'a aqsok segyegwakkassamo nak agweta' mólhaxanma axta katnehek.

Jeremías 49:7

Aptáhak Wesse' ekha apyennaqte apkelxéna énxet'ák Edom se'e: “¿Mékoya táhak negya'áseykegkoho aqsok ma'a Temán? ¿Ya elya'ásegkok kaxwók aptamhágkaxa m'a apmopwancha'a nak aqsok? ¿Massegwokmeya m'a apkelya'áseyak nak aqsok?

Ezequiel 43:2

ekwet'ak axta ekxegakmo Israel Dios apagkok élseyéxma apagkok ma'a ekpayho nak teyapmakxa ekhem. Nenleg'awók axta nahan éxtegyawa ekyennaqte agko', máxa axta m'a wátsam ekyennaqtél'a ekpáwà awáxok yegmen ényé, keñe axta m'a xapop nak keltátchessek axta.

Amós 1:12

Cháxa keñamak peya nak ko'o awatnek ma'a tegma apwányam Temán, kamasséssók sa' tegma apkelyawe nak Bosrá xa táxa nak.”

Abdías 1:9

Elpexyennók sa' apkelaye m'a kempakhakma yapmeyk nak Temán, megyeymakpehek sa' xama enxoho énxet ma'a egkexe élekhahéyak nak ma'a Esaú.

Habacuc 2:14

Kasawhekxohok sa' ekyókxoho keso náxop apkelya'áseykegkoho énxet'ák Wesse' egegkok apcheymákpoho, ektémól'a yegmen eksawheykekxohol'a ekláneyo m'a wátsam ekwányam.

Números 10:12

Apkelxegákxeyk axta makham ma'a israelitas, apkelántekkek axta m'a yókxexma meykexa nak énxet Sinaí. Yetnakmek axta yaphope m'a yókxexma meykexa nak énxet Parán.

Deuteronomio 33:2

Aptáhak axta s'e: “Sinaí apkeñamak ma'a Wesse' egegkok; Seír axta apkeñamak apwaya negyeseksa. Chápogwategkek axta élseyéxma apagkok ma'a egkexe Parán apxegeykmek axta apkeñama m'a Meribá-cadés; apmek apkelya'assamakxa axta ensókaseykmok ma'a segánamakxa táxa eyáléwe nak.

Deuteronomio 5:24

Axta kéltemék sélanagkama s'e: ‘Naqsók senxekmósa negko'o Dios Wesse' egegkok ma'a apcheymákpoho tén han ma'a apmopwána, nenleg'ak nahan appeywa ektepa m'a neyseksa táxa eyáléwe. Sakhem negko'o negwet'a Dios apmopwána elpaqhetchesek énxet meyke yaqwayam eletsapok.

1 Samuel 25:1

Apketsekkek axta Samuel, keñe apchaqnákxo apyókxoho énxet'ák Israel apkellekxagweyncha'a eñama apketsapa m'a. Apxagkok axta kélátawanyak, ekpayho nak Ramá. Keñe axta David apmahágko m'a meykexa énxet nak Parán.