Habacuc 2:8 - Biblia Enxet

⁸ Épetchekxak sa' pók, pók aptémakxa énxet'ák yenmexek xép, elyementók sa' aqsok apagkok, ekhawo aptémakxa axta chá'a exchep, apkelyementamoma aqsok apagkok ma'a. Exnéshok sa' mók ma'a ekyókxoho aptémakxa ekmaso axta, apyennaqteyáseykencha'a axta apyempehek ma'a apchókxa, apkenmexma axta m'a tegma apkelyawe nak, yetlo énxet'ák apheykha m'a kañe'.

Habacuc 2:8 ပူးပေါင်းရင်းမြစ်များ

Salmos 137:8

¡Babilonia, kólmasséssók sa' xép! ¡Apkeleñémo apteméssesso nak ekpayhawo etnéssesek senteméssessamakxa axta negko'o!

Proverbios 22:23

hakte Wesse' egegkok sa' epasmok ma'a, keñe sa' eñássesagkohok ma'a ektáha nak chá'a apnaqtawáseykegkoho.

Isaías 33:1

¡Xép laye, apmassésseyam nak chá'a aqsok memassegwayam nak makham! ¡Xép laye, appelakkassesso nak chá'a esexnenak pók, megkólpelakkassesso nak makham kólsexnena'! Appenchessek sa' agkok apmassésseyam aqsok, kólmasséssók sa' xép, appenchessek sa' agkok appelakkassesso chá'a apsexnenagko pók kólpelakkassesek sa' xépxa kólsexnena'.

Isaías 33:4

máxa sawa' apxámokmal'a apkelenmexma xa énxet'ák nak, apcháhapwokmek agkok chá'a ektamagkok, elyementamagkok chá'a m'a aqsok apagkok ekyetnakxa nak.

Isaías 47:6

Ekméssegkek axta ko'o yaqwayam elmegqék énxet'ák ahagkok ahagko' ma'a séltaqnaweykegko axta énxet'ák ahagkok, tén axta séltémo kalmok xeye'. Axta kalmopyósak élányo exche' m'a, kelhayak axta aqsok ekyentaxno agko' ma'a apkelwányamo nak.

Jeremías 27:7

Apkelásenneykha sa' etnehek ma'a apyókxoho pók aptémakxa énxet'ák nak, ekweykekxoho m'a apketche, tén han aptáwen, ekwokmoho sa' nahan ekmáxko m'a Babilonia. Apkelásenneykha sa' etnehek ma'a pók énxet'ák apkelókxa élyawe nak, tén han ma'a kelwesse'e apkelwányam apkelyennaqte nak.

Jeremías 30:16

Kólmasséssók sa' eyke nahan apyókxoho m'a apmassésseyam nak chá'a kéxegke, kólnaqlakxak sa' nahan megkatnahakxa apkelókxa apyókxoho m'a kélenmexma nak; wának sa' ko'o kólyementamagkok aqsok apagkok ma'a apkelyementaméyak nak chá'a aqsok kélagkok, wának sa' nahan kólmenyexchesagkok aqsok apagkok ma'a apkelmenyexchesso nak chá'a aqsok kélagkok kéxegke.

Jeremías 50:14

“¡Kóllánekxa kélchaqneykha kélmeykha nak yágke, kólwakhegwom Babilonia! ¡Kólyáta' ekyókxoho yágke aktek kélagkok, hakte apkeláneykegkek melya'assáxma nahaqtók ko'o m'a, sektáha nak Wesse'!

Jeremías 50:28

(Apkelwákxeyk Sión ma'a énxet'ák apkelxegányam nak apkeleñama Babilonia, apkeltenneyncha'a ektáhakxa apyaqmagkáseykekxa Dios Wesse' egagkok apkeltémakxa m'a énxet'ák Babilonia, eñama apteméssessamakxa axta m'a tegma appagkanamap nak.)

Jeremías 50:37

¡Kólnáhap ma'a sẽlpextétamo apagkok: elpexyennók sa' apkelaye! ¡Kólnáhap yátnáxeg apagkok, kólekkexches ma'a yátnáxeg apkelyenyawasso apagkok! ¡Kólnáhap ma'a sẽlpextétamo apagkok kélyánmagkasso nak chá'a ekyánmaga apkempakhe: máxa kelán'a sa' etnahagkokxa'! ¡Kólmasséssem ma'a aqsok éltaqmalma apagkok: kólmenyexchesák aqsok apagkok!

Jeremías 51:13

Xép Babilonia, apyetnama nak neyáwa wátsam élyawe, apteme nak ekxámokma aqsok apagkok, ¡wokmek kaxwók néxa apha, ekmassegwánxa apwetamap!

Jeremías 51:24

“Kélnápaqta'awók sa' kéxegke ayaqmagkásekxak apkeltémakxa m'a énxet'ák Babilonia, tén han ma'a caldeos, ekpayhawo nak chá'a atnéssesek, eñama ekmaso apteméssessamakxa axta m'a Sión. Ko'o sekxeyenma xa, sektáha nak Wesse'.

Jeremías 51:44

“Añássesagkohok sa' ma'a dios Bel nak Babilonia, ayekxássesek sa' ma'a aqsok élmenaqsapma axta, melyo'ótamók sa' nahan kaxwók ma'a pók aptémakxa énxet'ák. ¡Kelyaqnenágkek kaxwók ma'a kélhaxtegkesso nak Babilonia!

Jeremías 51:48

Kapayhekxak sa' awáxok apteyekmo sa' Babilonia m'a néten, tén han xapop, tén han ma'a ekyókxoho aqsok élánteyapma nak, apkelxegakmo sa' apkeleñama nexcheyha m'a apmassésseyam nak. Ko'o sekxeyenma xa, sektáha nak Wesse'.

Jeremías 51:8

Axta eyke kawenaqtémok apteyekmo m'a Babilonia aptamheykekxo nápakha'a apketkók. ¡Kóllekxagwaha kóllanok ma'a! Kólsantagkas pánaqte yaqwayam kóltexnássesagkok apkelyense, lapmaxcheyk sa' kaltaqmelchessessók.”

Ezequiel 28:16

Ekxámokma aqsok apkexeykekxa axta keñamak ekyánchessesseykmoho m'a apyennaqteyáseykha apyempehek tén han mey'assáxma. Tén axta sektekkesa m'a sekhakxa nak; ektekkessek axta m'a néten egkexe ahagkok ko'o sektáha nak Dios, aptekkessek axta nahan apho nak énxet ekha apxempenák ektáha axta chá'a aptaqmelchesso m'a nepyeseksa nak yaw'a.

Ezequiel 39:10

Melántépek sa' yókxexma etegyagkok yántapák, melmahagkek sa' nahan naxma elyaqtennagkok, hakte sa' katnehek yántapák apagkok xa ekyókxoho nak aqsok apkelmeykha. Keñe sa' elmenyexchásekxak kaxwók aqsok apagkok ma'a ektáha axta apkelmenyexchesso aqsok apagkok, esawhaksohok sa' nahan aqsok apagkok ma'a apsawhéssamo axta aqsok apagkok. Ko'o sekxeyenma sektáha nak Wesse'.

Amós 3:10

Aptáhak Wesse' egegkok se'e: “Melya'ásegkok ektémakxa nak nenlane ekpéwomo nentémakxa m'a; apxatmeykegkek tegma apkelyawe apagkok ma'a aqsok apkelmenyexéyak nak chá'a eñama apkelyennaqteyáseykha, apyempe'ék.”

Abdías 1:15

Sa' kólteméssesek xépxa ekhawo apteméssesakxa nak ma'a apnámakkok: ¡exkak sa' ma'a ekpayhawo nak kólteméssesek! “Chágketwokmek kaxwók Wesse' egegkok ekhem apagkok yaqwánxa sa' elyekpelkohok apyókxoho énxet'ák.

Habacuc 2:10

Kéllánessegkek kélxanák ma'a aqsok segmegqassamo nak, kélnaqtawásamáxche kélagko' kéltemék kélmassésseykmo apxámokma apagko' ma'a pók aptémakxa énxet'ák.

Habacuc 2:17

Kaphewakxak sa' kéxegke kélteméssessamakxa axta kélyennaqteyáseykencha'a kélyempe'ék kélláneya m'a egkexe Líbano, kalyegwakkasek sa' eñama kélnapma m'a aqsok nawha'ák élleykha nak ma'a. Cháxa yaqwayam sa' káhapwak kéxegke xa, eñama aqsok ekmaso kéllánéyak tén han ekyókxoho kéltémakxa ekmaso axta, kélyennaqteyáseykencha'a axta kélyempe'ék ma'a apchókxa, kélenmexma m'a tegma apkelyawe nak, yetlo énxet'ák apheykha m'a kañe'.

Zacarías 1:15

Cháxa keñamak séltaqnaweygko ahagko' nak ko'o m'a pók aptémakxa nak chá'a énxet'ák, meyke nak élyetnakhayo apkelwáxok, hakte cham'a ekmasextexa axta ko'o seklo, apyáncheseykegkok axta aqsa apkellegassáseykegkoho m'a énxet'ák ahagkok.

Zacarías 14:12

Ellegássesagkohok sa' eyke ekyentaxno agko' Wesse' egegkok ma'a pók aptémakxa énxet'ák ektáha axta chá'a apkelnápomap ma'a Jerusalén: kaltepelchexchek sa' aphápetek meletsapakxoho m'a énxet'ák apagkok nak tén han ma'a kañe' apaqta'ák nak ekweykekxoho m'a apaxkok nak.