Habacuc 2:18 - Biblia Enxet

¹⁸ ¿Yaqsa aqsok egwanchek anteméssesek kéleykmássesso ekpenchásexko enxoho? ¿yaqsa aqsok egwanchek anteméssesek kéleykmássesso sẽlyexancháseykha nak chá'a? Yawanchek kalpaqmétek ma'a aqsok kéleykmássesso, ¡kaqhok yáwhok ma'a énxet ektáha nak chá'a apkelane!

Habacuc 2:18 ပူးပေါင်းရင်းမြစ်များ

Salmos 97:7

Apkelmegqágwákxók ma'a apkelpeykessamo nak chá'a kéleykmássesso, eyaqheykencha'a nak chá'a apkelwáxok ma'a. ¡Kelháxahágkek apmonye' m'a ekyókxoho aqsok ekha nak élmowancha'a!

Isaías 1:31

Pa'at apák sa' etnekxak ma'a énxet apyennaqte nak, keñe sa' ma'a aqsok apkelane nak katnekxak táxa éllo: káléwhok sa' nahan xamók xa ánet nak, méko sa' nahan xama enxoho kaspanchesek.”

Isaías 37:38

Keñe axta xama ekhem, neyseksa apkelpeykessamo aqsok apcháyókxa Nisroc ma'a apkelpeykessamókxa axta chá'a, apkelmeyákxeyk axta han apketchek ma'a, cham'a Adramélec tén han Sarézer, apchaqhegwákxeyk axta han ma'a, tén axta apkelmeyákxo apkelyexánegwákxo m'a yókxexma Ararat. Apyaqmagkassek axta han apteme wesse' apwányam ma'a apketche apwesey axta Esarhadón.

Isaías 40:19

Elának chá'a xama aqsok kéleykmássesso m'a énxet apkeleykmassáseykencha'awo nak chá'a ektémakxa xama aqsok, keñe m'a apkelane nak chá'a aqsok étkók éltaqmalma, elyepetchesek chá'a émpehek ma'a sawo ekyátekto ekmomnáwa, elanaksek nahan chá'a eknatanma m'a sawo ekmope ekmomnáwa nak.

Isaías 41:26

¿Yaqsa axta eklegassama sekxók eyeynókxa axta xa yaqwayam enxoho agya'asagkoho'? ¿Yaqsa axta éltenneykencha'a sekxók axta, yaqwayam enxoho anxének ekpayhawo ektémakxa? Méko kélxama kéxegke kélxeyenma xa, méko eklegaya xama enxoho kélpeywa.

Isaías 42:17

Eltaqhohok sa' apkelmegqakto m'a apcháyo nak chá'a aqsok kéleykmássesso, tén han apteme nak chá'a yának se'e: ‘Kéxegke kélteme negáyókxa'.’

Isaías 44:12

Emekxak chá'a apmeykencha'awól'a chá'a elának kéleykmássesso m'a apkelane nak chá'a sawo, keñe natámen apméxenchesso sawo m'a nátex nak, etekkesek chá'a apkeleykmassáseykha etekpagagkok ma'a sawo ekyentaxno. Etneykha nahan chá'a yetlo apwasqapma. Kamaskohok eyke chá'a apyennaqte metawa enxoho apto m'a apkelane nak chá'a sawo, agkok chá'a eynak ma'a yegmen, eyelqakpok.

Isaías 45:16

Elmegqágwakxohok sa' apyókxoho m'a apkelánéyak nak chá'a aqsok kéleykmássesso, melya'asagkehek sa' aptamhágkaxa, elesmésakpok sa'.

Isaías 45:20

“Kólaqnekxa', kólchexyem, kólchaqnágwatámho kélyókxoho s'e énxet'ák kéleymomáxche nak megkóletsapma. Melya'áseyak aqsok ma'a apkelseykha nak chá'a aqsok kéleykmássesso apagkok yántéseksek tén han apkelpaqhetchesso nak chá'a m'a aqsok kéláyókxa megkamowána nak hegwagkasek teyp.

Jeremías 10:8

Élyeyháxma m'a apyókxoho nak, méko xama enxoho apkelmopwancha'a aqsok. ¡Yawanchek kalxekmósek yántéseksek nekha!

Jeremías 16:19

Wesse', segkésso nak sekyennaqte, tén han setaqmelchesso, semasma nak chá'a ekwa'a enxoho ekmaso sekha; xeyep sa' elyo'ótak pók aptémakxa énxet'ák apkeleñama m'a makhawók agko' nak xapop. Sa' etnehek chá'a yának se'e: “Wánxa axta aqsa apkelxaweykekxo ẽlyapmeyk nano' negko'o m'a aqsok kéláyókxa ekteme nak mékoho, tén han meyke nak ekmowána.

Jeremías 2:8

Mehektamsók ko'o m'a apkelmaxnéssesso énxet'ák ahagkok, mehey'ásegkok ko'o m'a énxet'ák apkelxekmósso nak segánamakxa énxet'ák ahagkok, élmexeykekxeyk ko'o m'a apkelámha apmonye'e nak, keñe m'a apkellegasso nak sekpeywa, apkelxeyenma chá'a m'a Baal ekwesey, apkelyetleykekxeyk ma'a aqsok kéleykmássesso ekteme nak mékoho.

Jeremías 50:2

“Kóllegés sa' se'e, kólya'assásegwom sa' nepyeseksa apyókxoho énxet'ák. Kóllegés sa' yaqwayam kólya'asagkoho'; nágkólpós xama enxoho. Kólteme sa' se'e: ‘¡Apteyekmek Babilonia! ¡Aqsok eyesmésamaxche tamhákxak ma'a dios Bel, megkay'ásegkok ektáhakxa élmenaye m'a dios Marduc! ¡Aqsok élasmésamaxche tamhákxak ma'a aqsok kéleykmássesso apagkok, tén han ma'a aqsok apkeláyókxa élmowancha'a amya'a nak, kelmenakawók agko'!’

Jeremías 51:17

Élyeyháxma apyókxoho énxet tén han melya'áseyak aqsok. Kelyexancháseykha chá'a aqsok kéleykmássesso m'a ektáha nak chá'a apkelane: kéleykmássesso sẽlyexancháseykha m'a, tén han meyke élennama;

Daniel 5:23

Apkenmexeykekxeyk xép Wesse' egegkok, apkeltémo kólsantagkasek egheykok tén han egheykok élyawe ekhéyak axta m'a tegma appagkanamap, apkelmáha axta apyena vino xa, yetlo m'a ektáha axta apkeláneyeykha, apkelpeykásawók han ma'a aqsok kéláyókxa élánamáxche nak sawo ekyátekto ekmomnáwa, tén han sawo ekmope ekmomnáwa, sawo ekyexwase, sawo ekyentaxno, yántéseksek tén han meteymog; aqsok kéláyókxa megkate nak exma, megkañe nak ektemegweykmoho exma, megkay'áseyak nak aqsok. Melpeykessamók ma'a Dios apmésso nak apyennaqte wesse', tén han apmésso nak chá'a ekyókxoho m'a apkelanakxa enxoho chá'a.

Amós 2:4

Aptáhak Wesse' egegkok se'e: “Xámók agko' apkeláneyak apkeltémakxa ekmaso m'a énxet'ák Judá, megkatnehek sa' mallegassáseykegkoho; hakte aptaqnagkamchek ma'a nélxekmowásamáxche ahagkok, ko'o sektáha nak Wesse' apagkok, melyaheykekxak ma'a segánamakxa ahagkok nak, apkelpeykessamók aqsa chá'a m'a kéleykmássesso apkelpeykessamo axta chá'a m'a apyapmeyk nano'.

Jonás 2:8

Eyensamhok chá'a exchep apkelyetleykha m'a apkelpeykessamo nak chá'a kéleykmássesso.

Zacarías 10:2

Aqsok kéláyókxa élpeywa ekteme ekmowána amya'a, wanchek nahan chá'a amya'a apkelxeyenma nak chá'a apkelwete aqsok ma'a énxet'ák ekha nak apmopwancha'a. Mékoho agko' ma'a apkelxeyenma nak chá'a aqsok apkelwete apkelwanmagko, mehentaqmelchessásekxeyk egwáxok ma'a apkelpeywa. Cháxa keñamak apkelweynchámeykencha'a nak aqsa m'a énxet'ák, aptémól'a m'a nepkések, apkellegeykegkohol'a meyke xama m'a ektáha nak apkeltaqmelchesso.

Jueces 17:4

Xama axta apkelmeyásekxo selyaqye egken ma'a Micaías, keñe élmésa doscientos sawok selyaqye aktek élmope m'a apkeláneyo nak chá'a sawo ekmope ekmomnáwa, yaqwayam enxoho elának xama kéleykmássesso kélyepetchesso nak émpehek sawo ekmope ekmomnáwa, tén axta ekpekkenchesa apxagkok ma'a Micaías.

1 Samuel 12:21

Nágkólyetlakxa m'a aqsok kéláyókxa mékoho nak, megkamowána nak kapasmok, tén han kalwagkasek teyp, hakte élmowancha'a amya'a m'a.