Habacuc 1:4 - Biblia Enxet

⁴ Megkalánamáxchek ma'a ektémakxa nak chá'a segánamakxa, kelyeykhamaxchek aqsa m'a ekpayhawo nak antéhek, apnaqtawáseykegkók chá'a élmasagcha'a nak apkeltémakxa m'a éltaqmalma nak apkeltémakxa, apkelyetnakhásseykmek ma'a ekpéwomo nak nentémakxa.

Habacuc 1:4 ပူးပေါင်းရင်းမြစ်များ

1 Reyes 21:13

Apkelwa'ak axta han apqánet énxet élmasagcha'a apkeltémakxa, apxénchek axta han aptémakxa Nabot nápaqta'awók apyókxoho énxet'ák apkelmopwancha'a amya'a, apxéna apxéneykencha'a chá'a ekmaso m'a Dios, tén han wesse' apwányam. Yetlókok axta han kéltekkesso tegma apwányam, keñe kélaqha kélyetna'a meteymog.

Job 21:7

¿Yaqsa ektéma ekwenaqtamo nak chá'a apheykha m'a élmasagcha'a nak apkeltémakxa? Apkelwányamók chá'a etnahágkok, kaxámagkok chá'a aqsok apagkok.

Salmos 11:3

Apnaqtawáseykpek agkok ma'a ekyennaqwákxexa nak chá'a nepyeseksa énxet'ák, ¿yaqsa elának ma'a énxet meyke nak aptémakxa?”

Salmos 119:126

Wesse', tásek kaxwók xép elának aqsok, hakte megkólyaheykekxohok ma'a nélxekmowásamáxche apagkok.

Salmos 22:12

Máxa weyke kelennay'awók aptamheykegkok sewakhaya m'a sélenmexma, ektéma nak weyke kelennay'awók éllo m'a Basán;

Salmos 22:16

Máxa semheg aptamheykegkok sewakhaya apxámokma m'a élmasagcha'a nak apkeltémakxa, apkelyensassegkek emék, tén han emagkok séltakxeykha.

Salmos 59:2

Hewagkas teyp nepyeseksa énxet'ák élmasagcha'a nak apkeltémakxa, nágyoho ko'o heyaqhek ma'a ekyetno nak chá'a apkelyógkexma',

Salmos 59:4

malaneyk ko'o aqsok ekmaso xama enxoho, makke kahaxanmak appekhéssamo sektámeyam. ¡Exatakha'! ¡hélanyexegma', elano!

Salmos 94:3

Wesse', ¿háxko sa' ekwánxa katnégwók néxa élpayheykekxa apkelwáxok ma'a élmasagcha'a nak apkeltémakxa?

Éxodo 23:2

“Apxámok sa' eykhe etnehek ma'a énxet élmasagcha'a nak apkeltémakxa, ná exnésakpoho. “Apcháneyákpek sa' agkok exének xama amya'a, ná etne apmopwána amya'a, epékesho aqsa chá'a m'a aqsok apxeyenma, meyke apweheneykekxoho m'a énxet'ák apxámokma nak;

Éxodo 23:6

“Kéllánekxéssek agkok nahan amya'a énxet meyke nak aqsok apagkok, nágkóltawássesha chá'a m'a ekpayhawo nak chá'a yaqwánxa kólteméssesek.

Isaías 5:20

¡Kéxegke laye, kélxeyenma nak ektaqmalma m'a ekmaso nak, tén han kélxeyenma nak ekmaso m'a ektaqmalma nak; kéltemessáseykekxoho nak han élseyéxma m'a ekyaqtessóxma, keñe ekyáqtessóxma m'a élseyéxma nak; kéltemessáseykekxo nak han ekmátsa m'a ekmáske nak, keñe ekmátsa kéltemessáseykekxo m'a ekmáske nak!

Isaías 59:12

Xámók agko' negko'o nenmexeykha exchep, mólya'assáxma egagkok egagko' nahan ẽlsexnáneyákxa'; yetnegkek negyeseksa m'a aqsok magaqhémo, negya'ásegkók nahan ma'a aqsok ekmaso nenlánéyak.

Jeremías 12:1

Wesse', élátegmoweyxchek agkok ko'o exchep, xeyep aqsa chá'a kapayhohok aptáhakxa appeywa; peyk eykhe almaxneyha ko'o exchep ektémakxa aqsok sekwete. ¿Yaqsa enxoho ektéma ektaqmalma chá'a ekteyapma aqsok apkelánéyak ma'a élmasagcha'a nak apkeltémakxa? ¿Yaqsa enxoho ektéma megkatnegweykmoho chá'a exma apheykha m'a appelakkassesso nak chá'a elsexnenak apnámakkok?

Jeremías 12:6

Weykmók xép apkelenmexeykekxa m'a apkelyáxeg'a apancha'awo nak, tén han ma'a apnámakkok apagko' nak, neptámen chá'a elpáxegkesha ématchesha. Nágyáwho aqsa exchep ma'a, tásek sa' eykhe chá'a katnehek apkelpeywa elána'.’

Jeremías 26:8

Xama axta appenchesa apxeyenma m'a apkeltémo axta exének ma'a Wesse' egegkok, yetlókok axta apma m'a énxet'ák, tén han apkelmaxnéssesso Dios énxet'ák apagkok, tén han ma'a Dios appeywa apkellegasso nak. Aptáhak axta apcháneya s'e: “¡Yetsapok sa' xép!

Jeremías 8:7

Weykmók seyána' ekya'áseykegkoho ekhem yaqwánxa keyxyók makham. Apya'ásegkók nahan ekhem yaqwánxa emyekxak chá'a mók nekha m'a sapop, tén han yeptameygmen, tén han ma'a yáho. Keñe kéxegke énxet'ák ahagkok, megkólya'ásegkok ma'a segánamakxa ahagkok.

Ezequiel 9:9

Aptáhak axta seyátegmowágkokxo Wesse' egegkok se'e: “Awanhók agko' apkeltémakxa melya'assáxma m'a énxet'ák Israel tén han ma'a énxet'ák Judá. Xámok agko' aqsok ekmaso m'a apchókxa; xámok agko' megkapéwomo nak nentémakxa m'a kañe' tegma apwányam. Apkenagkamchek ko'o ayamasmak ma'a apkelókxa; apkenagkamchek nahan mateyk ma'a aqsok apkelánéyak.

Oseas 10:4

Epaqmésmakha aqsa chá'a, héltennaksek chá'a aqsok apmopwána amya'a, exnéshok aqsa chá'a mók apkelpaqhetchásamákpoho m'a pók apkelwesse'e nak; kaxhok sa' yámet ekmaso m'a ektémakxa nak chá'a apkelánekxésso amya'a énxet'ák, ekteyapmól'a m'a kélpeynchámxa enxoho xapop.”

Amós 5:12

Ekya'ásegkók ko'o ekxámokma m'a kéltémakxa ekmaso, tén han ekyawe agko' megkólya'assáxma: kóltawasagkohok chá'a m'a ektaqmalma nak aptémakxa, kólmok chá'a selyaqye yaqwayam megkólxének ektemegweykmohóxma, keñe m'a sẽlyekpelchémókxa nak kóltamhok chá'a megkamaxcheyk aqsok apkelxeyenma m'a apkelmopyóseka nak.

Amós 5:7

¡Kéxegke laye, kéltemessáseykekxa nak aqsok ekmáske m'a nentémakxa ekpéwomo, tén han kélyamasma nak ekpéwomo kéllánekxésso amya'a énxet'ák!

Deuteronomio 16:19

Nágkólyetnakhássem chá'a m'a ekpéwomo nak kéllánekxésso amya'a kélnámakkok, nágkóltemésses chá'a apyeykhamap pók kóllanok énxet nepyeseksa m'a pók énxet'ák nak, nágkólma chá'a kólxawak selyaqye kóláneyxchek megkólxének aqsok kélwete, hakte máxa meyke apaqta'ák chá'a katnésseshok énxet'ák apkelya'áseykegkoho nak chá'a aqsok ma'a apma nak chá'a exkak selyaqye yaqwayam mexének ma'a aqsok apwete, katwássesha nahan chá'a apkelpeywa m'a énxet'ák apkelpéwomo nak.