Génesis 8:21 - Biblia Enxet

²¹ Xama axta aptekhana Wesse' egegkok xa ekmátsa nak ekpaqneyam, aptáhak axta s'e: “Wánxa kaxwók sektaqnagko keso náxop, eñama apkeltémakxa énxet'ák, hakte apketkok apkeynmókxa énxet wánxa kaxénmakha apwáxok elának aqsok ekmaso. Mamasséssemek han chá'a kaxwók ma'a ekyókxoho aqsok nawha'ák, sektáhakxa nak se'e kaxwo' nak.”

Génesis 8:21 ပူးပေါင်းရင်းမြစ်များ

Génesis 3:17

Keñe axta énxet aptáha apcháneya s'e: Ekmaso sa' kaxwók katnehek keso náxop, eñama apsexnánémap xép, apkelyahákxoho ekpeywa aptáwa', aptawa m'a yámet ekyexna sekmasma axta etwok, yetlo aptamheykha ekyentaxno sa' chá'a kaxwók xép etekkesek apto, neyseksa apha makham.

Génesis 4:12

Eknekxak sa' eykhe chá'a aqsok aktek xapop, megkeyxek sa' eyke chá'a. Eweynchamha sa' aqsa chá'a ekyókxoho yókxexma keso náxop, meyke apkellókasseyam apyampé.

Génesis 5:29

Apteméssessek axta apwesey Noé, tén axta aptáha s'e: “Aptaqnagkamchek axta Wesse' egegkok xapop, kéméxcheyk antemeykha ekyentaxno agko' yaqwayam agkenekxak aqsok, sa' eyke héllókassesek negyampe s'e sakcha'a nak.”

Génesis 6:13

aptáhak axta apcháneya Noé s'e: “Peyk ko'o amasséssók apyókxoho énxet, cha'a keñamak ekxámokma nak negyennaqteyáseykha egyempehek keso náxop, amasséssók sa' ko'o xa, tén han ma'a ekyókxoho yókxexma nak keso náxop.”

Génesis 6:17

Wáphaksek sa' ko'o ekmámeye ekyawe agko' keso náxop, yaqwayam sa' kápok yegmen xapop, kamasséssók sa' ekyókxoho aqsok ekha nak élennama ekyókxoho yókxexma keso náxop, kaletsapok sa' ekyókxoho aqsok ekhéyak nak néten xapop.

Génesis 6:5

Apwet'ak axta Wesse' egegkok ekyawa agko' ekmaso apkeltémakxa énxet'ák keso náxop, élxéneykencha'a aqsa apkelwáxok wánxa elanagkok ma'a aqsok ekmaso nak.

Génesis 6:7

aptáhak se'e: “Amasseksek sa' ko'o énxet keso náxop, ektáha axta sélane, tén han ma'a ekyókxoho aqsok nawha'ák megkalmeymentakcha'a nak, tén han ma'a élpexyaweykegkoho nak náxop, tén han ma'a náta. ¡Chaqhak ewáxok ko'o séláneya!”

Job 14:4

Yawanchek kamópekxak ma'a aqsok ekmanyása nak.

Salmos 51:5

Naqsók ko'o sekteme ekmaso sektémakxa sekxók axta sekteyékmo; may'assáxma eyeynamo m'a sekyetnamakxa axta kañe' méme awáxok.

Salmos 58:3

Nanók aptamhéyak élmasagcha'a apkeltémakxa m'a élmasagcha'a nak apkeltémakxa, apheykegkaxa axta m'a egken awáxok, nanók han aptamhéyak apkelmopwancha'a amya'a, amonye' appalleyam axta m'a apkelmopwancha'a amya'a nak.

Salmos 58:4

Máxa yéwa m'a énxet'ák nak, segaqhamól'a hentakxek; ektémól'a ekho meyke aheyk'ák, élapmól'a aheyk'ák,

Éxodo 29:18

Epekken sa' néten ekwatnamáxchexa aqsok ma'a nepkések apkennawo nak, etnéssesek sa' aqsok ekwatnamáxche yaqwayam hegkések ko'o, sektáha nak Wesse' kélagkok, tén han aqsok ekwatnamáxche' ekmátsa nak ekpaqneyam atekhánek ko'o.

Éxodo 29:25

Elmekxa sa' makham xa aqsok nak, elwet sa' ma'a ekwatnamáxchexa nak aqsok, yetlo m'a aqsok kélwatno nak ekmátsa ekpaqneyam atekhánek ko'o, sektáha nak Wesse' kélagkok. Cháxa aqsok ekwatnamáxche sélmésso naqsa ko'o xa, sektáha nak Wesse' kélagkok.

Proverbios 20:9

Méko awanchek katnehek ekpeywa s'e: “Eyaxñásekxeyk ko'o ewáxok, méko may'assáxma.”

Eclesiastés 7:20

Méko xama énxet appéwomo apagko' keso náxop, meyétekkesseyam nak chá'a apkelane aqsok ektaqmela, tén han melane nak mey'assáxma.

Isaías 47:12

Kalenxanmagkoho aqsa ektémakxa ekha ekmowána tén han ekxámokma ekmowána ekteme yohóxma eyeynamo axta élane m'a sekxók ektémakxa axta étkok, lapmaxcheyk sa' kapasmok, lapmaxcheyk sa' yeyk ma'a énxet'ák.

Isaías 47:15

Cháxa ektémakxa kelyohóxma agkok nak xeye' xa, élpaqhetchásamáxkoho axta chá'a eyeynamo m'a sekxók ektémakxa axta étkok. Apkelweynchámeykha aqsa m'a, apkelmaheykegkek chá'a m'a apkelmaheykegkaxa nak chá'a, méko kawagkasek teyp xeye'.

Isaías 48:8

Meñeyk xép kaxénaxchek xa, meteyk nahan, hakte yókxoho ekhem ekteme meyke apeyk'ák. Ekya'ásegkók ko'o exchep apteme melane chá'a m'a aptáhakxa enxoho appeywa, apkeltamhomakpek axta exchep ekyennaqte apwáxok ma'a apyetnamakxa axta egken awáxok.

Isaías 53:6

Nélxegáneykmek negko'o negyókxoho, máxa nepkések nentamheykegkok, nentamheykegkek chá'a enxama m'a negmáheyókxa egagko' nak chá'a antéhek. Apmeyáseykekxeyk eyke Wesse' egegkok ekyókxoho m'a nentémakxa élmasagcha'a nak negko'o.

Isaías 65:6

Táxésamaxcheyk eyke sekhakxa ko'o ekyókxoho xa, mawanmeyha sa' aqsa nahan ko'o; atnéssesek sa' ekpayhawo nak atnéssesek;

Jeremías 17:9

“Méko xama enxoho ekyeykhágweykmoho ekmowána amya'a tén han ekmaso ektémakxa ektéma nak apwáxok ma'a énxet. ¿Yaqsa awanchek kay'asagkoho'?

Jeremías 18:12

Sa' etnehek elátegmowágkok xép se'e: ¡Kaqhok eyke exchep henlenxanmok! Egmenyeyk negko'o anlanagkok ma'a ekleklamókxa nak chá'a egwáxok, tén han ólyennaqtések egwáxok ólyetlakxak ma'a ekxeyenmakxa nak chá'a egwáxok.”

Jeremías 8:6

Ektaqmelchessamók axta eykhe sélhaxneykha séltémo aña', maxta eyke añék kaqhek apwáxok aptémakxa ekmaso xama énxet enxoho, tén han méxamakpoho enxoho etnehek appeywa s'e: ¿Yaqsa aqsok ko'o séláneya? Apyókxoho apkelxegák ekyennaqte apkelyetlama m'a ámay apagkok nak, máxa m'a yátnáxeg élyennaqtél'a apyespa'ák neyseksa kempakhakma.

Ezequiel 20:41

Eyanchesákxeyk sa' agkok ko'o kéxegke kélheykegkaxa nak chá'a apkelókxa tén han nepyeseksa m'a pók aptémakxa chá'a énxet'ák, cham'a kélmeheykegkaxa nak kélexpánma s'e kaxwo nak, tén han sekxekmósa sa' ektémakxa sekpagkanamaxche ahagko' ko'o kélnepyeseksa kéxegke nápaqta'awók ma'a apyókxoho énxet'ák, amok sa' takha' m'a aqsok sélmésso naqsa ekmátsa nak ekpaqneyam.

Levítico 1:13

Énxet apyentameykenta nak aptósso nepkések yaqwayam ewatnakpok, kéméxcheyk elyenyeksek ma'a ekhéyak nak apwáxok, tén han ma'a apmagkok nak, tén sa' apkelmaxnéssesso Dios énxet'ák apagkok elwatnek ekyókxoho m'a néten nak ekwatnamáxchexa aqsok, yaqwayam katnehek apmésso naqsa ekmátsa nak ekpaqneyam etekhánek Wesse' egegkok.

Levítico 1:17

Keñe sa' elmássesagkok apxampagkok epaxqátek nepyeseksa, meyke apyenyókasso mók ma'a appáxqatma nak nepyeseksa, ewatnek sa' ma'a néten yántápak nak, cham'a néten ekwatnamáxchexa nak aqsok, yaqwayam katnehek apmésso naqsa ekmátsa nak ekpaqneyam etekhánek Wesse' egegkok.

Levítico 1:9

Énxet apyentameykenta nak aptósso yaqwayam kawatnaxche', kéméxcheyk elyenyeksek ma'a ekhéyak nak awáxok, tén han ma'a amagkok. Keñe sa' apkelmaxnéssesso Dios énxet'ák apagkok elwatnek ekyókxoho m'a néten ekwatnamáxchexa nak aqsok, yaqwayam katnehek apmésso naqsa ekmátsa nak ekpaqneyam etekhánek Wesse' egegkok.

Levítico 26:31

Apmopsagcha'a sa' atnessásekxak tegma apkelyawe kélagkok, amasséssók sa' ma'a kélpeykessamókxa nak aqsok kéláyókxa, kamaskok sa' ekleya ewáxok ekpaqneyam ma'a sokmátsa kélagkok.

Levítico 4:31

Kéméxcheyk nahan elhaxyawássesek ma'a ekyókxoho pexmok nak, ekhawo kélteméssessamakxal'a m'a kéltósso ekmatñá yaqwayam nak kólmések segwetasso nak sẽlásekheykekxoho, tén sa' elwatnek ma'a ekwatnamáxchexa nak aqsok, yaqwayam katnehek ekmátsa nak ekpaqneyam etekhánek Wesse' egegkok, cháxa peya sa' katnehek apwetasso apkelmaxnéssesso Dios énxet'ák apagkok megkólyaqmagkáseykekxa ektémakxa mey'assáxma xa énxet nak, megkólyaqmagkásekxeyk sa' mey'assáxma.

Levítico 8:28

Keñe axta apkelmákxo makham Moisés xa ekyókxoho nak, apkelwatneyk axta m'a néten ekwatnamáxchexa nak aqsok, yetlo m'a aqsok élwatnamáxche nak, apteméssesa aqsok kélmésso naqsa sẽlteméssesso nak nélmaxnéssesso Dios énxet'ák apagkok, ekmátsa nak ekpaqneyam antekhánek: aqsok kélmésso naqsa kélwatnésso m'a Wesse' egegkok.

Números 15:3

sélmésa sa' ko'o xama weyke kennawo' essenhan xama nepkések yaqwayam hélwatnések, kólteméssesek aqsok ekmatñá tén han kélwatno ekmátsa nak ekpaqneyam, yaqwayam sa' kóllának chá'a m'a kélxeyenma nak chá'a kóllána' essenhan kólteméssesek kélmésso naqsa aqsok kélmáheyo kélagko' nak chá'a kólmések, essenhan ekhem kélessawássessamókxa nak chá'a.

1 Samuel 26:19

Éltamhók ko'o yeyxhok sekpeywa, wesse', sektáha nak apkeláneykha: Wesse' egegkok sa' agkok sénmexcháseykekxa ko'o exchep, wesse', emok sa' takha' aqsok apmésso naqsa; énxet sa' agkok ma'a, Wesse' egegkok sa' eltaqnaweygkok. Hakte etekkessegkek ko'o s'e yókxexma nak, ektáha nak apagkok ma'a Wesse' egegkok, eyáteyeykegkok alpeykeshok ma'a mók aqsok kéláyókxa nak.