Génesis 41:42 - Biblia Enxet

⁴² Aplekkek axta apketchesso apophék faraón apmeykha axta chá'a apkelqahasso, apketchessessek axta apophék ma'a José. Keñe axta apkeltamho kólántaxneyásekxak apáwa apkelexyawe apkeltaqmalma, tén han kólnatmeyásekxak ma'a apnatanma sawo ekyátekto ekmomnáwa.

Génesis 41:42 ပူးပေါင်းရင်းမြစ်များ

Génesis 38:18

—¿Yaqsa amenyeyk apekkenchásekxa'? —axta aptáhak Judá. —Hegkés sa' xa apkelqahasso yetlo axát'ák nak, tén han aptasqapeykha apmeyncha'a nak —axta táhak eyátegmowágko. Apkelméssek axta Judá xa aqsok nak, tén axta appathetágko. Lósók axta aptemessásak.

Génesis 41:43

Keñe axta kélchenátchesa yátnáxeg apyenyawasso ekxegamo axta chá'a neptámen faraón, apkeltamhók axta chá'a etnehek elyennaqtéshok apkelpeywa énxet'ák apmonye' s'e: “¡Kólmeykesses apmonye'!” Cháxa aptáha axta apkemha apmonye' José m'a ekyókxoho apchókxa nak Egipto.

Ester 10:3

Mardoqueo axta apteme aptétéyak chá'a ektémakxa aptamheykha m'a wesse' apwányam, cham'a judío nak. Énxet ekyawe kéláyo axta aptemék nepyeseksa m'a judíos. Apchásekhayók axta m'a apyókxoho apchókxa xamo', hakte apketagkassegkek axta aqsok ektaqmela m'a énxet'ák apagkok. Apwasqápeykekxók axta apkeltémo etaksek ektaqmalma apheykha m'a appeywomo xamo' nak.

Ester 3:10

Tén axta wesse' apwányam apleya apketchesso apophék apmésa m'a Amán, apkelenmexma axta m'a judíos.

Ester 3:12

Kéláneyáha axta énxet'ák ektáha axta chá'a apnaqtáxésso appeywa wesse' apwányam, cham'a ekhem trece aptáhakxa axta apkemha apmonye' pelten ma'a apyeyam, apnaqtáxésagkek axta m'a aptáhakxa axta appeywa Amán apkeltamhókxa chá'a katnehek, apkeláphássessek axta m'a apkeltaqmelchesso nak chá'a xama apchókxa tén han ma'a apheykegkaxa nak chá'a, tén han ma'a apkelámha apmonye'e nak chá'a xama apheykegkaxa énxet. Naqtáxésáxcheyk axta nahan ektémakxa axta chá'a eknaqtáxésamaxche apkelpeywa tén han apkelpeywa apagko' xama apheykegkaxa, yaqwánxa axta chá'a kóláphaksek xa amya'a nak, yetlo wesse' apwányam Asuero apwesey tén han kélqahasso m'a wesse' apkelqahasso nak chá'a weykcha'áhak,

Ester 8:10

Wesse' apwányam Asuero apwesey axta nahan chá'a kélnaqtáxésagkok ma'a weykcha'áhak, tén axta natámen kélqaháseyak ma'a wesse' apkelqahasso nak, kéláphasa chá'a apkelseykha weykcha'áhak apkelchánte m'a yátnáxeg apkelyennaqte nak apkelxega, apkeleñama axta nepyeseksa m'a wesse' apwányam apkelchánte.

Ester 8:15

Aptekkek axta Mardoqueo m'a tegma apyawe yetlo aptaxneykekxa m'a xama wesse' apwányam aptaxno apwenaqte apyápaqmate tén han apmope, tén han yetlo apkelháxaqxo ektaqmalma agko' sawo ekyátekto ekmomnáwa, tén han apchaqlamap ma'a apáwa apkeláxñe hómáyok. Apkelwónchessek axta élpayhékxo apkelwáxok apyókxoho énxet'ák apheykha axta m'a tegma apwányam Susa,

Ester 8:2

Tén axta wesse' apwányam apleya m'a kélatchesso kélaphék apyementameykekxa axta m'a Amán apmésa m'a Mardoqueo. Teméssessek axta nahan Ester apkeltaqmelchesso ekyókxoho aqsok ma'a Mardoqueo, ektáha axta apagkok ma'a Amán.

Ester 8:8

Ekméssek ko'o kaxwók kéxegke yaqwayam kóltaxaksek kélmakókxa enxoho kóltéhek kéltáxésso yaqwayam kólmeyók ma'a judíos yetlo kélxeyenma sekwesey. ¡Kólqahes sa' nahan weykcha'áhak kéltáxésso m'a sélqahassól'a chá'a weykcha'áhak! (Megkólwanchek kólmasseksek weykcha'áhak ektáxésamaxche kéltáxésso nak wesse' apwányam apwesey, tén han kélqahasso nak ma'a apkelqahasso nak.)

Salmos 73:6

Cháxa keñamak apkelmeykencha'a nak yáxña'akxoho m'a apkeleymákpoho, ektémól'a negnatanma agkexnek ma'a egyespok, tén han aptéma yáxña'akxoho apkelyennaqteyáseykha apyempe'ék, ektémól'a nentaxno;

Proverbios 1:9

hakte kataqmelcheshok sa' xép élnáxegkáseykha xa: máxa sa' katnéssesek ma'a ektémól'a nennatanma ektaqmalmal'a, tén han ma'a nétchesso empátek élyenmál'a.

Proverbios 31:22

Élane agko' han katnehek ma'a yát'apáwa, kalántaxnekxak han chá'a m'a élántaxno apkeltaqmalma nak.

Proverbios 31:24

Kalának chá'a apáwa tén han nentete nenxet, keñe kakxák chá'a ekha ekyánmaga kalmések ma'a apkexeykekxa nak chá'a aqsok.

Cantares 1:10

¡Katxohok kalmakheykha élchenméhe m'a nekhaw'ék amáxempenák nak! ¡Katxohok kalmakheykha ayespok ma'a eknatanma meteymog élyenméyak éltaqmalma nak!

Cantares 4:9

Meyk xeye' ewáxok, eyáxeg, sekpagkanma; xama sélányo eykhe entáhak ekma ewáxok, xama sélányo eykhe ektáhak ma'a eknatanma nak, ekma ewáxok.

Isaías 3:23

tén han ma'a nélanyantáxama agkok, tén han ma'a apáwa apkeláxñe apkelexyawe agkok nak, tén han ma'a élatchesso akqatkok, tén han ma'a apáwa élpextete nak chá'a akqatkok.

Jeremías 52:33

Massegkek axta han apkelmeykha Joaquín ma'a apkelnaqta apkelmeykencha'awo axta chá'a neyseksa apmomap, etwohok axta chá'a apto xamo' wesse' apwányam ekwokmoho apketsapa.

Ezequiel 27:7

Keñe axta apáwa apagkok kélpeykeseykekxa nak chá'a néten aptáha m'a apáwa apkeláxñe kéleykmassáseykha nak chá'a kélótma apkeñama nak ma'a Egipto, apáwa kélmakheyáseykha néten apagkok axta nahan apteméssessók ma'a; tén axta kélpakxenchesso nak chá'a aptáha m'a apáwa hómáyok tén han apyexwase, apkeleñama axta kélseykenta m'a nekha wátsam ekwányam Elisá.

Daniel 5:16

Eklegayak eyke ko'o exchep apmopwána exnek epékásekxak aqsok ekpowásamáxche, tén han ekmáske nak agya'asagkoho'. Apwanchek sa' agkok xép apkelyetseta s'e amya'a nak, tén han séltennásekxo enxoho ektémakxa, wának sa' kóltaxneyásekxak apáwa apmomnáwa hómáyok, tén han kólnatmeyásekxak cadena sawo ekyátekto ekmomnáwa, tén han exek ketók sekhakxa sektémakxa nak wesse' apwányam.

Daniel 5:29

Yetlókok axta han apkeltémo kólántaxneyásekxak apáwa apmomnáwa hómáyok wesse' apwányam Belsasar ma'a Daniel, keñe han apkeltamho kólnatmeyásekxak ma'a cadena sawo ekyátekto ekmomnáwa, keñe axta apkeltennásegko apyókxoho énxet'ák, peya kaxwók exek ketók aphakxa m'a Daniel aptémakxa nak wesse' apwányam.

Daniel 5:7

Tén axta apyennaqtésa appeywa apkelwónencha'a m'a apkelya'áseykegkoho nak chá'a aqsok ekpowásamáxche', tén han énxet ekha apmopwancha'a, tén han apwetayo nak chá'a aqsok yaqwánxa katnehek, apheykha nak Babilonia, aptáhak axta apkeláneya s'e: —Énxet ektáha enxoho apkelyetsete xa kéltáxésso nak, keñe han séltennasso enxoho ko'o ektémakxa ekpeywa, kóltaxneyásekxak sa' apáwa apmomnáwa hómáyok, kólnatmeyásekxak sa' han cadena sawo ekyátekto ekmomnáwa, exek sa' chá'a m'a ketók sekhamakxa nak ko'o, sektémakxa nak wesse' apwányam.

1 Samuel 18:4

Aplekkek axta han apchaqlamap ma'a Jonatán tén han aptaxno apwenaqte aptaxneykekxa axta, apméssek axta David, yetlo sókwenaqte apagkok, yágke, tén han aptétamap.