Ezequiel 9:9 - Biblia Enxet

⁹ Aptáhak axta seyátegmowágkokxo Wesse' egegkok se'e: “Awanhók agko' apkeltémakxa melya'assáxma m'a énxet'ák Israel tén han ma'a énxet'ák Judá. Xámok agko' aqsok ekmaso m'a apchókxa; xámok agko' megkapéwomo nak nentémakxa m'a kañe' tegma apwányam. Apkenagkamchek ko'o ayamasmak ma'a apkelókxa; apkenagkamchek nahan mateyk ma'a aqsok apkelánéyak.

Ezequiel 9:9 ပူးပေါင်းရင်းမြစ်များ

2 Reyes 21:16

Háwe axta ekwánxa agkok apkelánéseykegko melya'assáxma Manasés ma'a énxet'ák Judá, tén han aqsok ekmaso apkelánéyak nápaqtók Wesse' egegkok. Apkelnapmeyk axta han apxámokma apagko' énxet meyke apkeltémakxa m'a Jerusalén, sawheykekxók axta éma apagkok ma'a kañe' nak.

2 Reyes 24:4

eñama han ma'a apkelnapma axta énxet'ák meyke apkeltémakxa, apsawheyáseykekxoho axta éma apagkok ma'a Jerusalén. Axta keñamak memáheyo elásekhekxohok makham ma'a Wesse' egegkok.

Job 22:13

Apxeyenmeyk xép méteya m'a Dios, apxeyenmeyk ektawassáseykencha'a apmáheyo ékpelkohok ma'a yaphope ekyentaxno nak, mopwanchek xép exének méteya m'a Dios, hakte apweynchámeykha m'a néten nak.

Salmos 10:11

Yának chá'a kalwagqakmok Dios ma'a élmasagcha'a nak apkeltémakxa, yának chá'a yaqlásak nápat, keñe métyehek chá'a exma.

Salmos 94:7

Elxének chá'a melweteya m'a Wesse' egegkok, elxének chá'a mey'ásegko m'a Jacob Dios apagkok.

Isaías 1:4

¡Énxet'ák melya'assáxma laye, ekyentaxno nak apkeltémakxa ekmaso, énxet'ák élmasagcha'a nak apkeltémakxa aptawán'ák neptámen, énxet'ák apkeláneykegkoho nak aqsok ekmaso! Kélyamasmeyk ma'a Wesse' egegkok, kélyetnakhassegkek ma'a Dios Aptaqmalma apagkok nak ma'a Israel, kélpekkeneykekxeyk kélnentámen.

Isaías 29:15

¡Énxet'ák laye, apkelyexánegkesso nak chá'a Wesse' egegkok yaqwayam ekpósek ma'a aqsok apmáheyo elanagkok, apkelánéyák nak chá'a apkeltémakxa ekmaso m'a ekyáqtésakxaxma apteme nak chá'a elpaqmétek se'e: “Méko segwet'a. Méko segya'ásegko!”

Isaías 47:10

Chásenneykekxeyk axta exche' m'a ektémakxa ekmaso, axta entemék chá'a awáxok se'e: ‘Méko sét'a.’ Kelyexancháseykha axta chá'a exche' m'a ektémakxa ekya'áséyak aqsok tén han ekyekpelchémo. Axta entemék chá'a awáxok se'e: ‘Ko'o aqsa, méko émók sekhawo.’

Jeremías 2:34

Apkeltexneymákpek kélnaqta éma apagkok ma'a énxet'ák meyke nak aqsok apagkok, tén han ma'a meyke nak apkeltémakxa, énxet'ák megkólweteya axta chá'a kéxegke elanagkok xama enxoho m'a aqsok ekmaso agko'.

Jeremías 22:17

“Wánxa eyke aqsa chá'a exchep ekxéneykencha'a apwáxok ma'a apxámáseyak nak aqsok apagkok eñama apmenyexeykha; apkelnapmeyk chá'a m'a meyke nak apkeltémakxa, apnaqtawáseykegkok chá'a énxet'ák apagkok.”

Lamentaciones 1:5

Kóneg aptemessásekxak ma'a apkelenmexma, tásek ekteyapma aqsok apkelánéyak ma'a apkelenmexeykha nak chá'a. Wesse' egegkok apyentaxnéssesso apheykha m'a, eñama ekxámokma m'a melya'assáxma. Kélnaqlákxeyk megkatnahakxa apkelókxa m'a apketchek, apnaqlákxeyk ma'a apkelenmexma nak.

Ezequiel 7:23

“Elánekxa sa' xama cadena, hakte cham'a apkelókxa nak apxámchek apagko' énxet apkelxénamap kóllegássesagkohok eñama apkelnapma apnámakkok, sawhekxók nahan negyennaqteyáseykha egyempehek ma'a tegma apwányam.

Ezequiel 8:12

Aptáhak axta seyáneya s'e: “¿Apwet'aya apkelyexamakpoho nak chá'a apkeláneykegko m'a apkelámha apmonye'e nak Israel, apnegkenma nak chá'a xama xama aqsok apcháyókxa m'a nápakha apxanák kañe'? Apkenagkamchek ko'o malweteyk xa, sekyamasma m'a apkelókxa nak.”

Ezequiel 8:17

Tén axta aptáha seyáneya Wesse' egegkok se'e: “¿Apwet'aya? ¡Megkalleklámeykegkok apkelánegweykta chá'a énxet'ák Judá aqsok ekmaso agko' se'e kañe' nak, apsawheyáseykekxók apchókxa m'a negyennaqteyáseykha nak egyempehek! Megkamassegweykmok selókáséyak, etekhanchessegkek chá'a m'a apkeltémakxa ekmanyása.

Habacuc 1:4

Megkalánamáxchek ma'a ektémakxa nak chá'a segánamakxa, kelyeykhamaxchek aqsa m'a ekpayhawo nak antéhek, apnaqtawáseykegkók chá'a élmasagcha'a nak apkeltémakxa m'a éltaqmalma nak apkeltémakxa, apkelyetnakhásseykmek ma'a ekpéwomo nak nentémakxa.

Sofonías 1:12

“Amok sa' ko'o xama cháléwasso xa ekhem nak keñe sa' atátchesek alanok ma'a Jerusalén. Allegássesagkohok sa' ma'a énxet'ák apkeltaqmelchessamo nak aqsa apheykha ektémól'a vino ektaqmelchessamól'a aqsa ekyetno, apteme nak chá'a elpaqmeyesmakha s'e: ‘¡Melanyek xama aqsok Wesse' egegkok, cham'a ektaqmela nak tén han ma'a ekmaso nak!’

Deuteronomio 31:29

Hakte ekya'ásegkók ko'o m'a sétsapa sa', enaqtawasakpok sa', elyensók sa' ma'a ámay séltémókxa axta ko'o elyetlók; ekya'ásegkók nahan peya káhapwak aqsok ekmaso m'a egmonye' sa', eñama apkelánéyak aqsok ekmaso nápaqtók ma'a Wesse' egegkok tén han aplókasso.”

Deuteronomio 32:5

“Énxet élmasagcha'a nak apkeltémakxa, aplókasso nak chá'a m'a Dios, megkalchek apwáxok etnehek apketchek: