Ezequiel 13:3 - Biblia Enxet

³ ¡Apkellegasso amya'a élyeyháxma sa' laye, apkelyetleykekxa nak chá'a ektémakxa élchetámeykha agko' apkelwáxok, méko m'a ekmámnaqsoho nak aqsok apkelwete!

Ezequiel 13:3 ပူးပေါင်းရင်းမြစ်များ

Proverbios 15:14

Énxet apmopwána nak aqsok, etegyekxohok apya'áseyak aqsok, keñe m'a élyeyháxma nak, etegyekxoho aqsa aqsok élyeyháxma.

Proverbios 15:2

Negya'áseykegkoho aqsok chá'a katyapok apkelpeywa m'a énxet'ák apkelya'áseykegkoho nak chá'a aqsok; keñe m'a énxet élyeyháxma nak, amya'a élyeyháxma aqsa chá'a elxénagkok.

Jeremías 23:1

Aptáhak Wesse' egegkok se'e: “¡Keláneykha nepkések la'aye, apchahayo nak aqsa chá'a elxeganmok seknaqtósso nepkések, tén han yexpaqnek!”

Jeremías 23:16

Aptáhak Wesse' ekha apyennaqte s'e: “Israelitas, nágkóleyxho aqsa chá'a aptáhakxa enxoho apkeláneya m'a apkelxeyenma nak chá'a apkellegasso sekpeywa. Wanchek amya'a m'a apkeltémakxa nak chá'a apkelanagkama, élchetámeykha agko' apkelwáxok chá'a apkelxeyenmak, megkatnaha nak chá'a ko'o séltennasso.

Jeremías 23:9

Amya'a ekxeyenma nak Dios appeywa apkellegasso: Awanhók agko' ko'o ektamheykha ewáxok; kelpexyennegkek ekyókxoho émpehek; máxa anmen áto' ektemék, ektémól'a énxet eyaqhél'a chá'a vino, Wesse' egegkok keñamak setnama xa tén han ma'a appeywa ekpagkanamaxche nak.

Jeremías 28:15

Tén axta Jeremías aptáha apcháneya Hananías se'e: —¡Hananías, yeyxho sa' se'e! Megyápháseykha exchep Wesse' egegkok, amya'a megkamámnaqsoho chá'a exchep apkeltémók melya'ássók xa énxet'ák nak.

Lamentaciones 2:14

Wanchek amya'a m'a aptémakxa nak chá'a apkeltennasso aqsok apkelwete m'a apkelánémap axta chá'a etnahagkok apkellegasso Dios appeywa. Meltennassók ekmasagko ektémakxa yaqwayam enxoho eyaqmagkassesek ma'a ektémakxa nak; apkeltennáseykha chá'a m'a aqsok apkelwete ekmowána amya'a nak, naqsók han chá'a teméssessók.

Ezequiel 13:18

Etne sa' elának se'e: ‘Keso aptáhakxa exchek appeywa Wesse' egegkok se'e: ¡Kéxegke laye kelán'ák, kéltegyéyak nak chá'a énxet; kéllánéyak nak chá'a kélpextete kélmék ekha ekmowána yaqwayam enxoho elatchesagkok chá'a naxta'a apmék ma'a apyókxoho énxet, ektémól'a m'a kélpekkenma kélmek la'a, tén han kélláneyak nak chá'a m'a apáwa apkelexyawe yaqwayam enxoho elatchesagkok apqatkok ma'a apyókxoho énxet! ¿Kélaneykeya kólewának kólyementók apkelyennaqte énxet'ák ahagkok essenhan kólwagkasaxchek teyp kéxegke, cham'a ekxéna enxoho chá'a kélwáxok?

Ezequiel 13:4

Israel, máxa yammáleg élleykhal'a nepyeseksa tegma aphopák ma'a apkellegasso nak amya'a apagkok.

Ezequiel 34:2

“Xép énxet, eltennés sa' sektáhakxa ko'o sélxeyenma m'a keláneykha nepkések nak Israel, etne sa' elának se'e: ‘Keso aptáhakxa exchek appeywa Wesse' egegkok se'e: ¡Keláneykha nepkések Israel laye, apkeltaqmelchásamákpekxoho apagko' nak chá'a! Nepkések akke payhawok eykhe eltaqmelchesek ma'a keláneykha nepkések.

Oseas 9:7

¡Wokmek kaxwók yaqwánxa kóllegássesagkoho'! ¡Wokmek kaxwók yaqwánxa kólyaqmagkásekxak ekpayhawo nak kólteméssesek! ¡Ey'asagkohok sa' eyke Israel ekwokmo enxoho xa ekhem nak! Kéltemék chá'a kéxegke s'e: “Ekyeyháxma m'a Dios appeywa aplegasso nak. Ekyeyháxma m'a énxet apha nak apwáxok espíritu.” Kéltemegkek chá'a kéxegke kélpeywa xa ektáha nak, hakte láneyók kélwáxok ma'a kéltémakxa ekmaso, kéllómok kélagko'.

Zacarías 11:15

Aptáhak axta seyáneya Wesse' egegkok se'e: “Exnésakpoho sa' kaxwo' keláneykha nepkések megkeytnakhassamo nak apwáxok apnaqtósso.