Éxodo 34:14 - Biblia Enxet

¹⁴ “Nágkólpeykesho chá'a xama enxoho m'a pók kéláyókxa nak chá'a, hakte Wesse' egegkok apteme apkelmeyeykha. Dios sẽlmeyeykha apwesey m'a.

Éxodo 34:14 ပူးပေါင်းရင်းမြစ်များ

1 Reyes 14:15

ellegássesagkohok sa' Wesse' egegkok ma'a énxet'ák nak Israel, elpexyennegkesek sa' ektémól'a yegmen ényé kalpexyennegkesek ma'a tappo. Elántekkesek sa' se'e ektaqmelakxa nak xapop apmésso axta m'a apyapmeyk nano', ekxakhagwók sa' ma'a teyp nak wátsam Éufrates, cham'a makhawo' nak, eñama apkeláneyak ma'a kéleykmássesso nak Astarté, eklókassama nak ma'a Wesse' egegkok.

1 Reyes 19:10

Apchátegmowágkek axta m'a: “Awanhók agko' ko'o exchep sélmeyeykha, Wesse', Dios ekha nak apyennaqte, hakte apyamasmeyk énxet'ák Israel ekhémo mók nélpaqhetchásamáxkoho apagkok, apkelyaqnegkessáseykegkek han ma'a kélwatnéssamakxa nak chá'a aqsok, sókwenaqte axta han chá'a apkelyetxeykegkok apkelnapma m'a apkellegasso nak appeywa. Ko'o aqsa exakko' seyeymomáxko, étamsamáxcheyk han yaqwayam amátog.”

Éxodo 33:19

Aptáhak axta apchátegmowágkokxo Wesse' egegkok se'e: —Ayeykhaksek sa' ko'o apmonye' exchep ma'a ekyókxoho ektémakxa nak sektaqmalma, altennaksek sa' nahan sekwesey. Wamlekxohok sa' ko'o sekmakókxa enxoho wamlekxoho', yepyóshok sa' nahan alanok ko'o m'a sekmakókxa enxoho yepyóshok alano'.

Isaías 57:15

Hakte aptáhak appeywa Meyke nak Ekhémo s'e, memassegwayam nak apwesey nak aptaqmalma: “Ekhegkek ko'o m'a netno' nak, ekpagkanamaxchexa nak, ekhegkek eyke nahan nepyeseksa m'a énxet'ák apkelyelqamákpoho nak tén han ma'a apkellegeykegkoho nak ekyentaxno apkelwáxok, yaqwayam enxoho alwasqakkásekxohok chá'a tén han agkeyásekxak chá'a apkelyennaqte.

Isaías 9:6

Hakte apteyekmek xama sakcha'a negyeseksa, Dios segmésso xama apketche, cham'a peya sa' exkak apmopwána yaqwayam etnehek aptaqmelchesso apchókxa. Sa' nahan kólteméssesek apwesey s'e: Eyaqheykha kélwáxok aqsok apkelane, Dios apyennaqte, Egyáp Memassegwayam, Wesse' meyke ektáhakxa negha.

Ezequiel 23:25

Ayenyenták sa' ko'o seklo takháxet xeye', metaqmelchesek sa' xeye' m'a yetlo aptawáseykegkoho; elyaqténchesek sa' aheyk'ák tén han awéhek, keñe sa' ma'a apkeleymomap nak meletsapma elnápok, sókwenaqte sa' chá'a elyetxeygkok. Elyementók sa' ma'a étchek apkelennay'a tén han ma'a kelwán'ák nak, keñe sa' kawatnaxchek xeye' táxa.

Nahúm 1:2

Wesse' egegkok apteme Dios, sẽlmeyeykha, tén han apyaqmagkáseykekxa nak chá'a mók kélteméssesakxa: eyaqmagkásekxak chá'a apteméssesakxa m'a ektáha nak chá'a apkenmexeykekxa, eltaqnaweygkok chá'a m'a apkelenmexma nak.

Deuteronomio 29:20

Melásekhekxók sa' nahan ma'a Wesse' egegkok, eltaqnaweygkok sa' aqsa xa énxet'ák nak, káhapwaták sa' ekyókxoho m'a ekmaso nak negha ekxeyenma nak ekpeywa s'e weykcha'áhak nak, emasséssessók sa' nahan Wesse' egegkok apheykha náxop ma'a aptawán'ák neptámen nak.

Deuteronomio 32:16

Aplókassegkek axta Dios apkelpeykessamo m'a kéleykmássesso élmasagcha'a agko' nak;

Deuteronomio 32:21

Elókassegkek ma'a xama aqsok kéláyókxa megkatnaha nak Dios, elókassegkek ma'a aqsok apcháyókxa élmowancha'a amya'a nak; ¡Wának sa' eyke nahan ko'o kólnathak kéxegke m'a pók énxet'ák melya'áseyak nak Dios, wának sa' kóltaqnaweygkok ko'o kéxegke m'a énxet'ák megkalmopmenyého nak elya'asagkohok aqsok!

Deuteronomio 4:24

hakte cham'a Dios Wesse' kélagkok nak kéxegke, apteme xama Dios apkelmeyeykha, ¡táxa eksawhomól'a kalwatnek ma'a ekyókxoho aqsok!

Deuteronomio 5:24

Axta kéltemék sélanagkama s'e: ‘Naqsók senxekmósa negko'o Dios Wesse' egegkok ma'a apcheymákpoho tén han ma'a apmopwána, nenleg'ak nahan appeywa ektepa m'a neyseksa táxa eyáléwe. Sakhem negko'o negwet'a Dios apmopwána elpaqhetchesek énxet meyke yaqwayam eletsapok.

Deuteronomio 5:7

‘Nágkóltegye mók aqsok kéláyókxa emonye' ko'o.

Deuteronomio 6:15

hakte cham'a Dios Wesse' kélagkok, apha nak kélnepyeseksa kéxegke, apteme Dios apkelmeyeykha, apwanchek nahan eltaqnaweygkok kéxegke tén han emasséssamhok apagko' keso náxop.

Josué 24:19

Aptáhak axta eyke apkeláneya Josué: —Megkólwanchek kéxegke kólyetlakxak ma'a Wesse' egegkok, hakte Dios appagkanamap ma'a, keñe han apkelmeyeykha, kélenmexákxeyk sa' agkok xa, kéllánegko enxoho megkólya'assáxma kéxegke, melásekhekxók sa'.

Jueces 6:10

Éltennassegkek axta han ko'o sekteme Dios Wesse' kélagkok, tén han maltémo kóleyk ma'a aqsok apcháyókxa nak amorreos, kélheykegkaxa nak kaxwók kéxegke m'a xapop apagkok; axta eyke hélháxenmók ko'o kéxegke.’”