Éxodo 16:28 - Biblia Enxet

²⁸ Keñe axta Wesse' egegkok aptáha apcháneya Moisés se'e: —¿Háxko ekwánxa peya kammok kéxegke kéllenxanmeykegkoho megkólyeheykekxa m'a segánamakxa ahagkok nak, tén han ma'a ektémakxa nak chá'a sélxekmósso?

Éxodo 16:28 ပူးပေါင်းရင်းမြစ်များ

2 Reyes 17:14

Axta eyke elyaheykekxohok ma'a énxet'ák nak, apkelyennaqtéssegkek axta aqsa apkelwáxok, aptamheykegko axta m'a apyapmeyk nano', apkelya'ásseykmoho axta chá'a m'a Dios Wesse' apagkok;

2 Reyes 17:15

apkeltaqnagkamchek axta m'a segánamakxa apagkok, keñe han ma'a ekhémo mók nélpaqhetchásamáxkoho apkelánesso axta m'a apyapmeyk nano', tén han apchánamakxa axta etnahágkok apmésso axta. Apkelyetlamchek axta han ma'a aqsok kéláyókxa mékoho agko' nak, ektemessáseykekxo axta han mékoho m'a, apkeláneykegkek axta han ma'a aptamheykegkaxa axta m'a énxet'ák apheykha axta m'a nepyáwa, aqsok apkeltennassama axta meltémo elanagkok ma'a Wesse' egegkok.

Salmos 106:13

Ñohók axta eyke han élwagqámeykegko m'a aqsok apkelane axta Dios, axta elhaxanmak eltennaksek ma'a ekxeyenma axta apwáxok etnéssesek.

Salmos 78:10

axta eláneykegkok ma'a aphéssamo axta mók apkelpaqhetchásamákpoho m'a Dios, axta han elyeheykekxak ma'a nélxekmowásamáxche apagkok.

Salmos 78:22

Hakte axta eláyók ma'a Dios, apkelya'ásseykmek axta apmopwána epasmok.

Éxodo 10:3

Apkelxegkek axta apkelya'aweykxo faraón ma'a Moisés tén han Aarón. Aptáhak axta apcháneya s'e: —Exchek aptáhak Wesse' egegkok, aptáha nak hebreos Dios apagkok se'e: ‘¿Háxko ekwánxa kamassegwók ekyennaqte apwáxok nahaqtók ko'o? Yoho elxog énxet'ák ahagkok, yaqwayam sa' hélpeykesho';

Éxodo 16:27

Yetneyk axta eyke chá'a pók xama apkelánteyapma aptegyágko aqsok xa ekhem siete nak, axta eyke elwet'ak chá'a m'a aqsok aptegyéyak.

Éxodo 16:29

Kólya'asagkoho hana ko'o, Wesse' kélagkok, sekméssama kéxegke xama ekhem kéllókassamakxa kélyampe; cháxa keñamak sekméssama nak chá'a ko'o kéltéyak ekhem seis yaqwayam kammohok ma'a ánet ekhem. Tén sa' ma'a ekhem siete nak kéméxcheyk kólhakha aqsa chá'a kéxegke kélxama m'a kélxanák nak tén han megkólántephek xa ekhem nak.

Isaías 7:13

Tén axta aptáha Isaías se'e: “Kóleyxho kéxegke s'e, wesse' apwányam David aptawán'ák neptámen. ¿Kélanagkamcheya kexyókók kólya'aksek exma énxet, kélmako nak han kólya'aksek exma m'a Dios ahagkok?

Jeremías 4:14

Jerusalén, yáxñásekxa apwáxok aqsok ekmaso, keñe sa' ewagkasakpok teyp. ¡Elwatés ekxéneykha apwáxok aqsok ekmaso!

Jeremías 9:6

elyaqmagkasek apkeltémakxa. Aptáhak Wesse' egegkok se'e: “¡Ketók mók apketámeyak pók, ketók mók apkelyexancháseykha pók! Memáheyók ko'o hékpelchágwók énxet'ák ahagkok.

Ezequiel 20:13

Élmexeykekxeyk axta eyke ko'o m'a yókxexma meykexa nak énxet, axta elyaheykekxohok ma'a segánamakxa ahagkok; aptaqnagkamchek axta m'a séltémókxa axta chá'a etnahagkok sekmésso axta, yaqwayam axta kalyennaqtéssesek chá'a apnénya'ák ma'a apkelánegko enxoho chá'a, aptawáseykha axta ekyókxoho m'a ekhem ahagkok sábado. Tén axta ekxéna ewáxok ategkesek seklo nepyeseksa m'a tén han amasséssók apyókxoho m'a yókxexma meykexa nak énxet.

Ezequiel 20:16

hakte aptaqnagkamchek axta m'a séltémókxa axta chá'a etnahagkok, axta elyaheykekxohok ma'a segánamakxa ahagkok, aptawáseykha axta nahan ma'a ekhem ahagkok sábado, hakte aqsok kéleykmássesso apagkok axta aqsa kelxéneykha chá'a apkelwáxok.

Ezequiel 5:6

Kenmexeykekxeyk eyke segánamakxa ahagkok xa tén han seyánamakxa nak chá'a katnehek, wetamaxcheyk axta nahan ekyeykhágweykmoho agko' ekmaso ektémakxa nepyeseksa m'a énxet'ák tén han ma'a pók aptémakxa nak chá'a énxet apheykha m'a neyáwa', hakte axta kalyeheykekxak ma'a segánamakxa ahagkok, keñe han megkeytlama m'a seyánamakxa axta chá'a katnehek.

Números 14:11

Aptáhak axta Wesse' egegkok apcháneya Moisés se'e: —¿Háxko sa' ekwánxa kammok apkellenxanmeykegkoho sewanyeykha ko'o xa énxet'ák nak? ¿Háxko sa' ekwánxa kammok sey'ásseyam ko'o neyseksók eykhe ko'o sélane aqsok sempelakkasso nak agwetak nepyeseksa?

Números 20:12

Aptáhak axta Wesse' egegkok apcháneya Moisés tén han Aarón se'e: —Élya'ásseykmek ko'o kéxegke, meheláyók nahan nápaqta'awók ma'a israelitas, megkólántaxnések sa' nahan apchókxa sekmésso axta ko'o xa énxet'ák nak.