Éxodo 12:29 - Biblia Enxet

²⁹ Axta'a eyseksók axta apkelnapa Wesse' egegkok kélketchek átnaha apketkók xama tegma chá'a m'a kañe' Egipto. Axta nahan cheynawok sekxók ma'a faraón apketche átnaha apketkok aphama axta chá'a m'a taháno ekyawe ektaqmalma, ekweykekxoho m'a apketchek átnaha apketkók nak ma'a énxet'ák apheykha axta kañe' negmomaxchexa, tén axta nahan ma'a émha amonye' ekwete étkók nak ma'a aqsok kélnaqtósso.

Éxodo 12:29 ပူးပေါင်းရင်းမြစ်များ

Génesis 15:14

Allegássesagkohok sa' eyke ko'óxa m'a énxet'ák peya nak etnehek apkelásenneykha naqsa, keñe sa' kólchexeykxak ma'a aptawán'ák neptámen nak, elántépok sa' yetlo ekxámokma aqsok apagkok.

Job 34:20

Katlakkasek chá'a eletsapok ma'a énxet'ák, axta'a eysekso'; elyegweyk chá'a énxet'ák keñe emassegwók; kólmasséssók chá'a m'a énxet ekha nak kéláyo, meyke kélásenneykxa m'a énxet.

Salmos 105:36

¡Apkelnapmeyk axta chá'a apyókxoho kélketchek appalleyam nak apmonye'e, étchek ma'a kelán'ák Egipto, cham'a kañe' nak Egipto!

Salmos 135:8

Axta apkelnapma kélketchek appalleyam apmonye'e apyókxoho étchek ma'a kelán'ák Egipto, tén han émha amonye' nak ekpalleyam étkók ma'a apnaqtósso.

Salmos 136:10

Apkelnapma axta kélketchek apmonye' appalleyam apyókxoho étchek ma'a kelán'ák Egipto, hakte megkamassegwomek chá'a segásekhayo.

Salmos 78:50

¡Axta emágweykekxak aplama! Axta eltémók chá'a elweynchamha, apkelnapmeyk axta apchahaya aqsok ekmaso;

Salmos 78:51

¡apkelnapmeyk axta chá'a apyókxoho átnaha apketkók étchek nak ma'a kelán'ák Egipto, cham'a kañe' nak Egipto!

Éxodo 11:1

Aptáhak axta Wesse' egegkok apcháneya Moisés se'e: —Wáphaksek sa' ko'o makham mók aqsok nenlegeykegkoho aphakxa m'a faraón tén han ma'a egipcios. Tén sa' natámen xa, yohok kólántépok. Sa' apagko' nahan elántekkesek kéxegke m'a.

Éxodo 12:12

Cháxa axta'a nak, aweynchamha sa' ko'o m'a ekyókxoho nak kañe' Egipto, alnápok sa' chá'a xama tegma étchek átnaha apketkók ma'a egipcia, tén han ma'a émha amonye' ekwete nak étkók ma'a apnaqtósso. Alyekpexchetagkok sa' nahan ko'o m'a ekyókxoho aqsok kéláyókxa nak chá'a m'a kañe' Egipto. Ko'o sekxeyenma xa, sektáha nak Wesse'.

Éxodo 12:28

Tén axta apkelxega, apkelánegko ekyókxoho m'a aptémakxa axta Wesse' egegkok apkeltémókxa etnahagkok ma'a Moisés tén han ma'a Aarón.

Éxodo 13:15

Xama axta nahan apyennaqtésa apwáxok ma'a faraón megya'awo ólántépok, apkelnapchek axta chá'a Wesse' egegkok kélketchek appalleyam apmonye'e xama tegma étchek ma'a egipcia tén han ma'a ekyókxoho ekpalleyam amonye'e nak étkók ma'a apnaqtósso. Cháxa keñamak negmésa nak chá'a negko'o Wesse' egegkok ma'a ekyókxoho kelennay'a, ektéyam nak chá'a amonye', tén han negmésa chá'a xama negmésso naqsa aqsok Dios ekyaqmageykekxa chá'a m'a egketchek appalleyam apmonye'e nak.

Éxodo 4:23

Éltennássek axta exchep séltamho yohok etyapok hatte, yaqwayam enxoho exog hélpeykesho'. Waqhássesek sa' ko'o exchep ma'a apketche átnaha apketkok nak, eñama megyahayo etyapok.’

Éxodo 9:6

Mók ekhem axta nahan entáhak, apkelanak axta Wesse' egegkok ma'a aqsok apxeyenma elána'. Keletsekkek axta ekyókxoho apnaqtósso m'a egipcios, keñe axta m'a israelitas apnaqtósso méko axta xama enxoho étsapma.

Isaías 24:22

yánchásekxak sa', exatmok sa' kañe' magmowagkexa nak antépok, exnésha sa' kañe' negmomaxchexa, nanók sa' nahan katnehek ellegássesagkoho'.

Isaías 41:11

Elmegqágwakxohok sa' apyókxoho m'a aptaqnagko nak chá'a, melya'asagkek sa' aptamhágkaxa; esawhakpohok apagko' sa' ma'a apkelnápomákpo nak chá'a exchep.

Isaías 51:14

Kaxwók sa' kólántekkesek ma'a énxet'ák apkelmomap nak; meletsepek sa' ma'a kañe' kélxátamakxa nak, yetneyk sa' nahan katnehek ma'a aptéyak.

Jeremías 38:13

Apkékessek axta táma m'a énxet'ák, aptekkessek axta m'a. Tén axta Jeremías aphákxo makham ma'a kañe' kélhaxtegkesso nak wesse' apwányam apxagkok.

Jeremías 38:6

Yetlókok axta nahan apma m'a Jeremías, apchaqxegkessek axta m'a wesse' Malquías nak yámelchet apagkok, ekyetnama axta m'a kélhaxtegkesso nak wesse' apwányam apxagkok. Táma axta nahan aptétak apchaqxegkesa, hakte méko axta yegmen ma'a yámelchet nak, yelpa' axta aqsa, apweywegkek axta Jeremías ma'a yelpa'.

Habacuc 3:5

Xegkek apmonye' m'a nenlegeykegkoho ekmaso nak, keñe neptámen ma'a ekmexanma egyempehek segaqhamo nak.

Zacarías 9:11

Keso aptáhakxa nak appeywa Wesse' egegkok se'e: “Jerusalén, alántekkesek sa' ko'o kañe' máxek meyke nak yegmen ma'a énxet'ák kélagkok kélxata axta kañe', eñama m'a éma kélteméssesso axta ekmámnaqsoho agko' ekhémo mók nélpaqhetchásamáxkoho.

Números 3:13

hakte ko'o ahagkok ma'a apyókxoho átnaha apketkók kélketchek nak. Élpagkanmeyk axta ko'o átnaha apketkók apketchek nak israelitas tén han ma'a apmonye'e ekpalleyam nak étkók apnaqtósso, cham'a sélnapma axta ko'o apyókxoho átnaha apketkók apketchek ma'a egipcios. Cháxa keñamak sektéma nak ko'o ahagkok xa. Ko'o sekteme Wesse'.”

Números 33:4

neyseksa apkelátawanye apketchek átnaha apketkók ma'a apyókxoho egipcios, Wesse' egegkok axta apkelnapma, apkeltémókxa axta kólteméssesek apkelenmexma m'a aqsok apkeláyókxa nak.

Números 8:17

hakte ko'o ahagkok ma'a apyókxoho apmonye' apkelwete nak chá'a apketchek ma'a israelitas, ekhawo han ma'a émha amonye' ekpalleyam nak chá'a étkók ma'a aqsok apnaqtósso. Élpagkanmeyk axta ko'o apketchek átnaha apketkók nak israelitas, cham'a sélnapma axta átnaha apketkók apketchek ma'a egipcios.