Eclesiastés 8:8 - Biblia Enxet

⁸ Méko ekha ekmowána kamagkok ektémakxa nak negyennaqte, méko han ekmowána kanókasha m'a nétsapma nak. Méko awanchek kaxyánegkesek xa kempakhakma nak. Megkawagkasek teyp aptémakxa ekmaso m'a énxet ekmaso nak aptémakxa.

Eclesiastés 8:8 ပူးပေါင်းရင်းမြစ်များ

2 Samuel 14:14

Negyókxoho sa' agmaskok; máxa negko'o m'a yegmen kélyegkenmal'a náxop, megkólmowánal'a kólmekxak makham. Megyaqhehek Dios xama énxet enxoho, eltamhok aqsa makham épetchegwaták ma'a aphayam nak mók nekha'.

2 Reyes 7:15

Apkelyetlókek axta aptamnek sirios ekweykekxoho m'a Jordán, apkelwet'ak axta han chá'a ámay apxámokma apáwa apkexakha m'a sirios, tén han mók aqsok, eñama apkelpekhésso apkenyahéyak. Keñe axta apkeltaqháwo makham ma'a wesse' apwányam apkeláneykha, apkeltennássekxo ekyókxoho ektáhakxa apkelwete.

Job 14:5

Xeyep chá'a apxeyenma ekwánxa ekhem apweynchámeykha énxet, appekkenchessegkek han néxa apweynchámeykha megkamopwána eyeykha',

Job 34:14

Apkelyementamákxeyk agkok apkelennama m'a énxet'ák élméssama nak apkelyennaqte, eletsapok apyókxoho, xapop makham etnahagkokxa'.

Salmos 89:48

¡Méko awanchek kaweynchamha chá'a, tén han megkatsepek xama enxoho! ¡Méko awanchek kamallánek ekmowána m'a nétsapma!

Salmos 9:17

Exnagwók sa' apkelmaheykegkaxa nak apkeletsapma m'a élmasagcha'a nak apkeltémakxa, tén han ma'a melya'áseyak nak Dios, tén han élwagqámeyak nak ma'a Dios;

Proverbios 12:3

Megkapasmehek énxet ma'a aptémakxa ekmaso nak; exhok eyke yámet ekyennaqtél'a élatchesso kepmenák xapop ma'a énxet élpéwomo nak apkeltémakxa'.

Proverbios 14:32

Kasexnáneyekxohok agkok chá'a aptémakxa ekmaso m'a énxet ekmaso nak aptémakxa'; keñe m'a énxet meyke nak aptémakxa, kamyók chá'a m'a meyke aptémakxa nak.

Eclesiastés 3:21

¿Yaqsa ekya'ásegkoho énxet aphagák ekmeyeykekxo chá'a néten, tén han ma'a ahagák nak aqsok nawhak ekmeyeykekxo chá'a kañe' xapop ekmattawóneg?

Eclesiastés 8:13

keñe eyke m'a énxet'ák élmasagcha'a nak apkeltémakxa, asagkek héxta chá'a katnehek apheykha, kayaqwáthok héxta nahan chá'a apheykha, máxa yámet pessesse héxta chá'a etnahagkok.)

Eclesiastés 9:12

Méko ekya'ásegkoho ekwánxa kammok néxa ekhem agkok: ekhawo ektémakxa nak kelasma kólmok yám'én, keñe náta ma'a kelhanma, cháxa ektémakxa nak han énxet xa, katlakkasek aqsa chá'a káhapwak aqsok ekmaso neyseksa melhaxanma.

Isaías 28:15

Kéltáhak kélpaqmeta kéxegke s'e: “Nenlanak negko'o ekhémo mók nélpaqhetchásamáxkoho m'a nétsapma, nélpaqhetchásexkók negko'o m'a apkelmaheykegkaxa nak chá'a apkeletsapma, yaqwayam sa' mehegwatamók ma'a ekwa'a sa' aqsok ekmaso agko'; nélyexanmomchek negko'o m'a nélmowancha'a amya'a nak, néláhakkásamaxcheyk ma'a nélyexancháseykha nak egmók.”

Isaías 28:18

Kólmasséssók sa' ma'a kélhéssamo axta mók kélpaqhetchásamáxkoho m'a nétsapma, keñe sa' ma'a kélpaqhetchásamáxkoho axta m'a apkelmaheykegkaxa nak chá'a apkeletsapma, meyke ekyennaqte sa' katnehek. Kawak sa' ma'a aqsok ekmaso agko' nak, keñe sa' kéxegke megkólenmaxaxche'.

Isaías 47:10

Chásenneykekxeyk axta exche' m'a ektémakxa ekmaso, axta entemék chá'a awáxok se'e: ‘Méko sét'a.’ Kelyexancháseykha axta chá'a exche' m'a ektémakxa ekya'áséyak aqsok tén han ekyekpelchémo. Axta entemék chá'a awáxok se'e: ‘Ko'o aqsa, méko émók sekhawo.’