Eclesiastés 7:12 - Biblia Enxet

¹² Hentaqmelcheshok chá'a m'a negya'áseykegkoho nak aqsok, hawók ma'a selyaqye nak, yeykhágweykmók eyke m'a negya'áseyak nak aqsok, hakte awanchek kagkések apyennaqte m'a énxet ekha nak apya'áseykegkoho aqsok.

Eclesiastés 7:12 ပူးပေါင်းရင်းမြစ်များ

Job 1:10

Megyahayók xép kólteméssessamhok exma ekmaso m'a, tén han apketchek ekweykekxoho m'a aqsok apagkok nak; epasmok nahan chá'a ekyókxoho aqsok apkelanakxa enxoho, xámok agko' nahan apnaqtósso, méko ekhawo s'e ekyókxoho apkelókxa nak.

Salmos 57:1

Dios ahagkok, yepyósho ko'o hélano', yepyósho hélano', hakte ekya'aweykteyk xép séltamho hemyók. Axnaták sa' ko'o kóneg apxempenák yaqwayam hemyók, ekwokmoho ekyeyk'a m'a aqsok ekmaso.

Proverbios 11:4

Mehempasmek sa' ekxámokma aqsok egagkok ma'a ekhem nélyekpelchamáxchexa sa', ektaqmalma nentémakxa sa' eyke hegwagkasek teyp ma'a nétsapmakxa nak.

Proverbios 14:20

Kammohok aptaqnaweykekxa apnámakkok apagko' ma'a énxet meyke nak aqsok apagkok; apxámok eyke etnehek apnámakkok ma'a énxet ekha nak aqsok apagkok.

Proverbios 2:11

Apmopwána apkeláneykegkoho aptémakxa tén han apmopwána aqsok, sa' katnehek chá'a exchep ektaqmelchesso xa;

Proverbios 2:7

Epasmok chá'a Wesse' egegkok ma'a énxet'ák élpéwomo nak apkeltémakxa', elmeyók han chá'a m'a meyke nak aqsok ekmaso apkeláneyak;

Proverbios 3:18

Negya'áseykegkoho aqsok ekmésso ekyennaqte apnények ma'a énxet ektáha enxoho apmà; ¡apkeleñémo énxet meyenyeykekxa nak!

Proverbios 8:35

Hakte cham'a ektáha nak ko'o séteyeykekxa, cháxa apwetákxo ekyennaqte egnények xa, étak han ektaqmeleykha apwáxok elanok ma'a Wesse' egegkok;

Proverbios 9:11

Negya'áseykegkoho aqsok keñamak peya kawegqohok apweynchámeykha, exámhok sa' han apyeyam apha.

Eclesiastés 10:19

Nento ekteme chá'a ekpeykáseykekxa egwáxok, keñe vino hegátséssesha chá'a egwáxok, cham'a ekha enxoho selyaqye.

Eclesiastés 2:13

Ekweteyak axta negya'áseyak aqsok ektáha ektaqmela, megkaxnawok ma'a segyeyháxma nak, ekhawo nak han ektémakxa élseyéxma ektaqmalma, megkaxnawok ma'a ekyaqtéssóxma nak.

Eclesiastés 7:19

Kagkéshok chá'a apyennaqte negya'áseykegkoho nak aqsok ma'a énxet ekha nak apya'áseyak aqsok, kaxnók ma'a diez apkeltaqmelchesso nak chá'a xama tegma apwányam asextók chá'a katnehek apkelyennaqte.

Eclesiastés 9:16

Ekxénchek ko'o ektaqmela antéhek ekha negya'áseyak aqsok, megkaxnawok antéhek magaye aqsok, neyseksa eykhe megkahaxnamáxkoho aptáhakxa appeywa m'a énxet meyke nak aqsok apagkok ekha nak apya'áseyak aqsok, tén han megkamáxko enxoho chá'a takha' aptáhakxa.

Eclesiastés 9:18

Yeykhágweykmók negya'áseyak aqsok ma'a kélmeykha nak kempakhakma. Ketsék magaqhémo aqsok, xámok katnehek eknaqtawáseykha aqsok.

Isaías 30:2

Apkelmeyákxeyk ekpekhe agko' ma'a Egipto, keñe ko'o méko sélpaqhetchásamákpoho; apkelya'aweykxeyk apkeltamho elmeyók ma'a faraón, apkelhákxeyk ma'a kañe' Egipto apkeltamho elmeyawakpok.

Isaías 32:2

Máxa sa' etnehek chá'a xama m'a negyexánegkesseykekxexal'a éxchahayam, segmasmal'a kawak ma'a éxchahayam ekyennaqte agko', máxa sa' etnahagkok ma'a ektémól'a yegmen atamnek ényél'a m'a neyseksa ekyamáyekxa nak xapop, máxa sa' etnahagkok ma'a ektémól'a meteymog ekyawe agko' pessesse agkok émha m'a meykexa nak énxet.

Isaías 33:6

egkések sa' chá'a ektaqmalma apheykha énxet'ák ma'a. Aqsok ekmomnáwa segwagkassamo teyp ma'a ekha nak negya'áséyak tén han negyekpelchémo; ekxámokma aqsok egagkok akke m'a negaye nak Wesse' egegkok.

Deuteronomio 32:47

Hakte háwe amya'a naqsal'a s'e; keso segánamakxa nak yaqwayam kagkések ekyennaqte kélnénya'ák kéxegke, sa' kañék ekmésso ekwenaqte kélheykha m'a xapop, ekyetnama nak ma'a neyp wátsam Jordán, cham'a yaqwánxa sa' kólmok.”

Jueces 9:15

Tén axta yámet ekha nak am'ák ektáha éláneya, kélmenyeyk sa' agkok atnehek wesse' apwányam kélagkok, kélyókxoho sa' kólhakha chá'a kóneg pessesse ahagkok; megkólmenyeyk sa' agkok atnehek wesse' apwányam kélagkok, atekkesek sa' táxa yaqwayam kalwatnek ma'a ekyókxoho cedro yámet élaqnéyak nak Líbano.