Eclesiastés 12:13 - Biblia Enxet

¹³ Wánxa amya'a kéllegasso. Penchásexcheyk kaxwók ekxénamaxche aqsok. Etne apcháyo Dios, elána' m'a apkeltémókxa nak antéhek, hakte cháxa yaqwayam chá'a elanagkok énxet xa.

Eclesiastés 12:13 ပူးပေါင်းရင်းမြစ်များ

Génesis 22:12

Aptáhak axta Dios apchásenneykha apcháneya s'e: —Ná etnéssessamho aqsa exma ekmaso apketche, ekya'ásegkók eyke kaxwók apcháyo exchep ma'a Dios, memyágweykxak peya hegkések apketche xama apagko'.

1 Reyes 2:3

Elyahakxoho sa' ma'a apkeltémókxa nak etnehek Dios Wesse' apagkok, elának ma'a apmopmenyého nak chá'a, tén han segánamakxa apagkok, apkeltémókxa nak antéhek, tén han ma'a apchánamakxa nak antéhek, ekhawo ektémakxa nak eknaqtáxésamaxche m'a Moisés segánamakxa apagkok, yaqwayam sa' kataqmelek chá'a ekyókxoho aqsok apkelanakxa enxoho chá'a, tén han ma'a apmahágkaxa enxoho chá'a.

Job 28:28

Keñe axta Dios aptáha apkeláneya énxet'ák: “Nágkólyensem chá'a kélyetleykha Wesse' egegkok: cháxa negya'áseykegkoho aqsok xa; negyamasma aqsok ekmaso: cháxa ekha negmowána aqsok xa.”

Salmos 111:10

Néltamhók agkok antéhek ekyawe negya'áseykegkoho, kéméxcheyk sekxók antéhek negáyo Wesse' egegkok; ektaqmeleykha élchetámeykha apwáxok etnehek ma'a apcháyo nak chá'a. ¡Megkamassegwomek sa' chá'a kélteméssesso apcheymákpoho Dios!

Salmos 145:19

Elanaksek chá'a aqsok apkelmopmenyého m'a ektáha nak chá'a apcháyo; apkelmaxnakkek agkok chá'a yának epasmok, yeyxhok chá'a, keñe elwagkasek chá'a teyp.

Salmos 147:11

eyke kalkohok chá'a apwáxok ma'a ektáha nak chá'a apcháyo, melya'ásseyam nak chá'a ektémakxa segásekhayo.

Proverbios 1:7

Néltamhók agkok antéhek negya'áseykegkoho aqsok, kéméxcheyk sekxók antéhek negáyo Wesse' egegkok; elwanyaha eyke chá'a énxet élyeyháxma xa ektémakxa nak negya'áseykegkoho aqsok, tén han ma'a ektémakxa nak chá'a sẽlpékessáseyak.

Proverbios 19:23

Kawegqohok negweynchámeykha m'a nenteme nak chá'a negáyo Wesse' egegkok; kapayhekxak chá'a egwáxok neyseksa negha, méko katnehek xama aqsok ekmaso nenlegeykegkoho.

Proverbios 23:17

Ná eyásekkes apkeltémakxa m'a énxet'ák melya'assáxma nak; etne aqsa chá'a apcháyo m'a Wesse' egegkok;

Eclesiastés 2:3

Ektaqmelchessamók axta sekmeykha negya'áseyak aqsok sekyama vino, yaqwayam hegkések ekpayheykekxa ewáxok, keñe axta sekmeyásexkoho m'a yaqwayam enxoho ay'asagkoho', kexa ektaqmela etnehek énxet xa, neyseksa apha ekyaqwate keso náxop.

Eclesiastés 3:14

Ekya'ásegkók nahan ma'a ekyókxoho Dios axta apkelane megkamassegwomek chá'a. Méko han kawának kalánekxoho', tén han kamasseksek; hakte Dios axta apteméssesso xa ektémakxa nak, yaqwayam enxoho chá'a negko'o agáwhok ma'a.

Eclesiastés 5:7

Kéméxcheyk xép etnehek apcháyo m'a Dios, neyseksa ekxákma élwanmésso ekmaso énxet'ák, tén han neyseksa élpaqmétamáxche naqsa, cham'a aqsok mékoho nak.

Eclesiastés 6:12

Méko awanchek kaltennaksek yaqwánxa etnehek énxet neyseksa apha ekyaqwate keso náxop, cháxa apha nak, ektáha han aqsok mékoho. Máxa pessesse ekmanyehel'a chá'a kayeykhak katnehek ma'a apweynchámeykha nak. ¿Yaqsa awanchek kaltennásekxohok yaqwánxa katnehek keso náxop, cham'a natámen apketsapma?

Eclesiastés 7:18

Ektaqmelakxoho exchep emagkok ekyennaqte s'e aqsok nak, meyke apyenyeykekxa apméyak ma'a mók aqsok nak. Énxet apteme nak apcháyo Dios, emallánek chá'a xa ekyókxoho aqsok nak.

Eclesiastés 8:12

¡Cháxa ektémakxa nak chá'a m'a énxet apkelane nak aqsok ekmaso, cham'a apkelenxanmeykegkoho nak chá'a apkelane aqsok ekmaso, kawegqohok chá'a apha! (Ekya'áseykegkók eyke ko'o m'a énxet'ák apkeláyo nak chá'a Dios, tén han ma'a apkelyeheykekxoho nak chá'a, tásek héxta chá'a katnehek apheykha;

Eclesiastés 8:5

Énxet apkelyaheykekxoho nak wesse' apwányam appeywa, megkatnégwomok chá'a exma. Énxet apya'áseykegkoho nak aqsok, ey'asagkohok chá'a ekhem eyaqhókxa elyahakxoho', ey'asagkohok nahan chá'a eyéméxchexa nak chá'a elanaksek.

Miqueas 6:8

Énxet, apkeltennássek xép Wesse' egegkok ma'a aqsok ektaqmela nak, tén han yaqsa apkelhaxna elának xép: apkelhaxneyk elának ma'a aptémakxa ekpéwomo, tén han apmopyósa elanok pók, tén han elyahakxohok yetlo megkeymáxkoho apwáxok ma'a Dios.

Deuteronomio 10:12

“Israelitas, ¿Yaqsa apkeltamho kaxwók kóllának kéxegke m'a Dios Wesse' kélagkok? Wánxa aqsa apkeltamho kólyahakxoho' tén han kólyetlók kélyókxoho m'a ámay apagkok; tén han kólásekhoho', tén han kólpeykeshok ekweykmoho kañók agko' kélwáxok tén han ma'a élchetámeykegkaxa nak kélwáxok,

Deuteronomio 10:20

“Kólyahakxoho chá'a Dios Wesse' kélagkok, kólpeykesho nahan chá'a wánxa m'a; nágkólyensem kélyetleykha, peyk sa' agkok chá'a kóltéméssesek ekmámnaqsoho kélpeywa, kóllána chá'a yetlo kélxeyenma m'a apwesey.

Deuteronomio 4:10

“Axta aptemék ko'o seyenagkama Wesse' egegkok, kélaqnágweykmo axta nápaqtók Dios Wesse' kélagkok ma'a egkexe Horeb: ‘Yánchásekxa sa' énxet'ák yaqwayam sa' yeyxhok sekpeywa tén han yaqwayam sa' kaltámeyagkok sélyeheykekxoho ko'o yókxoho ekhem neyseksa apheykha, yaqwayam sa' elxekmósek apketchek elanagkok ekhawo nak xa.’

Deuteronomio 4:2

Nágkólyepetchásekxa aqsa mók amya'a m'a séltémo axta kóllána', nágkólmasses nahan xama enxoho; kóllána chá'a m'a Dios Wesse' kélagkok nak segánamakxa apagkok, séltamho nak ko'o kóllána'.

Deuteronomio 6:2

Sa' kañék kéláyo chá'a kéxegke Dios Wesse' kélagkok xa, tén han kóllának chá'a segánamakxa, tén han apkeltémókxa nak chá'a antéhek neyseksók kélheykha makham, sekmésso axta ko'o kéxegke tén han ma'a kélketchek nak tén han ma'a kéltawán'ák nak; keñe sa' ahóxek agko' katnehek kélheykha.

1 Samuel 12:24

Kóláwhok sa' chá'a kéxegke m'a Wesse' egegkok, kólpeykeshok sa' han chá'a ekmámnaqsoho, yetlo kélméssamo agko' kélwáxok, kaxén sa' chá'a kélwáxok ekxámokma agko' aqsok apkelane, yaqwayam epasmok kéxegke.