Deuteronomio 4:26 - Biblia Enxet

²⁶ ekpekkenchek ko'o sakhem néten tén han náxop yaqwayam katnehek ekweteykegkoho, kaxwók sa' kólmassegwók kéxegke m'a apkelókxa yaqwánxa nak kólmok, cham'a neyp wátsam Jordán nak. Megkawegqók sa' kélheykha m'a xapop nak, kólmasséssók sa' kélyókxoho.

Deuteronomio 4:26 ပူးပေါင်းရင်းမြစ်များ

Génesis 19:13

hakte agmasséssók sa' negko'o s'e yókxexma nak. Xámokmeyk apxénamap ekmaso s'e énxet'ák apheykha nak tegma apwányam, weykmek ma'a aphakxa nak Wesse' egegkok, cháxa keñamak sẽláphasa nak apkeltamho agmasséssók.

1 Reyes 9:7

alántekkesek sa' ko'o Israel ma'a xapop sekméssamakxa axta, alyetnakhaksek sa' sekhakxa tegma appagkanamap sekteméssessama axta appagkanamap, apkelasmésamap sa' atnéssesek Israel nepyeseksa m'a apyókxoho pók aptémakxa énxet'ák nak.

Isaías 1:2

Néten tén han náxop, kóleyxho aptáhakxa nak appeywa Wesse' egegkok: “Éktegkessegkek ko'o kélketchek ekwokmoho aptamhágko apkelwányam, keñe sénmexeykekxo.

Isaías 6:11

Ektáhak axta ko'o sélmaxneyeyncha'a s'e: Wesse', “¿Háxko sa' ekwánxa ekhem kawomhok xa?” Aptáhak axta seyátegmowágkokxo s'e: “Sa' kawomhok ma'a kélmasséssekmo tegma apkelyawe, aptáha sa' meyke apagko' énxet apheykha m'a kañe'; tén han ekwokmoho sa' aptamhákxo meyke apagko' énxet ma'a tegma, tén han ektamhákxo meyke xama aqsok ma'a yókxexma,

Jeremías 16:13

Cháxa keñamak peya nak ko'o alántekkesek kéxegke s'e xapop nak, alya'aksek sa' xama apchókxa megkólya'ásegkaxa nak kéxegke, tén han melya'áseykegkaxa axta m'a kélyapmeyk nano' axta kéxegke, sa' kólpeykeshok chá'a mók aqsok kéláyókxa yókxoho ekhem ma'a tén han yókxoho axta'a, megkalepyóshek sa' ko'o alanok kéxegke.

Jeremías 2:12

¡Néten, keygwe naqtók xa aqsok nak! ¡Kalpexyennem eyeye! Ko'o sekxeyenma xa, sektáha nak Wesse'.

Jeremías 22:29

¡Xapop; keyxho Wesse' egegkok appeywa!

Jeremías 32:24

“Apkelánegkek kaxwók apkelchántéyak néten ma'a caldeos, yaqwayam ektamagkok ma'a tegma apwányam. Kempakhakma, meyk, tén han negmasse sa' kañék emok tegma apwányam ma'a ektáha nak apketámeyam. Wesse', apwet'ak xép ektáha m'a apxeyenma axta chá'a katnehek.

Jeremías 44:22

Massegkek axta eyke apkelenmáxamap Wesse' egegkok ma'a aqsok ekmaso kélláneyak, kélláneykegko axta kéxegke, cham'a aptaqnagkamo apagko' nak chá'a m'a. Cháxa keñamak ektamheykekxo nak kaxwók ekmaso kélókxa kéxegke tén han meyke xama énxet apha m'a; éñamakxa néltémo hentemegwomhok exma ekmaso tamheykekxa', aqsok eyeymáxkohol'a kataxche'.

Jeremías 6:19

Énxet'ák kélheykha nak keso náxop, kóleyxho: Wáphássesek sa' ko'o aqsok ekmaso s'e énxet'ák nak, ekyaqmageykekxa élxéneykha chá'a apkelwáxok elanagkok aqsok ekmaso; hakte melyaheykekxak ma'a sekpeywa nak, aptaqnagkamchek aqsa m'a segánamakxa ahagkok nak.

Ezequiel 33:28

Meykexa énxet sa' atnessásekxak ma'a apchókxa tén han meyke xama aqsok, amasséssessók sa' nahan ma'a ekyennaqte ekméssama nak chá'a eyeymáxkoho. Meykexa énxet sa' katnekxak ma'a meteymog élekhahéyak nak Israel; méko sa' kamhagkok kaxwók ma'a.

Ezequiel 36:4

Meteymog élekhahéyak Israel, kóleyxho Wesse' egegkok appeywa apcháphássesso m'a meteymog élekhahéyak, tén han ma'a egkexe yámnáxap'awo nak, tén han ma'a wátsam nak tén han ma'a élyapwátegweykenxa nak chá'a xapop; tén han ma'a tegma aphopák appalleyam axta meyke nak énxet ma'a kañe', tén han ma'a tegma apkelyawe meyke nak xama aqsok ma'a kañe Israel, apkelmenyexchessama axta aqsok apagkok ma'a énxet'ák apheykha nak nepyáwa, tén han aptéma axta apkelasmeyáseykha chá'a.

Levítico 18:28

Nágkalántekkes aqsa kéxegke apchókxa, eñama kélláneyak aqsok ekmanyása, ektéma axta élántekkessama m'a énxet'ák apheykha axta apmonye'e m'a, amonye' axta kélwayam kéxegke.

Miqueas 1:2

Kóleyxho sa' se'e, énxet'ák kélyókxoho nak; kóltaqmelchesho sa' kélháxenmo s'e kélyókxoho kélheykha nak ekyókxoho apchókxa: Elxénchásekxohok sa' kéltémakxa kéxegke Wesse' egegkok ma'a aphakxa nak tegma appagkanamap aptaqmalma apagkok.

Miqueas 6:2

Kéxegke egkexe, kóleyxho sa' se'e tén han xapop awhak: peyk elyekpelkohok kaxwók Wesse' egegkok énxet'ák apagkok, peyk eltennaksek aqsok élsexnenagko m'a énxet'ák Israel.

Deuteronomio 11:17

hakte eltaqnaweygkok sa' kéxegke Wesse' egegkok kéltáha enxoho xa ektáha nak, megyáphássesek sa' chá'a m'a ekmámeye; keñe sa' xapop megkeyxnések chá'a m'a aqsok kélcheneykekxa, kaxwók sa' nahan kéxegkáxa kólmassegwók ma'a xapop ektaqmalma apmáheyókxa nak egkések ma'a Wesse' egegkok.

Deuteronomio 28:20

“Yáphássesek sa' kéxegke Wesse' egegkok ekmaso nak negha, magya'áseyak nak nentáhakxa tén han ekyentaxnamo egwáxok ekyókxoho aqsok kéllanakxa enxoho chá'a, kaxwók sa' nahan emasséssók kélyókxoho, eñama kélyamasma, kéllánéyak ma'a kéltémakxa ekmaso.

Deuteronomio 28:22

Yáphássesek sa' nahan ma'a negmasse ekmanyehe nak chá'a kapayhekxa', ekmexanma egyempehek ekmaso, élyephe egyempehek, tén han ekmexanma agko' exma, ekyamáyóxma meyke yegmen, tén han askok yaqwayam katwássesha m'a hótáhap kélcheneykekxa, negmasse ekmaso yaqwayam sa' katnahagkok chá'a kéxegke ekwokmoho ekmasséssekmo.

Deuteronomio 28:45

“Káhapwak sa' kéxegke ekyókxoho s'e aqsok ekmaso nak, kalyetlawha sa', kaltahanyekxak sa' nahan ekwokmoho ekmasséssekmo kéxegke, hakte megkólmenyeyk kólyahakxohok ma'a Dios Wesse' kélagkok, megkólmenyeyk nahan kóllanagkok ma'a apkeltémókxa nak chá'a antéhek tén han segánamakxa apkeltémo axta chá'a kóllána'.

Deuteronomio 28:61

Yáphássesek sa' nahan mók negmasse tén han nenlegeykegkoho ekmaso megkaxeyenma nak ekpeywa s'e weykcha'áhak nélxekmowasamáxche nak, ekwokmoho ekmassessekmo kéxegke.

Deuteronomio 29:28

apkelántekkessek nahan apchókxa yetlo aplómo apagko' tén han yetlo megkaleklo agko' apwáxok apkelányo, apkexakhagwokmek ma'a mók apkelókxa, ekhawo ektémakxa nak se'e kaxwo nak.’

Deuteronomio 31:28

Kólnaqlanta apyókxoho apkelámha apmonye'e tén han apkelámha apmonye'e apagkok nak chá'a énxet'ák kélagkok se'e, yaqwayam sa' ko'o allegaksek se'e aqsok nak tén han apekkenek ko'o néten tén han náxop yaqwayam katnehek chá'a ekweteykegkoho m'a aqsok apkelánegkaxa enxoho chá'a.

Deuteronomio 32:1

“Néten, keyxho sa' sekmako nak ko'o altennaksek; xapop, kañoho sa' sekpeywa.

Deuteronomio 7:4

hakte eltamhok sa' eyensamok apkelyetleykha Wesse' egegkok kélketchek nak kéxegke m'a, yának sa' elpeykeshok ma'a mók aqsok kéláyókxa nak; keñe sa' eltaqnaweygkok kéxegke m'a Wesse' egegkok, emasséssók sa' nahan ekmanyehe agko'.

Deuteronomio 8:19

“Kelwagqámeygkek sa' agkok chá'a kéxegke m'a Dios Wesse' kélagkok, kélyetlákxo enxoho m'a pók kéláyókxa nak tén han kélpeykásawo enxoho, naqsók ko'o ektemessásak kaxwók sa' kólmasséssók kéxegke kélyókxoho.

Deuteronomio 8:20

Sa' kóltéhek kéxegkáxa kólmasséssók kélyókxoho yaqwánxa nak etnéssesek Dios Wesse' kélagkok emasséssók ma'a énxet'ák apheykha nak chá'a kélmonye'e eñama megkólyaheykekxa'.

Josué 23:16

megkóllánegko enxoho m'a ekhémo mók nélpaqhetchásamáxkoho apkelánesso axta kéxegke m'a Wesse' egegkok. Kélyo'ókmek sa' agkok kólpeykeshok ma'a mók aqsok kéláyókxa nak, tén han kélháxegwokmo enxoho amonye'e m'a, eltaqnaweygkok sa' kéxegke Wesse' egegkok, kaxwók sa' han emasséssók se'e xapop ektaqmalma apmésso axta.”

Josué 24:20

Kélyenyókek sa' agkok kéxegke, kélyetlákxo enxoho m'a mók aqsok kéláyókxa nak, eyaqmagkásekxak sa' Wesse' egegkok yahak aqsok ekmaso, emasséssók sa' nahan, neyseksók eykhe ektaqmalma apteméssessamakxa kéxegke.