Deuteronomio 4:2 - Biblia Enxet

² Nágkólyepetchásekxa aqsa mók amya'a m'a séltémo axta kóllána', nágkólmasses nahan xama enxoho; kóllána chá'a m'a Dios Wesse' kélagkok nak segánamakxa apagkok, séltamho nak ko'o kóllána'.

Deuteronomio 4:2 ပူးပေါင်းရင်းမြစ်များ

Salmos 78:7

yaqwayam enxoho etnahagkok apkeláyo m'a Dios, tén han megkalwagqamagkehek ma'a aqsok apkelane axta; yaqwayam enxoho elyahakxohok han ma'a apkeltémókxa nak antéhek,

Proverbios 30:6

Etne chá'a aptáhakxa enxoho chá'a apcháneya m'a, ná exeyenwom aqsa chá'a m'a metnahakxa enxoho chá'a appeywa; epaqhetchesek katnehek ma'a, keñe exchep etnehek apmopwána amya'a.

Eclesiastés 12:13

Wánxa amya'a kéllegasso. Penchásexcheyk kaxwók ekxénamaxche aqsok. Etne apcháyo Dios, elána' m'a apkeltémókxa nak antéhek, hakte cháxa yaqwayam chá'a elanagkok énxet xa.

Jeremías 26:2

Aptáhak axta apcháneya s'e: “Etnegwakxa sa' kañe' tegma appagkanamap, exén sa' ekyókxoho m'a séltamho axta eltennaksek énxet'ák apkeleñama nak tegma apkelyawe Judá, yaqwayam hélpeykeshok chá'a ko'o m'a tegma appagkanamap nak. Eltennés sa' ekyókxoho.

Deuteronomio 1:3

Apkeltennásegkek axta Moisés israelitas ekyókxoho aqsok apkeltémókxa axta chá'a elanagkok Wesse' egegkok, cham'a ektáhakxa axta émha amonye' ekhem ma'a pelten once, ektáha axta cuarenta apyeyam, natámen apyaqmasso axta Moisés ma'a Sihón, wesse' apwányam apagkok axta m'a amorreos, aphama axta m'a Hesbón, tén han ma'a Og, wesse' apwányam axta m'a yókxexma Basán, aphama axta m'a Astarot, yókxexma Edrei.

Deuteronomio 12:32

“Kóllána sa' chá'a ekyókxoho m'a séltamho nak kóllána', meyke kélyepetcháseykekxa mók amya'a tén han meyke kélmassésso xama enxoho.

Deuteronomio 13:1

“Aptekkek sa' agkok kélnepyeseksa kéxegke xama apkeltemessásamap Dios appeywa aplegasso essenhan apxeyenma nak chá'a apwete ektémakxa apwanmagko, keñe eltennaksek chá'a aqsok magkenatchesso nak agweta' essenhan ma'a sempelakkasso nak agweta',

Deuteronomio 33:4

Egméssek negko'o segánamakxa m'a Moisés sempekkencháseykekxa axta yaqwayam antéhek egagkok, nenteme nak Jacob énxet'ák apagkok,

Deuteronomio 4:14

Ko'o axta nahan apkeltémók alxekmósek kéxegke segánamakxa tén han nélánémaxchexa nak antéhek, yaqwayam sa' kóllánegwók ma'a xapop kélmáheyókxa nak kólhamok.

Deuteronomio 4:40

Kóllána chá'a m'a segánamakxa apagkok sekmésa nak ko'o kéxegke s'e ekhem nak, tén han ma'a nélánémaxchexa nak chá'a antéhek, keñe sa' tásek chá'a katnehek ektáhakxa kéxegke tén han ma'a kéltawán'ák kélnentámen nak, kólhakha sa' nahan apxámokma apyeyam ma'a apkelókxa apmáheyókxa nak egkések meyke néxa m'a Dios Wesse' kélagkok.”

Deuteronomio 4:5

Élxekmóssegkek axta ko'o kéxegke segánamakxa tén han nélánémaxchexa nak antéhek apkeltémo axta ko'o alxekmósek ma'a Dios Wesse' ahagkok, yaqwayam sa' kóllanagkok chá'a m'a apkelókxa yaqwánxa sa' kólhamok.

Deuteronomio 5:29

¡Katnoho annal'a chá'a élchetamso apkelwáxok xa ektáha nak, heyáwhok chá'a ko'o, elanagkok nahan chá'a yókxoho ekhem ma'a segánamakxa ahagkok nak, yaqwayam enxoho kataqmelek chá'a apheykha, ekweykekxoho m'a apketchek!

Deuteronomio 5:32

Kóllána sa' chá'a ekyókxoho m'a apkeltémókxa nak chá'a kóllának ma'a Dios Wesse' kélagkok, meyke kélyetnakhágwayam xama enxoho.

Josué 1:7

Wánxa aqsa séltamho keytek ekwányam agko' apwasqápeykekxoho tén han énnaqtéshok apwáxok, esawhoho sa' elának ma'a ekyókxoho segánamakxa séláneykha Moisés axta apmésso. Elyahakxoho sa' ekyókxoho meyke apcháyam xama, yaqwayam kataqmelhok chá'a ekteyapma m'a ekyókxoho aqsok apkelanakxa enxoho.

Josué 8:35

Ekyókxoho axta apkelyetsetchásak énxet'ák ektáhakxa ekpeywa Josué m'a weykcha'áhak nak, Moisés axta appekkencháseykekxa, nápaqta'awók ma'a énxet'ák Israel, ekyókxoho m'a kelán'ák, sakcha'áletkók, keñe han ma'a apkeleñama nak mók nekha, apheykencha'a nak nepyeseksa m'a énxet'ák Israel.