Deuteronomio 32:11 - Biblia Enxet

¹¹ Axta aptemék Wesse' egegkok apkelpeykessama apmék tén han apkelmoma tén han apkelpatmeykekxo m'a ektémól'a náta ekyawe kampaha m'a ekpayhókxa ekyetnakxa axagkok tén han kalxekmósek élchampe m'a étkók.

Deuteronomio 32:11 ပူးပေါင်းရင်းမြစ်များ

Éxodo 19:4

‘Kélweteyak kéxegke sekteméssessamakxa axta ko'o m'a egipcios, tén han ma'a ektémakxa axta seknaqleykento ko'o kéxegke m'a sekhakxa nak, máxa axta kéltemék kélxegeykmo m'a ektémól'a náta ekyawe kaxnésha néten axempenák ma'a étkók.

Isaías 46:4

atnéssesek sa' nahan chá'a ekwokmoho kéltáha kélwányamo' xa ektáha nak; kamópak sa' eyke kélpátek, apasmok sa' eyke aqsa chá'a. Éláneyak axta ko'o kéxegke, malwátéssemek sa' sélqeyneykha; apasmok sa', alwagkasek sa' teyp.

Isaías 63:9

ekyókxoho apkellegeykegkoho ekyentaxnamo apkelwáxok ma'a. Háwe apkelwagkasso teyp xama m'a apkelápháseykha nak xép; Wesse' egegkok apagko' axta. Axta apkelwagkasso teyp ma'a eñama apkelásekhayo tén han apkelmopyóseka apkelányo, apkelchampásekxeyk axta néten keñe apkelqeynákxo. Cháxa apteméssessamakxa chá'a yókxoho ekhem xa ektáha nak.

Isaías 40:31

elxawagkok sa' eyke chá'a axnagkok apkelyennaqte m'a énxet'ák apcháyo nak chá'a Wesse' egegkok, apwanchek sa' elchampa' ektémól'a m'a náta élyawe; apwanchek sa' yenyahagkok chá'a meyke apkelennamágwayam, apwanchek sa' elxog chá'a meyke apkelyampágwayam.

Isaías 31:5

Sa' etnehek emyók Wesse' ekha nak apyennaqte Jerusalén ma'a ektémól'a náta, ekmasmal'a axagkok, émpeykhal'a m'a néten ekpayhókxa ekyetnakxa. Etaqmelchesek sa', ewagkasek sa' teyp, epasmok sa', emallahanchesek sa' aqsok ekmaso.”

Génesis 1:2

Méko axta han ektémakxa enxoho sekxók ma'a xapop; wátsam ekwányam ekmattawóneg agko' axta aqsa, sawheykekxók axta ekyáqtessóxma, keñe axta Dios espíritu apagkok apkelteykencha'a néten yegmen.

Deuteronomio 33:12

Keñe axta aptáha apxéna Benjamín se'e: “Méko katnehek apweynchámeykha m'a apchásekhayo nak chá'a Wesse' egegkok; etaqmelchesek sa' chá'a m'a Meyke nak Ekhémo. ¡Emyók sa' chá'a!”

Salmos 18:10

Apchántegkek axta m'a xama apchásenneykha ekha nak apxempenák, keñe axta apchampaya apmeyeykekxo néten, seykekxeyk axta éxchahayam.

Jeremías 13:11

Ekteméssessók ko'o apyókxoho énxet'ák Israel ma'a aptémól'a xama énxet apyaqhakkassamól'a aptete nepxet ma'a aptétamap, tén han ma'a apyókxoho énxet'ák Judá, épetcheyók apagko' ko'o m'a, yaqwayam enxoho etnahagkok énxet'ák ahagkok, tén han ellegaksek ma'a sekwesey, tén han kañék sélteméssesso ko'o séláyo, tén han seyeymáxkoho. Makke hélyeheykekxoho'. Ko'o sekxeyenma xa, sektáha nak Wesse'.

Oseas 11:3

Eknaqleykha axta ko'o m'a énxet'ák Efraín, élmeykegkek axta apmék séltáméssama apkelxega; maxta eyke elya'áseykegkok sektáha ko'o séláneykha chá'a.