Deuteronomio 17:2 - Biblia Enxet

² “Wetáxcheyk sa' agkok pók xam'a tegma apkelyawe apméssamakxa nak Dios Wesse' kélagkok apkelánegko énxet essenhan kelán'a m'a aqsok megkaleklamakxa nak apwáxok ma'a Wesse' egegkok, tén han melánéyak nak chá'a m'a ekhémo mók nélpaqhetchásamáxkoho apagkok,

Deuteronomio 17:2 ပူးပေါင်းရင်းမြစ်များ

2 Reyes 18:12

Temegkek axta xa ektáha nak, hakte axta elyeheykekxohok ma'a Dios Wesse' apagkok, aptawáseykha axta aqsa m'a ekhémo mók apkelpaqhetchásamákpoho, axta elyeheykekxohok ekyókxoho apkeltémókxa axta etnahagkok ma'a Moisés, apteme axta Wesse' egegkok apkeláneykha, axta han eláneykegkok.

2 Reyes 21:3

apnaqxátekháseykegkokxeyk axta makham ma'a kélpeykessamókxa axta mók aqsok kéláyókxa', apmassésseyam axta m'a Ezequías, apyáp axta; apkelánegkek axta han kélwatnéssamakxa chá'a aqsok ma'a Baal, apkelanak axta han kéleykmássesso Aserá, ektémakxa axta apkeláneya m'a Ahab, wesse' apwányam axta Israel; apkelpeykessamók axta m'a ekyókxoho aqsok élápogwátéyak nak néten, apkeláyók axta han chá'a,

Job 31:28

Ektemék agkok xa, payhawók héllegássesagkoho'; ¡máxa sektaqnagko atnehek ma'a Dios apha nak néten!

Éxodo 22:19

“Énxet apteméssesseykmohoxma enxoho xama aqsok kéltósso, yáneykpok sa' ematñekxa'.

Éxodo 22:20

“Énxet apkelnáhakkasso enxoho chá'a aqsok kélnaqtósso m'a mók aqsok kéláyókxa nak, ekpayhawo nak eykhe wánxa elmések ma'a Wesse' egegkok, yáneykpok sa' ematñekxa'.

Jeremías 31:32

Cháxa ekhémo mók nélpaqhetchesamaxche nak, megkaxók sa' ma'a sélánéssama axta m'a apyapmeyk nano', sélmoma axta apmék sélántekkessama m'a Egipto; hakte axta eláneykegkok ma'a ekhémo mók nélpaqhetchásamáxkoho ahagkok, sektáhakxoho eykhe ko'o apagkok. Ko'o sekxeyenma xa, sektáha nak Wesse'.

Jeremías 34:18

Apheyásawók axta mók apkelpaqmeyesma nahaqtók ko'o m'a apkelámha apmonye'e nak Judá tén han ma'a Jerusalén, yetlo m'a kélásenneykha axta chá'a m'a wesse' apwányam apxagkok, tén han ma'a apkelmaxnéssesso nak énxet'ák ahagkok, tén han ma'a nápakha nak énxet'ák: appáxqatchek axta neyseksa weyke kennawók étkok, apkelyeykhákxeyk axta chá'a m'a neyseksa nak. Tén axta melánegko m'a ekhémo mók apkelpaqhetchásamákpoho nak, axta elánegkok ma'a aqsok apkelxeyenma axta elanagkok.

Ezequiel 16:38

Sa' atnéssesek añássesagkohok ma'a ektémakxal'a kelán'a ektawáseykha élyamhopma tén han ekyetno ekyógkexma, yetlo seklo sa' wának kamatñekxa'.

Oseas 6:7

“Aphawók Adán ma'a énxet'ák ahagkok, meláneykegkok ma'a ekhémo mók nélpaqhetchásamáxkoho ahagkok, eyamasmeyk nahan sélyetleykha.

Oseas 8:1

“Epáwes apchaqkahasso, aptémól'a m'a énxet apkelhaxneykhal'a nepyeseksa Wesse' egegkok énxet'ák apagkok. Hakte meláneykegkok ekhémo mók nélpaqhetchásamáxkoho ahagkok, apkenmexeykekxeyk ma'a nélxekmowásamáxche ahagkok.

Levítico 20:2

“Etne sa' elának israelitas se'e: “Elyetnak sa' chá'a meteymog yaqhek énxet'ák apheykha nak apchókxa, israelitas essenhan apkeleñama nak mók nekha, apheykha nak ma'a Israel, apkelmésso nak chá'a apketchek ma'a dios Moloc.

Levítico 26:15

kéltaqnawaya enxoho, tén han kélwanyawo enxoho m'a segánamakxa ahagkok, tén han seyánamakxa nak kóltéhek, megkólyahákxo enxoho xama m'a séltémókxa nak kóltéhek, cháxa megkóllana m'a ekhémo mók nélpaqhetchásamáxkoho,

Levítico 26:25

Wahak sa' ko'o kéxegke kempakhakma eñama megkólláneyak ma'a ekhémo mók nélpaqhetchásamáxkoho ahagkok nak; kólenyahagkok sa' chá'a kéxegke kólmeyekxak ma'a tegma apkelyawe kélagkok nak, wáphássesek sa' eyke ko'o negmasse, keñe sa' kéxegke elmok ma'a kélenmexma.

Deuteronomio 17:5

kólnaqlakxak sa' sẽlyekpelchémókxa nak tegma apwányam ektáha nak élane xa aqsok ekmaso nak, keñe sa' kólának kólyetnak meteymog kólnápekxa'.

Deuteronomio 29:18

Nágkólho aqsa étek kélnepyeseksa kéxegke xama énxet, kelán'a, essenhan kélnámakkok tén han énxet'ák kélagkok, apyamasma sakhem ma'a Dios Wesse' egegkok eñama apkelpeykessamo m'a aqsok apcháyókxa nak xa énxet'ák nak. Kólxohok katnehek kéxegke m'a yámet egkepmenák ekmáskel'a tén han ma'a segwayól'a.

Deuteronomio 29:25

Sa' katnehek kélátegmoweykegkokxa s'e: ‘Eyke ñémékxa apyamasma m'a ekhémo mók nélpaqhetchásamáxkoho, apkelánésso axta sekxók apkelántekkessama Egipto m'a apyapmeyk nano' nak Dios Wesse' apagkok,

Deuteronomio 31:20

Hakte élántaxnéssek sa' agkok ko'o m'a xapop séltennassamakxa axta ko'o m'a apyapmeyk nanók axta, cham'a xapop ényahamakxa nak weyke nagkeygmenek tén han ma'a yányawhéna' apyegmenek ektémól'a kanyehek ma'a yegmen, tén han aptókagko sa' ekwokmoho apkelyaqkanakmo tén han apnaqmel'a sa', keñe sa' elyetlakxak ma'a mók kéláyókxa nak, elpeykeshok sa' nahan, keñe sa' ko'o hetaqnawágwók, etwasha sa' ma'a ekhémo mók nélpaqhetchásamáxkoho ahagkok nak.

Deuteronomio 4:23

Eyke, kóllanagkoho sa' kéltáhakxa yaqwayam megkalwagqamagkehek ma'a ekhémo mók nélpaqhetchásamáxkoho apkelánésso axta kéxegke m'a Dios Wesse' kélagkok. Nágkóllána xama enxoho kélpeykessamo kéleykmássesso tén han kélheyáseykegkoho nak ektémakxa ekyókxa xama aqsok, cham'a apmasma nak cha'a kóllának ma'a Dios Wesse' kélagkok,

Josué 23:16

megkóllánegko enxoho m'a ekhémo mók nélpaqhetchásamáxkoho apkelánesso axta kéxegke m'a Wesse' egegkok. Kélyo'ókmek sa' agkok kólpeykeshok ma'a mók aqsok kéláyókxa nak, tén han kélháxegwokmo enxoho amonye'e m'a, eltaqnaweygkok sa' kéxegke Wesse' egegkok, kaxwók sa' han emasséssók se'e xapop ektaqmalma apmésso axta.”

Josué 7:11

Apkelánegkek melya'assáxma m'a énxet'ák Israel, massék apkelánegko m'a ekhémo mók nélpaqhetchásamáxkoho séltémo axta elanagkok. Apkelmágkek ma'a aqsok séltémo axta eykhe kólmasséssók; apkelmenyexágkek han, apkelya'ásegkók eykhe apkelánegko aqsok ekmaso, keñe han apkelpóssákxo m'a neyseksa ekheykegkaxa nak apkelnaqta.

Josué 7:15

Keñe m'a énxet ektáha enxoho apkelma m'a séltémo axta kólmasséssók ekyókxoho, kólwatnekxak sa' yetlo apketchek, keñe han ma'a ekyókxoho aqsok apagkok, eñama apkelane aqsok ekmaso nepyeseksa m'a énxet'ák Israel, keñe han melyaheykekxoho m'a ekhémo mók nélpaqhetchásamáxkoho eñama nak Wesse' egegkok.

Jueces 2:20

Axta keñamak apkeltaqnaweykegko apagko' Wesse' egegkok ma'a israelitas, axta aptáhak appeywa s'e: “Meláneykegkok ekhémo mók nélpaqhetchásamáxkoho sélánésso axta ko'o apyapmeyk nanók axta xa énxet'ák, mopmenyék han hélyahakxohok ko'o.

Jueces 6:31

Aptáhak axta Joás apchátegmowágko ektáha axta apwakhegwayam se'e: —¿Péya kólmeyók kéxegke m'a Baal, keñe han kólpasmekxak kólnapaxche'? ¡Yetsapok sa' amonye' élseye ektáha enxoho apmasma m'a Baal! Dios sa' agkok ma'a Baal, kólho aqsa kamyawaxkohok agko', hakte agkok ma'a ekwatnamáxchexa nak aqsok kélyaqnegkesa nak.