Deuteronomio 11:22 - Biblia Enxet

²² “Agkok kólyensakmok kéllánéyak ekyókxoho m'a apkeltémókxa nak antéhek Dios séltamho exchek ko'o kóllának se'e sakhem nak, tén han kélásekhawo enxoho chá'a m'a Dios Wesse' kélagkok, tén han kélyetlawa enxoho chá'a meyke kélyenseyam ma'a ámay apagkok,

Deuteronomio 11:22 ပူးပေါင်းရင်းမြစ်များ

Deuteronomio 11:13

“Kéllánegkek sa' agkok kéxegke apkeltémókxa nak antéhek séltennasa exchek ko'o s'e sakhem nak, tén han kélásekhawo enxoho Dios Wesse' kélagkok, tén han kélpeykásawo enxoho ekweykmoho kañók agko' kélwáxok tén han ekweykmoho m'a élchetámeykegkaxa nak kélwáxok,

Deuteronomio 6:17

Nágkólyensem kéllánéyak ma'a apkeltémókxa nak chá'a kóltéhek ma'a Dios Wesse' kélagkok, tén han ma'a nélánémaxchexa nak chá'a antéhek tén han segánamakxa, apkeltémo axta kóllána'.

Deuteronomio 10:20

“Kólyahakxoho chá'a Dios Wesse' kélagkok, kólpeykesho nahan chá'a wánxa m'a; nágkólyensem kélyetleykha, peyk sa' agkok chá'a kóltéméssesek ekmámnaqsoho kélpeywa, kóllána chá'a yetlo kélxeyenma m'a apwesey.

Deuteronomio 30:20

kólásekhoho chá'a m'a Dios Wesse' kélagkok, kólyahakxoho chá'a, kólteme chá'a meyke kélyenseyam kélyetleykha, hakte sa' kañék ekyennaqte kélnénya'ák kéxegke m'a tén han apxámokma apagko' apyeyam kélheykha m'a apchókxa apteméssessama axta ekmámnaqsoho agko' egkések Wesse' egegkok ma'a Abraham, Isaac tén han ma'a Jacob, cham'a kélyapmeyk nanók axta kéxegke.”

Génesis 2:24

Cháxa keñamak apyamasma nak chá'a apyáp énxet, tén han egken, yaqwayam épetchak ma'a aptáwa', xama han katnekxak xa ánet nak.

Deuteronomio 11:1

“Kólásekhoho chá'a kéxegke m'a Dios Wesse' kélagkok, kóllána chá'a m'a apchánamakxa nak chá'a antéhek tén han segánamakxa apagkok, tén han ma'a apkeltémókxa nak chá'a antéhek.

Salmos 119:31

Wesse', ekyetlamchek ko'o m'a apchánamakxa nak antéhek, ¡nágyoho amegqáwhok ahagko'!

Deuteronomio 19:9

kólpagkanekxak sa' makham pók apqántánxo tegma apkelyawe apkelyexánegweykekxexa chá'a énxet'ák, kólyepetchásekxak ma'a apqántánxo nanók kélyéseykha nak, (kéllana enxoho chá'a s'e segánamakxa sekmésa exchek sakhem, kélásekha'awo enxoho chá'a m'a Dios Wesse' kélagkok tén han kélyetlawa enxoho chá'a m'a ámay apagkok).