Deuteronomio 1:2 - Biblia Enxet

² Once ekhem axta kammok nenxega náxop agwomok ma'a Cadés-barnea, néñama m'a egkexe Horeb agyetlók ma'a ámay ekmahéyak axta m'a egkexe Seír.

Deuteronomio 1:2 ပူးပေါင်းရင်းမြစ်များ

Génesis 32:3

Apkelaphássek axta Jacob apseykekxa amya'a m'a Seír, cham'a yókxexma Edom, yaqwayam eltennássekxak Esaú peya ewaták aphakxa m'a apyáxeg.

Éxodo 17:6

Axek sa' eyke ko'o aleyxek ma'a néten egkexe Horeb. Aptekpogkek sa' agkok ma'a meteymog, katyapok sa' yegmen eñama m'a kañe' nak, yaqwayam enxoho énagkok ma'a énxet'ák. Aptemék axta nahan Moisés xa ektáha nak, nápaqta'awók ma'a apkelámha apmonye'e Israel.

Éxodo 3:1

Apkeláneseykha axta nepkések apnaqtósso apepyáta' m'a Moisés apwesey axta Jetró, apteme axta apkelmaxnéssesso énxet'ák apagkok ma'a yókxexma Madián. Xama ekhem axta nahan apkelya'ásekxak ma'a yókxexma meykexa nak énxet, apwákxók axta m'a Horeb, Dios egkexe apagkok nak,

Levítico 2:14

“Apkelsántegkessek sa' agkok xép Wesse' egegkok apmésso naqsa aqsok émha amonye' ekyexna nak aqsok aktek ekyexna, kéméxcheyk esógmak ma'a ekyexna élmakhetma nak, kélmakhetchesso nak kélyexnáyam, tén han ma'a kaxwe kélnakxo ekyexna kéltekxekxo émha amonye' apnakxo nak xép.

Levítico 9:23

Keñe axta Moisés tén han Aarón, apkelántaxna m'a kélpakxanma apchaqneykekxexa axta chá'a énxet'ák, xama axta apkelántepa yókxexma, apkelmaxnessásegkek axta israelitas apkeltamho etaqmelchessesek apheykha Dios. Yetlókok axta han apxekmowásamákpoho Wesse' egegkok yetlo ekyawe agko' apkelyenma apyókxoho énxet'ák,

Números 13:26

ma'a Cadés, yókxexma meykexa nak énxet ma'a Parán. Cha'a aphakxa axta nahan Moisés ma'a tén han Aarón, tén han ma'a apyókxoho israelitas. Apkeltennáseyha axta nahan ektáhakxa apkelwete aqsok ma'a, apxekmóssek axta han ma'a yámet ekyexna éleñama m'a apchókxa nak.

Números 32:8

Hawók agko' aptamheykegkaxa axta kélyapmeyk kéxegke xa ektáha nak, séláphassama axta ko'o apkeleñama m'a Cadés-barnea elanok xa yókxexma nak.

Deuteronomio 1:19

“Xama axta nélánteyapma m'a Horeb, nélmaheykegkek axta m'a ekxámokmakxa nak meteymog élekhahéyak apagkok ma'a amorreos, nélyeheykekxoho m'a apkeltémókxa axta antéhek ma'a Dios Wesse' egegkok. Nélyeykheykekxeyk axta m'a ekyawakxa nak yókxexma meykexa énxet, eyesagkexa nak, kélweteya nak kéxegke, ekwokmoho nélweykmo m'a Cadés-barnea.

Deuteronomio 1:44

Tén axta m'a amorreos, apheykencha'a axta m'a egkexe nak, apkelánteyapma kélmonye'e kéxegke, máxa axta kenáwet aptamheykegkok apmenxenma. Kéltekyawomchek axta kéxegke m'a Seír ekweykekxoho m'a Hormá.

Deuteronomio 2:1

“Tén axta nélmeyeykekxo m'a yókxexma meykexa nak énxet, ámay ekmahéyak axta m'a Wátsam Ekwányam Ekyexwase, ekhawo m'a apkeltémókxa axta atnehek ma'a Wesse' egegkok. Ahóxek axta nahan nélxega nélhaxnenchámeykekxo m'a meteymog élekhahéyak nak ma'a Seír.

Deuteronomio 2:4

Eltennasák sa' énxet'ák se'e séltamhókxa nak chá'a etnahagkok: Kólyeykhágwók sa' kéxegke m'a Esaú aptawán'ák neptámen xapop apagkok nak, cham'a apheykencha'a nak Seír, kélteme kélnámakkok akke nahan kéxegke m'a. Yáwhok nahan kéxegke m'a; eyke katneykha sa' kélwáxok,

Deuteronomio 2:8

“Tén axta negyenseykmo m'a ámay ekmahéyak axta m'a Arabá, Elat tén han Esión-guéber, nélyeykhágweykmek axta m'a nenteme ennámakkok Esaú aptawán'ák neptámen xapop apagkok, apheykencha'a axta m'a Seír, cha'a nentamhákxexa axta nahan xama neghaxnencheyam negmako agmekxak ma'a ámay ekmahéyak axta m'a meykexa nak énxet Moab.

Deuteronomio 9:23

Xama axta apkeltémo kólántépok Wesse' egegkok ma'a yókxexma Cadés-barnea yaqwayam kólmok ma'a apchókxa apméssamakxa axta, kélenmexeykekxeyk axta eyke nahan ma'a apkeltémókxa axta chá'a kóltéhek, kélya'ásseykmek axta nahan, axta nahan kólyeheykekxohok chá'a,

Josué 14:6

Apkelmahágkek axta Judá aptawán'ák neptámen ma'a Guilgal, yaqwayam elpaqhetchesakpohok ma'a Josué, keñe m'a Caleb, apteme axta quenezita, Jefuné axta apketche, aptáha apcháneya Josué s'e: “Kaxénwakxoho sa' apwáxok aptémakxa axta apkenagkama Wesse' egegkok ma'a Moisés apteme axta apchásenneykha, cham'a yókxexma Cadés-barnea, apxeyenma exchep tén han ko'óxa'.