Daniel 9:4 - Biblia Enxet

⁴ Élmaxnakkek axta Dios Wesse' ahagkok, axta ektáhak séltennasa nentémakxa mólya'assáxma s'e: “Wesse' egegkok, Dios apyennaqte tén han meyke ekhémo, apkeláneyo nak chá'a m'a apxeyenma elána', apxekmóssamo nak chá'a apchásekhayo m'a ektáha nak chá'a apchásekhayo, tén han apkeláneykegkoho nak chá'a m'a apkeltémókxa etnahagkok:

Daniel 9:4 ပူးပေါင်းရင်းမြစ်များ

1 Reyes 8:23

aptáha s'e: “Wesse' egegkok, Dios nak Israel: méko exchep ekhawo m'a néten, tén han keso náxop, apkeláneya nak chá'a m'a ekhémo mók nélpaqhetchásamáxkoho, apxekmóssama nak chá'a ektaqmeleykha apwáxok ma'a ektáha nak chá'a apkelyetleykha ekmámenyého agko' apkelwáxok;

2 Crónicas 7:14

keñe sa' ma'a énxet'ák ahagkok, apkeltamhomakpo nak sekwesey, élnapa enxoho apkelwáxok apkeltémakxa, tén han apkelmaxneyágko enxoho, sektama enxoho tén han apkelwáteságko enxoho apkeltémakxa ekmaso, weyxhok sa' ko'o m'a sekhakxa néten, mayaqmagkásekxeyk sa' apkeltémakxa melya'assáxma, axátekhassásekxak sa' makham apchókxa'.

Esdras 10:1

Apwakhegwokmek axta apxámokma israelitas énxet tén han kelán'ák, sakcha'a apkellekxagweyncha'a, neyseksa apkelmaxnagko Esdras, tén han apkelekxagweykha apxéna apkeltémakxa m'a énxet'ák, tén han neyseksa apkeltekxekxo aptapnák ma'a apmonye' nak Dios tegma appagkanamap apagkok.

Nehemías 1:5

Axta ektemék seyánagkama s'e: “Wesse', Dios apha nak néten, apteme nak apwányam, tén han ekha kélaye, melwátésseyam nak elának ma'a ekhémo mók nélpaqhetchásamáxkoho apagkok, melyenyaweykha nak chá'a m'a ektáha nak apkelásekhayo, apkeláneykegkoho nak apkeltémókxa antéhek;

Nehemías 9:32

“Dios egagkok, Dios meyke ekhémo, tén han apyennaqte, tén han ekha kélaye, tén han meyaqmagkasseyam nak ekhémo mók nélpaqhetchásamáxkoho apagkok, tén han ekyawe segásekhayo, kaxén apwáxok ekyókxoho aqsok ekmaso ektémakxa axta m'a kelwesse'e apkelwányam egagkok, tén han apkelámha apmonye'e egagkok, tén han ma'a apkelmaxnéssesso Dios énxet'ák apagkok, tén han ma'a apkellegasso nak appeywa, tén han ma'a ẽlyapmeyk nano' axta, tén han ma'a apyókxoho énxet'ák egagkok, eyeynmo m'a apheykegkaxa axta apkelwesse'e apkelwányam axta Asiria, ekwokmoho s'e kaxwo' nak.

Salmos 32:5

Éltennássek axta eyke ko'o exchep may'assáxma meyke seyáyam xama enxoho, tén han sektémakxa ekmaso; xénchek axta ko'o ewáxok altennaksek may'assáxma, keñe axta exchep, Wesse', meyaqmagkásekxo.

Éxodo 20:6

Altaqmelcheshok eyke chá'a ko'o ekyetlómo sélásekhayo m'a énxet'ák ektáha nak chá'a seyásekhayo, tén han ma'a apkeláneyo nak chá'a m'a segánamakxa ahagkok ekweykekxoho m'a apketchek, tén han ma'a aptawán'ák megkatnégwayam néxa.

Jeremías 3:13

Eyke kay'ásegwakxoho aqsa m'a ektémakxa ekmaso, tén han énmexeykekxo m'a Dios Wesse' agkok; ekweynchámeykencha'a chá'a ektegyeykencha'a énxet apkeleñama mók nekha yaqwayam kagkések ekyókxa, m'a kóneg nak yenta'a élyentaxno pessesse agkok, tén han megkalyeheykekxo m'a séltémókxa nak katnehek. Ko'o sekxeyenma xa, sektáha nak Wesse'.”

Jeremías 32:23

Xama axta apkelántaxnama m'a apchókxa nak, apmoma aptéma apagkok, axta elyeheykekxohok xép, axta nahan elyetlókassók ma'a nélxekmowásamáxche apmésso axta exchep, axta han eláneykegkok ma'a apkeltémókxa axta chá'a elanagkok xép. Axta keñamak apcháphássessama exchep ekyókxoho s'e nenlegeykegkoho nak.

Daniel 6:10

Xama axta apleg'a Daniel ektáxésáxko m'a segánamakxa, apmeyákxeyk axta apxagkok, apkelmeykessákxeyk átog étkók apteyenmakxa', élpayhémo axta m'a ekpayho nak ekteyapmakxa ekhem ma'a Jerusalén, apkeltekxekkek axta aptapnák peya elmaxnak ma'a Dios, tén han elpeykesho'. Ántánxo apteme axta han chá'a aptemék xama ekhem xa ektáha nak, aptémakxa axta chá'a.

Daniel 9:3

Élmaxnakkek axta ko'o Dios Wesse' egegkok séltamho hepasmok, yetlo sélántaxneykekxa m'a apáwa sẽlwáxaqxamo nak, néten táhap axta han ekhak.

Deuteronomio 5:10

altaqmelcheshok eyke chá'a ko'o ekyetlómo sélásekhayo apyókxoho m'a énxet ektáha nak chá'a ko'o seyásekhayo tén han apkeláneykegkoho nak chá'a m'a séltémókxa nak chá'a etnahagkok.

Deuteronomio 7:12

“Kélpenchessek sa' agkok kéxegke kéllege s'e nélánémaxchexa nak chá'a antéhek, tén han kélyahákxoho enxoho tén han kéllana enxoho, tén sa' Dios Wesse' kélagkok elának nahan meyke apyenseyam ma'a ekhémo mók nélpaqhetchásamáxkoho apagkok tén han apkeltennassama axta chá'a elanaksek ma'a kélyapmeyk nanók axta kéxegke.

Deuteronomio 7:21

Nágkólyegwe aqsa apmonye'e xa énxet'ák nak, hakte apheyk kélnepyeseksa kéxegke m'a Dios Wesse' kélagkok, apteme nak Dios apyennaqte tén han mageysso agè'.

Deuteronomio 7:9

Kólya'asagkoho sa' Dios Wesse' kélagkok apteme Dios apmámnaqsoho apagko', apkelánéssamo nak chá'a meyke apyenseyam ekhémo mók nélpaqhetchásamáxkoho apagkok ma'a apyókxoho énxet ekweykekxoho m'a kaxwe apkektegéyak nak tén han ma'a peya nak elántépekxak makham egmonye', cham'a ektáha nak chá'a apchásekhayo, tén han apkelane nak chá'a m'a apkeltémókxa nak chá'a antéhek;