Daniel 2:9 - Biblia Enxet

⁹ Sa' agkok héltennásak ma'a aqsok sewanmésso, katnehek sa' kélyókxoho kéxegke m'a sektáhakxa exchek séláneya, hakte kélheyásawók mók kélpeywa yaqwayam hélyexanchesha ko'o, tén han héltennaksek ma'a ekmowána amya'a nak, kélhaxneyk ayaqmagkassók mók yaqwánxa atnehek. Héltennés kaxwók sekwanmagko, keñe sa' ay'asagkohok ko'óxa kélmowána hélpékessásekxak ektémakxa.

Daniel 2:9 ပူးပေါင်းရင်းမြစ်များ

1 Reyes 22:22

Tén axta apchátegmowágko espíritu apxéna etnéssesek apkelmopwancha'a amya'a m'a apyókxoho apkellegasso nak amya'a apagkok ma'a wesse' apwányam. Keñe axta Wesse' egegkok aptáha apcháneya s'e: Exeg, elyexanchesha sa' ma'a, katnehek sa' xa apmakókxa nak etnehek.

1 Reyes 22:6

Apchánchesákxeyk axta wesse' apwányam Israel ma'a cuatrocientos Dios appeywa apkellegasso, aptáhak axta apkelmaxneyáncha'a s'e: —¿Aktamagkoya sa' ko'o m'a énxet'ák apheykha nak Ramot nak Galaad, essenhan maktamagkehe'? Apkelátegmowágkek axta m'a énxet'ák nak: —Ektamák sa', hakte Dios sa' egkések xeyep ma'a.

Ester 4:11

“Apyókxoho énxet ektáha nak chá'a apkeláneykha m'a wesse' apwányam, tén han ma'a apheykha nak ma'a apchókxa aptémakxa nak chá'a wesse', apkelya'ásegkók ekyetna xama segánamakxa kéltémo chá'a etekyewekxak apyókxoho énxet tén han kelán'a aptaxnegwayam enxoho m'a kañe' nak tegma apyawe yaqwayam emhagkok ma'a aphakxa nak wesse' megkatnaha enxoho chá'a apcháneyeykha. Wánxa eyke aqsa chá'a ewagkasakpok teyp apya'asa enxoho chá'a ekpayhókxa apkenmágkaxa énxet ma'a sawo ekyátekto ekmomnáwa ekwenaqte apagkok nak. Ko'o eyke treinta ekhem entáhak meltémo amhagkok ma'a aphakxa nak wesse' apwányam.”

Proverbios 12:19

Megkamassegwomek chá'a m'a amya'a ekmámnaqsoho nak, megkawegqók eyke chá'a m'a amya'a megkamámnaqsoho nak.

Isaías 41:23

Hẽltennés sa' yaqwánxa katnehek natámen, henxekmós naqsók kélteme aqsok ekha élmowancha'a. Kóllána sa' kélewagkexa enxoho kóllána', ektaqmalma essenhan ma'a ekmaso nak, aqsok yaqwayam enxoho negko'o agè' tén han hẽlyegwakkasek.

Isaías 44:25

Magwohok ko'o katyapok aqsok apkelxeyenma m'a apkellegasso nak chá'a amya'a apkelmopwancha'a amya'a; malya'ássesagkek chá'a ko'o aqsok ma'a apkelya'áseykegkoho nak chá'a aqsok ekpowasamáxche'. Wánhok nahan chá'a ko'o kólátegmowagkokxak ma'a ekha nak chá'a apkelmopwancha'a, mékoho agko' nahan atnéssesek chá'a m'a ektémakxa nak apkelya'áseyak aqsok.

Ezequiel 13:17

“Kaxwo', ey'ókxa sa' ma'a kelán'ák apchókxa xamo' nak, élxeyenma nak chá'a ektémakxa élchetamso agko' awáxok kallegaksek sekpeywa.

Ezequiel 13:19

Kéltawáseykha chá'a kéxegke sekwesey nápaqta'awók énxet'ák ahagkok eñama kélxawéyak chá'a apqántawók ma'a hótáhap apaktek tén han ma'a kelpasmaga apnek; kélnapmeyk chá'a m'a énxet'ák megkapayhawo nak eykhe yaqwayam eletsapok, keñe kéláyekmo chá'a m'a énxet'ák ekpayhawo nak eykhe yaqwayam eletsapok. Cháxa kéltémakxa chá'a kéxegke kélyexancháseykencha'a m'a énxet'ák ahagkok, apkelháxenmo nak ma'a amya'a ekmowána amya'a.

Ezequiel 13:6

Háwe naqsók ma'a apkelxeyenma nak chá'a apkelwete aqsok, wanchek amya'a m'a apkelxeyenma nak chá'a yaqwánxa katnehek egmonye'. Apkelxeyenmeyk chá'a apkellegassama sekpeywa, háwe eyke ko'o séláphasso. ¡Apkelhaxanmeyk eykhe chá'a katnehek ma'a aptémakxa nak chá'a apkelpeywa!

Daniel 2:16

Tén axta Daniel apya'aweykxo m'a wesse' apwányam, apkeltamho egkeyásekxak sekxók makham mók ekhem yaqwayam enxoho epékessásekxak ektémakxa m'a apwanmagko, tén han eltennásekxak ektémakxa.

Daniel 2:21

Cham'a apyaqmagkasso chá'a ektémakxa ekhem ma'a tén han ektémakxa nak chá'a aqsok ekteyapma; cham'a apnegkenma chá'a kelwesse'e apkelwányam, tén han apkelántekkesso chá'a, cham'a apkelmeyáseyak chá'a apkelmopwancha'a m'a ekha nak chá'a apkelmopwancha'a, tén han apkelya'áseyak chá'a aqsok ma'a apkelya'áseyak nak chá'a aqsok.

Daniel 2:8

—Ekya'ásegkók ko'o kéxegke peya kólwenaqtésagkok —axta aptáhak apchátegmowágko wesse' apwányam—, hakte kélleg'ak yaqwánxa atnehek.

Daniel 3:15

¿Kóltekxeyagkoya sa' kaxwók kéltapnák amonye' m'a kéleykmássesso séltémo axta héllanaksek, kélleg'a enxoho élpáwa m'a aqsok kélpáwasso nak? ¿Kólpeykeshoya sa'? Sa' agkok kólpeykásawo', kaxwók sa' kólchexák kañe' táxa axagkok eyáléwágkaxa nak; ¿yaqsa sa' dios apwanchek elwagkasek teyp?

Daniel 5:28

keñe PARSÍN ekxeyenma: ekyeptamáxche neyseksa m'a aptémakxa nak wesse' apwányam, énxet'ák medos sa' kólmeyásekxa', tén han persas.”

Daniel 5:31

apmákxeyk axta aptémakxa nak wesse' apwányam ma'a Darío, apkeñama axta m'a yókxexma Media. Sesenta y dos apyeyam apagkok axta m'a Darío.

Daniel 7:25

Kanmexmakha sa' appeywa m'a Dios meyke nak ekhémo enaqtawássesagkohok sa' ma'a énxet'ák apagkok; emáwhok sa' eyaqmagkasek mók ma'a Dios segánamakxa apagkok, tén han ma'a kélessawássessamókxa nak chá'a ekhem apagkok, elmok sa' ma'a Dios énxet'ák apagkok ekweykmoho apqántánxo apyeyam nepxet pók.