Daniel 11:45 - Biblia Enxet

⁴⁵ Yának sa' kólpekkenchessók appakxanma wesse' apwányam halep nak wátsam ekwányam, teyp nak egkexe ekpagkanamaxche Ektaqmalma. Sa' eyke yetsapwók ma'a, méko sa' han kapasmok.

Daniel 11:45 ပူးပေါင်းရင်းမြစ်များ

Salmos 48:2

¡Tásók agko' nak la'a m'a egkexe netno' nak Sión, cham'a ekpayho nak nexcheyha! ¡Cha'a élpeykessáseykekxa chá'a apwáxok apyókxoho énxet'ák apheykha nak keso náxop! Wesse' apwányam tegma apwányam apagkok ma'a.

Isaías 10:12

Appenchessek sa' agkok Wesse' egegkok ekyókxoho aqsok apmáheyo nak elának ma'a egkexe Sión tén han ma'a Jerusalén, eñássesagkohok sa' ma'a wesse' apwányam Asiria eñama eyaqheykha apwáxok se'e aptamheykha nak, tén han eñama megyésso yeykpoho', tén han eyeymáxkoho apwáxok.

Isaías 11:9

Méko sa' xama enxoho kalának ekmaso ekyókxoho m'a egkexe ekpagkanamaxchexa ahagkok nak, hakte kasawhekxohok sa' apya'áséyak Wesse' egegkok ma'a ekyókxoho nak apchókxa, sa' katnehek ma'a ektémól'a ekláneyo yegmen ma'a wátsam ekwányam.

Isaías 14:13

Aptéma axta chá'a kalchetmok apwáxok se'e: ‘Wántek sa' ko'o ekweykmoho m'a néten; apekkenwók sa' sektaháno ekyawe ektaqmalma m'a néten nak Dios yaw'a apagkok; axek sa' ko'o m'a makhawók agko' nak nexcheyha, cham'a egkexe eyaqneykekxexa nak ma'a aqsok kéláyókxa.

Isaías 2:2

Kólteméssesek sa' egkexe meyke ekhémo apyetnamakxa nak Wesse' egegkok tegma appagkanamap apagkok, cham'a amonye' sa' ektemegwánxa néxa ekhem. Katnehek sa' egkexe netnók agko', kalyeykhagkok sa' ma'a ekyókxoho egkexe nak. Apyókxoho pók aptémakxa énxet'ák sa' elmeyógmak ma'a;

Isaías 27:13

Kólpáwaksek sa' kélaqkahasso ekyennaqte ekpáwà xa ekhem nak, keñe sa' ma'a apkelxegánegwayam axta m'a Asiria, ekhawo nahan ma'a kélnaqleykekxa axta m'a Egipto, elmeyenták sa' Jerusalén elpeykessetámhok ma'a Wesse' egegkok, cham'a egkexe ekpagkanamaxchexa nak.

Isaías 65:25

Katwohok sa' xamók ekto wáwo m'a nepkések apketkok, katwok sa' pa'at ma'a méwa ektémól'a weyke, keñe sa' ma'a yéwa katwok xapop. Méko sa' xama enxoho kalának ekmaso m'a ekyókxoho nak egkexe ekpagkanamaxchexa ahagkok.” Wesse' egegkok apxeyenma xa.

Isaías 66:20

Wának sa' ko'o elchexyók apyókxoho kélókxa xamo' nak kéxegke, apkelenyeykta m'a ekyókxoho apkelókxa apkelchánte m'a yátnáxeg, yátnáxeg apkelyenyawasso, tén han ma'a yántéseksek kélpatmeykegkól'a énxet, élyeheykok tén han ma'a yányátnáxeg. “Etnehek sa' xama aqsok sélmésso naqsa ko'o m'a kañe' Jerusalén, egkexe ekpagkanamaxchexa ahagkok nak, ektémól'a m'a aqsok sélmésso naqsa apkelseykental'a chá'a israelitas egheykok élmópeyo m'a tegma appagkanamap ahagkok. Ko'o sekxeyenma xa, sektáha nak Wesse'.

Ezequiel 39:2

Apeynchágwakxak sa' ko'o makham xép; ataqmelchesagkohok sa' atekkesekxak ma'a eyátépexa agko' nak ma'a nexcheyha tén sa' eyntementák ma'a meteymog élekhahéyak nak ma'a Israel.

Daniel 11:16

Etnéssesek sa' apmakókxa enxoho chá'a etnéssesek apkelma nak énxet ma'a apkelántaxnegwayam nak apchókxa', meyke xama énxet enxoho apmopwána yenmexekxa', elhamok sa' ma'a Xapop Ektaqmalma, emasséssók sa' ekyókxoho m'a apkelwet'akxa enxoho chá'a.

Daniel 11:41

Etaxnegwók sa' nahan ma'a Xapop Ektaqmalma, elnápok sa' apxámokma apagko' énxet'ák; elwagkasakpok sa' eyke teyp ma'a apheykha nak Edom tén han Moab, keñe han ma'a Amón, háwe eyke ekyókxoho m'a xapop nak.

Daniel 11:44

Keñe sa' eñak amya'a eñama m'a ekteyapmakxa ekhem tén han nexcheyha, yaqwayam sa' keygwakkasek; keñe sa' keynnaqwomhok agko' apkelnápomap, kaxének apwáxok elnápok apxámokma apagko' ma'a énxet,

Daniel 2:35

Ánek agko' axta tamhákxak ma'a sawo ekyentaxno, yelpa', sawo ekyexwase, sawo ekmope tén han ma'a sawo ekyátekto ekmomnáwa nak, ektémól'a kataxchek ma'a ekmexanmakxal'a exma, kélchexakkassamakxal'a chá'a apyempe'ék ma'a hótáhap apaktek, kelsókek axta éxchahayam meyke eyeymomáxche'. Keñe m'a meteymog ektégweykta axta m'a kéleykmássesso, ektamhákxo m'a meteymog émha ekyawe, eksawheykekxoho axta ekyókxoho xapop.

Daniel 7:26

Kalanaxchek sa' eyke kélyekpelchémo m'a segyekpelchémókxa nak, kólyementemekxak sa' apteme ekha apmopwána, kólmasséssamhok kélagko' sa'.

Daniel 8:25

Tásek sa' katnehek ekteyapma ekyókxoho aqsok apkelane, eñama apmopwána elyexanchesha pók, tén han apteme apmopwána amya'a. Keyxkohok sa' apwáxok, elnápekxak sa' apxámokma m'a énxet'ák ektaqmalma nak apheykha, eñama appelakkassesso chá'a. Yenmexek sa' ma'a kelwesse'e wesse' apagkok nak, emátog sa' eyke.

Daniel 9:16

Wesse' egegkok, negya'ásegkók negko'o exchep apteme segásekhayo. Elwatés aptaqnagko m'a Jerusalén, hakte xeyep tegma apwányam apagkok ma'a, cham'a egkexe ekpagkanamaxche nak. Apkesméssegkek Jerusalén ma'a apyókxoho pók aptémakxa énxet'ák apheykha nak nepyáwa', tén han ma'a énxet'ák apagkok nak, eñama mólya'assáxma tén han ma'a ẽlyapmeyk nanók axta.

Daniel 9:20

“Élenxanakmók axta ko'o sélmaxnagko tén han séltennáseykekxoho may'assáxma Wesse' egegkok, keñe han melya'assáxma m'a sekhawóxama nak énxet'ák Israel, élmaxnakkek axta ko'o Dios Wesse' ahagkok sélmaxnéssesa m'a egkexe ekpagkanamaxche apagkok nak.

Joel 2:20

Amenxenchesek sa' kéxegke m'a sawa' apkeleñama nak nexcheyha, yókxexma meykexa énxet sa' akxakhagwók. Alweykesagkok sa' kañe' Wátsam Ekwányam Étsapma m'a apkelxegáyam nak apmonye'e, tén sa' ma'a apkelxegáyam nak axayo', alweykesagkok ma'a wátsam ekwányam Mediterráneo, kaltepelchexchek sa' apkelyókxa', kaltahápok sa' nahan. ¡Alának sa' ko'o ekyawe agko' aqsok!”

Miqueas 4:2

énxet apxámokma apagko' sa' elwa', sa' etnehek apkelpeywa s'e: “Kólchempoho, ólchántek Wesse' egegkok egkexe apagkok, tegma appagkanamap apagkok nak ma'a Jacob Dios apagkok, yaqwayam sa' hẽlxekmósek ma'a ámay apagkok, keñe sa' agkegwának ólyetlók ma'a apkeltamhókxa enxoho chá'a ólyetlók.” Hakte Sión sa' katyapok ma'a nélxekmowásamáxche apagkok nak Wesse' egegkok, Jerusalén sa' kañék ma'a appeywa nak.

Zacarías 14:8

Keñe sa' katyapok yegmen megkeymaye m'a Jerusalén, yaqwayam sa' kanyehek ma'a ekhem apmopsamágexal'a tén han ma'a ekmexanmakxal'a exma, nekha sa' kamhagkok ma'a ekpayho nak Wátsam Ekwányam Étsapma tén sa' mók nekha kamhagkok ma'a ekpayho nak Wátsam Ekwányam Mediterráneo.

Números 34:5

kayeykhekxak sa' makham néxa eñama m'a Asmón, ekweykekxoho m'a néxa nak yegmen ényé Egipto, sa' katnégwók néxa m'a wátsam ekwányam Mediterráneo.