Cantares 4:8 - Biblia Enxet

⁸ Sekpagkanma, hétlanta', ólántépok se'e Líbano nak. Kanmexentámho m'a xóp ekyapwate neyseksa énmeykha m'a étseksek egkexe nak Amaná, tén han ma'a étseksek nak ma'a Senir tén han ma'a Hermón, tén han ma'a yámakméwa axanák nak, tén han ma'a egkexe apkelyáqtamakxa nak neptána.

Cantares 4:8 ပူးပေါင်းရင်းမြစ်များ

1 Reyes 4:33

Apxeyenmeyk axta ektémakxa m'a yenta'a keñe han ma'a aqsok kélcheneykekxa', eyeynmo m'a cedro yámet élaqnéyak nak Líbano, ekweykekxoho m'a pa'at élánteyapwayam nak nápakhaw'ék tegma; apxeyenmeyk axta han ma'a ektémakxa nak aqsok nawha'ák, náta, tén han ma'a aqsok élpexyaweykegkoho nak náxop kalxog, tén han ma'a kelasma.

2 Reyes 5:12

¡Keltásek ma'a wátsam ekhágko nak Damasco, cham'a Abaná tén han Farfar! ¡Kaxnók ma'a ekyókxoho wátsam nak Israel! ¡Táse' nak axta eykhe ayaqpássekxak ma'a keñe ataqmelwók! Aplókók apagko' axta han aptaqháwo.

1 Crónicas 5:23

Axta apheykha Manasés nápakha énxet'ák apagkok aptawán'ák neptámen ma'a yókxexma ekmahéyak axta m'a Basán, ekweykekxoho m'a Baal-hermón, Senir tén han ma'a egkexe nak Hermón, hakte apxámok apagko' axta m'a.

Salmos 45:10

Wesse' apwányam appagkanma, keyxho sekmakókxa nak atnehek wána': Nágkaxén aqsa kaxwók awáxok námakkok, tén han énxet'ák agkok,

Salmos 72:16

¡Apxámok sa' etnehek hótáhap apaktek negókxa, etepagkok sa' ma'a naw'ék egkexe nak! ¡Katyapok sa' chá'a aqsok aktek kélcheneykekxa, ektéma nak Líbano, apxámok sa' etnehek énxet tegma apkelyawe nak, ektémól'a pa'at ma'a yókxexma!

Salmos 76:1

Kélya'ásegkok Dios ma'a Judá; kéláyo han apwesey m'a Israel.

Salmos 76:4

¡Oh Dios, apcheymákpoho exchep! ¡Apwányam apagko' xép, apyeykhásseykmók ma'a meteymog élwenaqte nano' nak!

Salmos 89:12

Xép apkelane nexcheyha tén han nepyeyam; kelmeneykmássek ekmátsa agko' élxéna apwesey m'a egkexe Tabor, tén han Hermón.

Proverbios 9:6

Kólwatesák kélteme élyeyháxma, keñe sa' kólweynchamha makham; kólteme aptamheykegkaxa nak ma'a énxet'ák apmopwancha'a nak aqsok.”

Cantares 2:13

Yexneyk kaxwók ma'a higo yámet, kempássek ekpaqneyam ma'a anmen yámet kélcheneykekxa. “Katnemekxa néten, sekpagkanma; nók, ólxog.

Cantares 5:1

Eyáxeg, sekpagkanma, ektaxnegwa'akteyk kañe' séneykekxexa pánaqte exnók ahagkok. Élmákxeyk kaxwók ma'a yámet ánek ahagkok ekmátsa nak ekpaqneyam tén han ma'a élmátsessamo nak élpaqneyam aqsok. Ektókek kaxwók yányawhéna' apyegmenek ahagkok, ekyenchek nahan ma'a vino ahagkok tén han ma'a weyke nagkeygmenek ahagkok. Énámakkok sélásekhayo, kóltawák, kólyenák nahan, ¡kólyenák ekwánxa enxoho kélmaka!

Cantares 7:11

¡Nók sekpagkanma, ólweynchamha yókxexma! Sa' annaqtének axta'a m'a neyseksa nak yámet exnók élmope, ekmátsa agko' nak ekpaqneyam.

Isaías 62:5

Hakte sa' etnehek elmok kéxegke Dios ma'a aptémól'a xama wokma'ák kalyamhápok emok ma'a appagkanma, elánekxak sa', kapayhekxak sa' apwáxok xamók ma'a, ektémól'a kapayhekxak apwáxok xamók aptáwa' m'a énxet.

Ezequiel 27:5

Apkelánessegkek ekyókxoho yántéseksa'ák apagkok ma'a yámet pino éleñama nak kélseykenta m'a egkexe Senir; keñe yámet ekwenaqte apagkok apkelánéssama m'a xama yámet cedro eñama nak ma'a Líbano;

Deuteronomio 3:25

Éltamhók ko'o heyhok ayeykhekxak ma'a neyp wátsam Jordán, hakte émenyeyk ko'o ótak ma'a xapop ektaqmalma nak, cham'a yókxexma ektaqmalma ekxámokmakxa nak ma'a meteymog élekhahéyak tén han ma'a egkexe Líbano.’

Deuteronomio 3:9

(Sirión axta nahan apkeltemék sidonios ma'a egkexe nak, keñe axta amorreos apkeltéma Senir.)

Josué 12:1

Keso apkelwesse'e apkelwányam apkelnapma axta m'a israelitas, apheykencha'a axta m'a teyapmakxa ekhem, teyp nak wátsam Jordán, keñe han xapop apkelmoma axta eyeynamo m'a wátsam Arnón ekweykekxoho m'a egkexe Hermón, tén han ekyókxoho m'a yókxexma ekteyapmakxa ekhem nak, ekyapwátegweykenxa nak xapop ma'a Jordán: