Cantares 1:3 - Biblia Enxet

³ Atsók agkók chá'a atekhánek ekpaqneyam ma'a sokmátsa apagkok, máxa entemék apwesey m'a sokmátsa élyegkenamaxchel'a. ¡Cháxa keñamak ekmámenyého nak chá'a m'a kelán'a étkók!

Cantares 1:3 ပူးပေါင်းရင်းမြစ်များ

Salmos 133:2

Kaxhok ma'a sokmátsa élpexyaweykentámhol'a apqátek ma'a apkelmaxnéssesso Dios énxet'ák apagkok, ekweyktámho áwa' apátog, tén han ma'a aptaxno apyespok nak.

Salmos 45:14

Apkeltaqmalma aptáxama ektaxno kélyentamak ma'a aphakxa nak wesse' apwányam, kelxegkek han natámen ma'a kelán'a élxegexma'a nak chá'a.

Éxodo 33:12

Aptáhak axta Moisés apcháneya Wesse' egegkok se'e: —Wesse', apkeltamhók ko'o exchep anaqlawha s'e énxet'ák nak, makke héltennásak yaqsa yáphaksek hétlók ko'o. Exénchek nahan ko'o exchep ekyetna ekwányam agko' seyáyo tén han ekleklamo apwáxok.

Éxodo 33:19

Aptáhak axta apchátegmowágkokxo Wesse' egegkok se'e: —Ayeykhaksek sa' ko'o apmonye' exchep ma'a ekyókxoho ektémakxa nak sektaqmalma, altennaksek sa' nahan sekwesey. Wamlekxohok sa' ko'o sekmakókxa enxoho wamlekxoho', yepyóshok sa' nahan alanok ko'o m'a sekmakókxa enxoho yepyóshok alano'.

Proverbios 27:9

Néltexneymáxche' ekmátsa ekpaqneyam chá'a kapeykásekxak egwáxok; kallókashok chá'a egyempehek ma'a segmésso nak chá'a appeywa ekmátsa m'a egmók.

Eclesiastés 7:1

Ektaqmalma nenxénamaxche yeykhágweykmók ma'a ekwánxa nak ekmátsa ekpaqneyam sokmátsa. Tásek ekhem nétsapmakxa megkaxnawok ma'a ekhem nenteyeykemxa nak.

Cantares 3:6

¿Yaqsa ekxegakmo nak yókxexma meykexa énxet, ekxegakmo nak ekho éten ekpánma ekmeyeykekxa néten, ekxegakmo nak yetlo émpasso ekpaqneyam ma'a yámet ánek ekmátsa nak ekpaqneyam tén han ma'a aqsok ekmátsa nak ekpaqneyam éten agkok, tén han ma'a ekyókxoho mók ektémakxa nak chá'a sokmátsa?

Cantares 4:10

¡Atsek chá'a exche' héláxñesha, eyáxeg, sekpagkanma! ¡Atsek agko' chá'a héláxñesha, yeykhágweykmók ma'a ekweykenxal'a ekmátsa m'a vino, Atsók agko' nahan ekpaqneyam ma'a sokmátsa agkok, yeykhágweykmók ma'a ekyókxoho aqsok élmátsa nak élpaqneyam!

Cantares 5:13

Hawók nahan apmáxempenák ma'a kélcheneykekxexal'a pánaqte exnók élmátsal'a élpaqneyam. Yexwásawók nahan ma'a apátog élpexyaweykentamxa nak élsekkeneykenta m'a yámet ánek ekmátsal'a ekpaqneyam.

Cantares 5:5

Tén axta sekhákxo néten peya ameykessesek átog ma'a sekpagkanma. Eklegágkók axta nahan ekpálwa'akto emék tén han ephék élsekkeneykenta m'a yámet ánek ekmátsa nak ekpaqneyam, tén han ma'a nenleklamakxa nak átog. ¡Xama axta sekleg'a appeywa máxa axta entáhak peya enxoho watsapok! Ekmeykessessek axta átog ma'a sekpagkanma, méko axta eyke m'a apkenmágkaxa axta. Étamchek axta, maxta eyke óteyákxa'. Ekwóneyha axta eykhe nahan maxta heyátegmowágkok.

Cantares 6:8

Sesenta ekyókxoho apnaqteyegka'a m'a kelwesse'e apkelwányam, keñe ochenta m'a apkelmeykha naqsa nak, xámók agkók eyke m'a kelán'a étkók kaxwe éktega nak,

Isaías 61:3

tén han yaqwayam almések apkelháxaqxo éltaqmalma megkatnaha nak táhap ma'a énxet'ák apkellegeykegkoho nak ekyentaxno apkelwáxok ma'a Sión, tén han sokmátsa ekpeykeseykekxoho nak egwáxok megkatnaha nak ma'a nenlekxagweykha, tén han negmeneykmasso nélpeykessamo, megkatnaha nak ma'a magya'áseyak nak nentáhakxa. Kólteméssesek sa' apkelwesey “Yenta'a élyennaqte élpéwomo éltémakxa” apkeneykekxa m'a Wesse' egegkok yaqwayam exekmósek apcheymákpoho.