Amós 9:14 - Biblia Enxet

¹⁴ Keñe sa' anaqlanták ko'o makham ma'a énxet'ák ahagkok Israel, kélnaqleykekxa axta megkatnahakxa apkelókxa. Enaqxétekhasagkokxak sa' makham ma'a tegma apkelyawe kélnaqtawáseykha axta, keñe sa' exmakha makham ma'a; eknagkok sa' makham anmen yámet, énagkok sa' nahan ma'a égmenek nak; eknagkokxak sa' makham aqsok aktek namyep, etawagkok sa' nahan ma'a ekyexna nak.

Amós 9:14 ပူးပေါင်းရင်းမြစ်များ

Salmos 107:37

Eknekxak chá'a aqsok namyep, eknagkok chá'a anmen yámet, enakxek chá'a ekyexna ekxámokma agko'.

Salmos 53:6

¡Émenye nak la'a ko'o kawak apkelwagkásamap teyp énxet'ák Israel, eñama m'a egkexe Sión! Aptaqmelchessásekxeyk sa' agkok makham apheykha énxet'ák apagkok ma'a Dios, kalpayhekxak sa' apkelwáxok Jacob aptawán'ák neptámen, cham'a apyókxoho nak énxet'ák Israel.

Isaías 60:4

Kólyeheykha, kólsawheykha exma kélnepyáwa': apyókxoho énxet apchaqnákxa', apkelmeyókmek xa kélhágkaxa nak. Makhawók sa' elenyenták elchexyók ma'a énxet'ák kélagkok; kólqeynenták sa' kólnaqlanták ma'a kelán'ák nak.

Isaías 61:4

Kóllánekxak sa' makham ma'a tegma aphopák nanók apkeletsagkásamap axta, tén han ma'a tegma kélpalchesso axta m'a nanók agko' axta, kóllánekxak sa' makham ma'a tegma apkelyawe kélnaqtawáseykha axta.

Isaías 65:21

Elanagkok sa' apxanák ma'a énxet keñe sa' exnakha nahan ma'a kañe', eknagkok sa' ma'a anmen yámet, etawagkok sa' nahan ma'a ekyexna nak.

Jeremías 12:15

Keñe sa' natámen sélántekkesso, alásekhekxohok makham, wának sa' elmeyenták makham ma'a xapop apagkok nak, tén han ma'a apkelókxa apancha'awo nak.

Jeremías 16:15

sa' aqsa kóltéhek chá'a s'e: ‘Memassegwomek sa' chá'a Wesse' egegkok, apkelántekkesso axta israelitas ma'a apchókxa ekpayho nak nexcheyha, tén han ma'a ekyókxoho apkelókxa apkelya'assamakxa axta chá'a apkexpánchessama. Wának sa' ko'o kólmeyenták makham kéxegke m'a xapop kélagkok axta, cham'a xapop sekméssamakxa axta ko'o m'a kélyapmeyk nano'.

Jeremías 23:8

sa' aqsa chá'a kóltéhek naqsók kélpeywa s'e: ‘Memassegwomek sa' chá'a Wesse' egegkok, apkelántekkesso axta israelitas ma'a apchókxa ekpayho nak nexcheyha, tén han ma'a ekyókxoho apkelókxa apkelya'assamakxa axta chá'a apkexpánchessama.’ Kólhakha sa' chá'a m'a xapop kélagkok kélagko' nak.”

Jeremías 24:6

altaqmelchesek sa', wának sa' elmeyenták makham se'e apchókxa nak. Sa' wának kataqmelekxak makham apheykha s'e, mamasséssemek sa' chá'a kaxwo', alhésseták sa' se'e, malántekkesek sa' chá'a kaxwo'.

Jeremías 29:14

Naqso', wohok sa' chá'a ko'o hélwetekxak kéxegke, ayaqmagkassesek mók ektémakxa kélheykha: alántekkessekxak sa' chá'a m'a ekyókxoho apheykegkaxa nak chá'a pók aptémakxa énxet'ák, tén han ma'a ekyókxoho yókxexma sélya'assamakxa axta chá'a séxpánchessama, wánchásekxak sa', wának sa' kólchexyók makham se'e yókxexma, sélántekkessamakxa axta. Ko'o sekxeyenma xa, sektáha nak Wesse'.’

Jeremías 30:18

Aptáhak Wesse' egegkok se'e: “Ayaqmagkassesek sa' ko'o mók ektémakxa nak apheykha m'a Jacob énxet'ák apagkok, kayóshok sa' alanok ma'a apchókxa nak; kólnaqxétekhasagkokxak sa' makham tegma apkelyawe m'a neyseksa nak meteymog nekha'a appalleykemxa axta, tén han kelwesse'e apxanák apkelyawe m'a apheykegkaxa axta.

Jeremías 30:3

hakte xegakmek ekhem yaqwánxa sa' ko'o ayaqmagkassesek mók ektémakxa nak apheykha m'a énxet'ák ahagkok Israel tén han ma'a Judá. Ko'o sekxeyenma xa, sektáha nak Wesse'. Wának sa' ko'o elmeyenták makham ma'a xapop sekméssamakxa axta yaqwayam etnehek apagkok ma'a apyapmeyk nano' axta.”

Jeremías 31:23

Aptáhak Wesse' ekha apyennaqte, Dios apagkok nak Israel se'e: “Ekyaqmagkassessek sa' agkok ko'o mók ektémakxa nak apheykha m'a énxet'ák Judá, apkelhákxo sa' makham ma'a xapop apagkok nak, tén han ma'a tegma apkelyawe apagkok nak. Sa' etnehek makham apkelpeywa s'e: ‘¡Etaqmelchesek sa' Wesse' egegkok se'e egkexe ekpagkanamaxche nak, ekyetnamakxa nak ekpéwomo nentémakxa!

Jeremías 31:28

Sa' atnehek alanha yaqwayam anaqxétekhasagkokxak tén han aknekxak aqsok aktek ma'a, sekteméssessamakxa axta chá'a séláneykencha'a yaqwayam alántekkesek, tén han alyaqnegkesagkok náxop, tén han amasséssók, tén han alteméssessamhok exma ekmaso. Ko'o sekxeyenma xa, sektáha nak Wesse'.

Jeremías 31:5

Eknekxak sa' makham anmen yámet ma'a néten egkexe nak Samaria, etawagkok sa' nahan ekyexna anmen yámet ma'a ektáha nak apkeneykekxa.

Jeremías 32:15

Hakte aptáhak Wesse' ekha apyennaqte, Dios apagkok nak Israel se'e: Kólmekxak sa' makham tegma s'e xapop nak, tén han yókxexma tén han ma'a kélcheneykekxexa nak anmen yámet.’

Jeremías 32:37

Wánchásekxak sa' ko'o makham énxet'ák apheykha axta s'e, cham'a ekyókxoho apkelókxa sélya'assamakxa axta chá'a ko'o séxpánchessama, cham'a seklómo ahagko' axta ko'o, séltaqnaweykegkoho agko' axta, wának sa' elchexyók makham se'e yókxexma nak, yaqwayam sa' exmakha meyke ektemegweykmohóxma.

Jeremías 33:11

kélmeneykmasso kélessawássessamo, tén han ekpayheykekxa egwáxok, tén han kélmeneykmássesso nak élyamhopma. Kañexchek sa' makham katnehek se'e: Kólmés ekxeyenma kélwáxok Wesse' ekha nak apyennaqte, hakte Wesse' egegkok apteme ektaqmalma apwáxok, megkamassegwomek chá'a segásekhayo. Elsanták sa' aqsok apkelmésso naqsa m'a tegma appagkanamap apkelmésso nak chá'a élxeyenma apkelwáxok. Naqso', ayaqmagkassesek sa' ko'o mók ektémakxa s'e apchókxa nak, yaqwayam sa' katnekxak makham ma'a ektémakxa axta nano'. Ko'o sekxeyenma xa, sektáha nak Wesse'.”

Jeremías 33:7

Ayaqmagkassesek sa' mók ektémakxa nak apheykha m'a énxet'ák Judá, tén han ma'a Israel, anaqxétekhasagkokxak sa' makham, yaqwayam sa' etnahagkokxak ma'a ektémakxa axta apheykha nano'.

Ezequiel 16:53

“Agkeyásekxak sa' ko'o makham ektaqmeleykekxa ekha m'a Sodoma tén han ma'a Samaria yetlo m'a étchek nak; xeye' sa' nahan agkeyásekxak ektaqmeleykekxa ekha,

Ezequiel 28:26

Méko sa' katnehek apheykha m'a, tásek sa' katnehek, elanagkok sa' ma'a tegma, eknagkok sa' nahan ma'a anmen yámet. Atnéssesek sa' eyke ko'o sekmakókxa nak atnéssesek allegássesagkohok apyókxoho m'a apheykha nak nepyáwa, cham'a apkelwañeykha nak chá'a m'a énxet'ák Israel. Keñe sa' kólya'ásegwók ko'o sektáha Wesse', Israel Dios apagkok.”

Ezequiel 37:21

Keñe sa' etnehek elának se'e: ‘Keso aptáhakxa exchek appeywa Wesse' egegkok se'e: Alántekkessekxak sa' ko'o israelitas ma'a nepyeseksa nak pók aptémakxa énxet'ák, cham'a apkelmaheykegkaxa nak chá'a; wánchásekxak sa' ma'a apheykha nak ekyókxoho yókxexma, tén sa' anaqlanták makham ma'a xapop apagkok nak.

Ezequiel 39:25

“Ekeso éñamakxa sektáha nak ko'o sekpeywa s'e sektáha nak Wesse': Kalepyóshok sa' ko'o kaxwók alanok apyókxoho m'a énxet'ák Israel, Jacob aptawán'ák neptámen nak. Wának sa' kayaqmagkasek mók ma'a ektémakxa nak chá'a, yaqwayam sa' wának ko'o etaqmelchesek ma'a sekwesey ektaqmalma nak.

Amós 5:11

Megkólhakha sa' ma'a kélxanák apkeltaqmalma kélláneyak axta meteymog eñama kélnaqtawáseykegkoho m'a meyke nak aqsok apagkok tén han kéltémo elyánmagkasek chá'a hótáhap apaktek elmések kéxegke, megkólyenagkek sa' nahan vino éleñama m'a kélcheneykekxa nak.

Sofonías 1:13

Cháxa keñamak peya nak kalmaxchek ma'a aqsok élmomnáwa apagkok nak, tén han kólmasséssessók ma'a apxanák nak, elanagkok sa' eykhe apxanák, mexnakha sa' eyke m'a; eknagkok sa' eykhe anmen yámet, ménagkehek sa' eyke m'a égmenek nak.”

Sofonías 2:7

Énxet'ák Judá sa' emekxak xa apchókxa nak, cham'a apkeleymomap nak meletsapma, apwa'akto sa' epásegwaták ma'a Dios Wesse' apagkok, apyaqmagkassesa sa' mók ma'a ektémakxa nak apheykha. Sa' elanha apnaqtósso nepkések ma'a, keñe sa' axta'a ellókassekxak chá'a apkelyampe m'a tegma apheykegko nak Ascalón.