Amós 5:7 - Biblia Enxet

⁷ ¡Kéxegke laye, kéltemessáseykekxa nak aqsok ekmáske m'a nentémakxa ekpéwomo, tén han kélyamasma nak ekpéwomo kéllánekxésso amya'a énxet'ák!

Amós 5:7 ပူးပေါင်းရင်းမြစ်များ

Salmos 125:5

exnésho apteméssessamakxa nak chá'a élmasagcha'a apkeltémakxa m'a apkelyetleykekxa nak chá'a ámay ekmaso. ¡Keytek sa' chá'a meyke ektáhakxa negha m'a Israel!

Salmos 36:3

Asagkók chá'a katnehek appeywa, apmopwána amya'a han, massegkek apya'áseyak exma, apkelwátessegkek apkelane aqsok ektaqmela.

Proverbios 21:7

Kalsexnáneyekxohok apagko' sa' apkeltémakxa apkelyennaqteyásamákpoho chá'a m'a élmasagcha'a nak apkeltémakxa', eñama memáheyo etaqmelchessásekxak chá'a apheykha m'a énxet'ák.

Isaías 1:23

Élyennaqte apkelwáxok ma'a kelwesse'e apkelwányam kélagkok nak, énxet'ák élmasagcha'a apkeltémakxa nahan ma'a apkelxegexma'a. Meltaqheksók nahan elxawagkok selyaqye m'a apyókxoho nak, etegyagkok nahan yaqwayam nak kólmésagkok aqsa chá'a m'a aqsok kelméyáséyak naqsa nak. Meltaqmelchessásekxeyk ekheykha m'a élyeheykha nak, megkalyetnakhaksók nahan apkelwáxok ektémakxa nak ekheykha m'a kelán'a xentampe'e nak.

Isaías 10:1

¡Kéxegke laye, kélpekkenma nak segánamakxa megkapéwomo, tén han kélpenchesso nak kéllegasso m'a kéltémókxa nak chá'a etnahagkok énxet'ák ekyentaxno agko' nak,

Isaías 46:12

Énxet'ák, élyennaqte nak kélwáxok, kóleyxho sekpeywa, élxeyenma nak chá'a kélwáxok megkólwagkasaxcheyk teyp.

Isaías 5:20

¡Kéxegke laye, kélxeyenma nak ektaqmalma m'a ekmaso nak, tén han kélxeyenma nak ekmaso m'a ektaqmalma nak; kéltemessáseykekxoho nak han élseyéxma m'a ekyaqtessóxma, keñe ekyáqtessóxma m'a élseyéxma nak; kéltemessáseykekxo nak han ekmátsa m'a ekmáske nak, keñe ekmátsa kéltemessáseykekxo m'a ekmáske nak!

Isaías 5:7

Israel apchókxa m'a apkeneykekxexa nak anmen yámet apagkok ma'a Wesse' ekha nak apyennaqte tén han ma'a Judá, cham'a apkeneykekxa apmopmenyého apagko' nak. Apkelhaxanmeyk axta katnehek kélyeheykekxoho segánamakxa apagkok Wesse' egegkok ma'a, wánxa axta eyke aqsa apweteya chá'a ekyetnama m'a nentekyawa; apkelhaxanmeyk axta katnehek ma'a ekpéwomo nak nentémakxa, wánxa axta eyke aqsa aplegaya chá'a m'a ekpayheykha nak egátog nenlegeykegkoho ekmáske.

Ezequiel 18:24

“Apkelwátessek agkok aptémakxa ekpéwomo m'a énxet ekpéwomo nak aptémakxa, apkelánekxo enxoho ekyókxoho m'a aqsok ekmaso ektaqnómaxkoho nak, apkeláneykegko nak ma'a énxet'ák élmasagcha'a nak apkeltémakxa, ¿xéncheya kélwáxok kéxegke megyetsepek xa? Megkaxénwakxók sa' chá'a ko'o ewáxok ma'a ekyókxoho aqsok ektaqmela axta apkelane: yetsapok sa' eñama apkelwátesseyam sétleykha tén han aptémakxa mey'assáxma.

Ezequiel 3:20

Apyensakmek agkok aptémakxa ekpéwomo xama énxet appéwomo, apkelánekxo enxoho aqsok ekmaso; keñe élxegkesa enxoho ko'o atlápagkasek, agkok xép epaqhetchásak, yetsapok nahan xa énxet nak. Megkaxénwakxók sa' nahan ko'óxa ewáxok ektémakxa axta aqsok ektaqmela apkelane, yetsapok sa' eñama mey'assáxma, xeyep sa' eyke axének ektáha apsexnenagko apketsapma.

Ezequiel 33:18

Apkelwátéssek sa' agkok apkelane aqsok ektaqmela m'a énxet ektaqmalma nak aptémakxa, apkelana enxoho m'a aqsok ekmaso nak, yetsapok sa' eñama apkelane xa.

Oseas 10:4

Epaqmésmakha aqsa chá'a, héltennaksek chá'a aqsok apmopwána amya'a, exnéshok aqsa chá'a mók apkelpaqhetchásamákpoho m'a pók apkelwesse'e nak; kaxhok sa' yámet ekmaso m'a ektémakxa nak chá'a apkelánekxésso amya'a énxet'ák, ekteyapmól'a m'a kélpeynchámxa enxoho xapop.”

Amós 2:3

¡Amasséssók sa' ko'o wesse' apwányam nepyeseksa énxet'ák apagkok; waqhek sa' yetlo énxet'ák apagkok ekha nak kéláyo!” Wesse' egegkok apxeyenma xa.

Amós 3:10

Aptáhak Wesse' egegkok se'e: “Melya'ásegkok ektémakxa nak nenlane ekpéwomo nentémakxa m'a; apxatmeykegkek tegma apkelyawe apagkok ma'a aqsok apkelmenyexéyak nak chá'a eñama apkelyennaqteyáseykha, apyempe'ék.”

Amós 6:12

¿Apwancheya yenyahagkok yátnáxeg neyseksa meteymog? ¿Kélwancheya kólpeynchók xapop ma'a neyseksa wátsam ekwányam? ¡Pánaqte segaqhamo kélteméssáseykekxak kéxegke m'a ekpéwomo kéllánekxésso nak amya'a m'a énxet'ák, keñe m'a ektekkesso nak chá'a nentémakxa ekpéwomo kéltemessáseykekxo ekmáske!

Miqueas 3:9

Kóleyxho sa' kaxwo' se'e, kelwesse'e, tén han apkelámha apmonye'e nak Israel, kéltaqnagko nak chá'a m'a nentémakxa ekpéwomo, kélyetnakhásseyam nak chá'a ekyókxoho m'a aqsok ekpéwomo nak,

Habacuc 1:4

Megkalánamáxchek ma'a ektémakxa nak chá'a segánamakxa, kelyeykhamaxchek aqsa m'a ekpayhawo nak antéhek, apnaqtawáseykegkók chá'a élmasagcha'a nak apkeltémakxa m'a éltaqmalma nak apkeltémakxa, apkelyetnakhásseykmek ma'a ekpéwomo nak nentémakxa.

Sofonías 1:6

Amasséssók sa' han ma'a seyamasma nak ko'o, mehektamso nak chá'a tén han mehey'eykekta nak chá'a etegyaha sekpeywa.”

Deuteronomio 29:18

Nágkólho aqsa étek kélnepyeseksa kéxegke xama énxet, kelán'a, essenhan kélnámakkok tén han énxet'ák kélagkok, apyamasma sakhem ma'a Dios Wesse' egegkok eñama apkelpeykessamo m'a aqsok apcháyókxa nak xa énxet'ák nak. Kólxohok katnehek kéxegke m'a yámet egkepmenák ekmáskel'a tén han ma'a segwayól'a.